Osasun gastuaren funtzioak
SHA sisteman, gastuaren sailkapen funtzionala oso garrantzitsua da osasun arloko gastuaren eta jardueren definizioaren mugak zehazteko orduan.
HC.1 Sendaketarako osasun arreta
Sendaketa-arretaren helburua nagusia gaixotasun edo lesio baten sintomak arintzea da, gaixotasun edo lesio horren larritasuna murrizteko.
Gaixotasuna sendatzeko edo zaintzeko tratamenduaren barruko fase guztiak izan daitezke, hala nola diagnostikoak eta prozedura terapeutikoak; produktu farmazeutikoak eta bestelako produktu medikoak.
HC.2 Errehabilitaziorako osasun arreta
Osasun arazo desberdinak (gaixotasunak, asaldurak, lesioak) dituzten pertsonek erabiltzen dituzten zerbitzuak dira. Arazo horiek akutuak edo kronikoak izan daitezke, jaiotzetikoak edo gerora sortutakoak, eta desgaitasunen bat duten edozein adineko pertsonari eragin ahal diete, osasun arreta espezializatu baten arabera edo bestela.
Atal honetatik kanpo daude: gizarte, hezkuntza edo lan arloko helbururen bat duten errehabilitazio zerbitzuak.
HC.3 Iraupen luzeko osasun arreta
Epe luzerako zerbitzuak: mendekotasun mailaren bat duten pazienteei denbora tarte luze batez mina eta sufrimendua arindu eta osasun egoeraren narriadura murrizteko xedez ematen diren zerbitzuak eta arreta.
HC.3.3 kategoriaren barruan, mendekotasuna duten pertsonei eguneroko jardueretarako ematen zaien laguntzara bideratutako gastua ere barne hartzen da. Gastu hori kuantifikatzeko orduan arazoak egon daitezke, izan ere, normalean, zerbitzu horren jarduera instrumental eta zainketa pertsonalekin lotutako zerbitzuak barne hartzen ditu, eta ez daude osasun gastuaren barruan. SHA 2011 eskuliburuak barne hartu beharreko gastu guztien inguruko irizpide eta jarraibideak ematen ditu.
Aurretik aipatutako hiru funtzioetako bakoitza zerbitzua emateko moduaren edo erregimenaren arabera sailkatzen da. Osasun arreta emateko honako lau modu bereizten dira:
Ospitaleratzea: pazientea dagokion osasun erakundean formalki erregistratzea eta gutxienez bertan gau bat pasatzea.
Eguneko ospitaleratzea: pazientea osasun erakundean onartu eta erregistratzen da, egunean bertan alta emateko asmoz.
Anbulatoria: modu formalean establezimenduan onartzen ez diren pazienteak (anbulatorioak, mediku kontsultak, odontologoak eta abar).
Etxez etxeko arreta: : pazienteek beren etxean jasotzen duten arreta.
HC.4 Osasun zerbitzu osagarriak
Osasun arretarekin lotuta dauden jarduerak, funtzio zehatz bati esleitu gabekoak, eta pazienteak zuzenean kontsumitzen dituenak, hala nola analisi klinikoak, irudi bidezko diagnostikoak eta pazienteen garraioa.
HC.5 Produktu medikoak (funtzio bati ere esleitu gabekoak)
Gaixotasunen diagnostikora, sendaketara edota tratamendura bideratutako produktu mediko ez iraunkorrak eta produktu farmazeutikoak dira, funtzio edo emateko modu zehatz bati esleituta ez daudenak.
Honakoak daude barne: onuradunak erositako produktu medikoak, izan osasun sistemarekin kontakturen bat izatearen ondorioz, edo norbanakoak berak egindako balorazioaren arabera, salmenta librekoak.
Salbuespenak: osasun arretan zehar profesional batek aginduta emandako edo kontsumitutako produktu medikoak.
Planteamendu hau koherentea da, kontuan hartzen badugu produktu medikoak osasun sistemaren parte direla eta, produktuaz beraz gain, espezialista batek aholkua ematen duela produktu hori erabiltzeko moduaren inguruan. Horrela izanik, ospitaleak emandako produktu farmazeutikoak zerbitzuaren parte bat baino ez dira eta, produktu horiek berak, farmazietan erosten ditugunean, establezimenduaz arduratzen den pertsonak ematen duen zerbitzuaren parte bat dira.
HC.6 Prebentzio zerbitzuak
Lesio eta gaixotasunen, eta horien ondorioen larritasuna edo kopurua murrizteko edo saihesteko helburua duen edozein neurri prebentziokoa dela esan dezakegu. Herritarren osasuna hobetu edo mantentzeko xedea duten jarduerak dira, baina ez dira sendaketa prozesuak.
Beste gauza batzuen artean, bizi ohitura osasungarriei edo osasunari buruzko informazioa zabaltzen da; txertaketa kanpainak, laneko osasuna eta abar.
HC.7 Osasun sistemaren eta horren finantzaketaren gobernantza eta administrazioa
Osasun sistemaren funtzionamendua bideratu eta babesten duten jarduerak dira, sistema bera, publikoa zein pribatua, eraginkorrago izateko helburuarekin.
Osasun programen administrazioa; arauak ezartzea; produktoreen arautzea, lizentzia edota gainbegiratzea; fondo-bilketa eta administrazioa kudeatzea, baliabide horien jarraipen eta kudeaketa.