Gizarte-babeseko sistemen gastua era askotako sarreren bidez finantzatzen da. Hona hemen nola sailkatzen diren sarrera horiek:

1.Gizarte-kotizazioak

• 1.1.Gizarte kotizazioak, enplegatzaileen kontura
  • 1.1.1.Benetako gizarte kotizazioak, enplegatzaileen kontura
  • 1.1.2.Gizarte kotizazioak, enplegatzaileen kontura egotziak

• 1.2.Gizarte kotizazioak, babestutako pertsonen kontura
  • 1.2.1.Soldatakoak
  • 1.2.2.Langile autonomoak
  • 1.2.3.Pentsiodunak eta beste

2.Herri-administrazioen ekarpenak

• 2.1.Zerga bereziak
• 2.2.Sarrera orokorrak

3.Beste sistema batzuetatiko transferentziak

4.Bestelako sarrerak

• 4.1.Jabetzaren errentak
• 4.2. Bestelakoak




Gizarte-kotizazioak enplegatzaileek, babestutako pertsonek edo babes sistemek dauzkaten kostuak dira, onuradunek gizarte prestazioak jasotzeko daukaten eskubidea bermatzen dutenak.

Enplegatzaileen konturako gizarte kotizazioak benetakoak edo egotzitakoak izan daitezke. Ordainketak aseguratzaile independente bati egiten zaizkionean eta hark prestazioen hornikuntza kudeatzen duenean (aseguratzaile hori Gizarte Segurantzaren administrazio bat, dirua irabazteko asmorik gabeko erakunde bat edo aseguru-enpresa pribatu bat izan daiteke), edo enpresaren balantzeetan erreserbak egiten direnean, benetako kotizazioak dira. Enplegatzaileak prestazioa zuzenean bere langileei hornitzeko konprometitzen direnean, aseguratzaile autonomoen bitartekaritzarik gabe eta erreserbarik eratu gabe, egotzitako gizarte kotizazioa da.

Gizarte kotizazioak babestutako pertsonen kontura ere izan daitezke, pertsona horiek soldatadunak, autonomoak nahiz pentsiodunak izan. Berresleitutako gizarte kotizazioak ere sartzen dira. Gizarte babeseko sistema batek beste bati egiten dizkionak dira, jasotzen dituen sistemak babesten dituen pertsonen eskubideak mantentzeko edo gehitzeko helburuarekin.



Herri-administrazioen ekarpenak sistema publiko ez-kontributiboen kostuak pagatzera edo gainerako sistemen sarrerak osatzera bideratzen direnak dira. Prestazio baten edo babeseko sistema jakin baten hornidurari legez lotutako berariazko zergen biltzetik datozen sarrerak izan daitezke; nahiz eta, eskuarki, administrazioek egindako ekarpen orokorrak izaten diren, eta ez daude atxikita berariazko ezein sarrera jasotzera (sarrera orokorrak).

Ekarpen publikoak kalkulatzea zaila izaten da erakunde edo organismo bakar bat dagoenean, baldin eta horren jardunak estatu baten lurralde osoa hartzen badu. Izan ere, erakunde bakarra badago, ekarpen publiko gisa, kopuru bakar bat jasotzen du horrek, estatuko administrazio zentraletik. Kasu horietan, arazoa honako hau izaten da: erakunde horrek Estatu osoan dituen gastuei erantzuteko, Euskal Autonomia Erkidegoak zenbateko ekarpena egiten duen zehaztea.

Arazoa, batik bat, gizarte-segurantzako sistemaren eta Espainiako Enplegu Institutuaren sarrerei dagokie. Lehenengo kasuan, gizarte-segurantzaren sarreren zenbatespen batera jo dugu. Eusko Jaurlaritzako Justizi, Lan eta Gizarte Segurantza Sailak egiten du lan hori, eta, irizpide gisa, eskualdatu ez diren eskumenak ordaintzeko Euskal AEk egiten dituen ekarpenak hartzen dira, Kupoaren Legean zehaztutakoari jarraituz.

Irizpide hori bera jo da egokitzat, INEMek ekarpen publiko gisa hartzen dituen sarreren kasuan.



Beste sistema batzuetatiko transferentziak. Gizarte-babeseko sistemen arteko ordainketak dira. Kitapenik gabeko ordainketak dira, eta jasotzen dituen sistemarentzat, sarrerak dira.