Indize bakunaren zenbakiak aldagai jakin baten aldakuntza neurtzen du (prezioa, kopurua, etab.) emandako aldi batean (t) eta oinarritzat hartutako aldi baten aldean (0). t urteko balioaren eta oinarrizko 0 urteko balioaren arteko koziente bezala kalkulatzen da.

Indize konplexuaren zenbakiak aldagai-multzo baten aldakuntza neurtzen du aldi jakin batean (t) eta oinarritzat hartutako aldi baten aldean (0). Indize konplexuaren adibide bat KPI da; izan ere, indize honetan familiaren "erosketen otzara" osatzen duten ondasun eta zerbitzuen prezioek izan duten baterako bilakaera aztertzen da. Indizea kalkulatzerakoan gai ezberdinen prezioek ez dute eragin berdina; aitzitik, ponderazio ezberdina erabiltzen da oinarrizko urteko otzaran horietariko bakoitzarentzat zuen garrantziaren arabera.

Kateatutako indizea konplexua da; 0 alditik t aldirako igarotzea zatikatu egiten da eta gehikuntza partzialak kontuan hartu. Ondorioz, indize hori ateratzeko erabili diren ponderazioek aldagaiek t-1 urtean izan dituzten pisuak islatzen dituzte eta ez oinarrizko 0 urtean izandakoak. Horrela, zenbatespen askoz zehatzagoa eta eguneratuagoa lortzen da.