Gizarte-segurtasunerako sistema. Talde honetan gizarte segurantzaren erregimen ezberdinak sartzen dira, eta ondokoek kudeatzen dituzte: Gizarte Segurantzako Institutu Nazionala, Itsasoko Gizarte Institutua, Gizarte Segurantzaren Diruzaintza Orokorra eta lan-istripu eta gaixotasun profesionalen mutualitateak.
Sistema berezi batean gizarte segurantzaren familia babesa ere jasotzen da. Gizarte Segurantzaren konpentsazio-funtsa itxurazko sistema bat da, gizarte segurantzan superabitak dituzten erregimenen eta defizitak dituztenen artean transferentziak konpentsatzen dituen ganbera moduan jarduten duena eta erregimen horien artean banatu ezin diren gastuak eta sarrerak egozten zaizkionak.

Enpleguko Institutu Nazionala. Berez talde askea da eta langabezia egoeren gizarte-babesean duen garrantziagatik nabarmentzen da.

Funtzionario publikoen erregimenak. Funtzionario publikoen erregimen bereziaren menpean dauden subjektuen gizarte-babeserako gastuak eta sarrerak jasotzen dira epigrafe honetan. Hain zuzen, oinarrizko prestazioak edo klase pasiboen erregimena eta administrazio-mutualismoari dagozkionak jasotzen dira. Azken hauek, gainera, aldi horretan indarrean dauden funtzionarioen hiru mutualitateek ordaintzen dituzte: Estatuko Administrazio Zibileko Funtzionarioen Mutualitatea (MUFACE), Indar Armatuen Gizarte Institutua (ISFAS) eta Mutualitate Orokor Judiziala (MUGEJU). Halaber, bere langileek aldi baterako ezintasuna eta amatasuna hartu dutelako horien soldatak mantentzeko kontzeptuan herri administrazioek ordaintzen dituzten zenbatekoen zenbatespena ere sartzen da hemen.

Gizarte-babeserako beste sistema batzuk. Mota ezberdinetako sistemek eta erakundeek emandako gizarte-babesa jasotzen dute; beraz, multzo heterogeneoena da. Jasotzen dituzten sistema garrantzitsuenen artean hauek aipatu behar dira:

• Osasun sistema publikoa. Herri administrazioek osasunaren esparruan dituzten eskumenen arabera egindako jardunak jasotzen ditu.
• Gizarte-zerbitzuen sistema publikoa. Euskal Autonomia Erkidegoko administrazioak gizarte-zerbitzuen esparruan dituen erantzukizunak biltzen ditu.
  Langileek enplegatzaileen bidez zuzenean jasotzen dituzten prestazioak; hauek bi sistematan banatzen dira nahitaezkoak diren edo ez aintzat hartuta.
• Kontuen Europako Sistemaren (SEC-95) arabera gizarte-aseguru pribatuaren definizioarekin bat egiten duten aseguruen fenomenoak, eta batez ere Borondatezko Gizarte Aurreikuspeneko Erakundeen (BGAE) jardunaren zati bat modu horretan kataloga daiteke.
• Gizarte-babesaren esparruan helburu jakin bat duten erakunde publikoen ekintza, Soldatak Bermatzeko Funtsarena (FOGASA) esaterako.
• Gizarte-zerbitzuen esparruan jarduten duten irabazi-asmorik gabeko erakunde pribatuen jarduna.