Euskal AEko esportazioak %4,6 hazi dira 2003ko lehenengo hiruhilekoan, Eustatek landutako datuen arabera, eta berretsi egin da 2002ko bigarren seihilekoan izandako gorakada. Esportazioek guztira 2.886,9 milioi euroko zifra lortu dute.

Inportazioak ere, %4,0 igo dira aurreko urteko lehenengo hiruhilekoaren aldean eta 2.523,8 milioi eurora iritsi dira.

Produktu ez-energetikoak bakarrik aztertzen baditugu, ikusiko dugu horiei dagozkien esportazioek %3,2ko urte arteko hazkundea izan dutela, eta izaera bereko inportazioek, 2 puntu altuagoko bilakaerarekin, %5,3koa, beti ere 2002ko lehen hiruhilekoarekin konparatuta.

Kanpo-merkataritzaren bolumena –esportazioen eta inportazioen batura–, 2002ko lehen hiruhilekoko 5.187,8 milioi eurotik 2003ko lehen hiruhilekoko 5.410,7 milioi eurora igo da, eta %4,3 hazi da.

Iazko lehen hiruhilekoan 333,8 milioi eurotan zifratu zen merkataritza-superabita, 363,1 milioi eurora iritsi da aurtengo aldi berean. Ondorioz, guztizko esportazioek inportazioen gainean duten estaldura-tasa, hobetu egin da: 2002ko lehen hiruhilekoko %113,8tik 2003ko epe bereko %114,4ra. Hala ere, esportazio ez-energetikoek produktu beren inportazioen gainean duten estaldura-tasa jaitsi egin da denboraldi berean, %139,0tik %136,2ra.

Europar Batasuna helburu duten esportazioak %10,2 igo dira eta ekonomia-eremu horretatik etorritako inportazioak apur bat urritu dira (%-0,8). Gure bezero nagusiei zuzendutako esportazioak igo egin dira: Frantzia (%9,7), Alemania (%13,4), Italia (%12,7) eta Erresuma Batura bideratutakoak (%4,6). Inportazioei dagokienez, Frantziatik (%8,4) eta Italiatik (%11,2) etorritakoak besterik ez dira hazi. Beraz, Europar Batasuna helburu duten esportazioek bertatik datozen inportazioen gainean duten estaldura-tasa hobetu eta aurreko urteko %119,7tik aurtengo 132,9ra pasa da. Europar Batasuneko izangai diren herrialdeetara zuzendutako esportazioak %9,8 jaitsi dira eta baita bertatik etorritako inportazioak ere (%-1,2).

Sektore-azterketak edo muga-zergen taldeka egindako azterketak erakusten digu ekipo-ondasunen esportazioak %2,9 jaitsi direla eta horien inportazioak %13,5, aurtengo lehen hiruhilekoan, 2002ko aldi beraren aldean. Metalak eta manufaktura atalen esportazioak %13,3 hazi dira eta horien inportazioak %26,9. Ekipo-ondasunen taldean, material elektrikoak arloan %7,4 igo dira atzerrirako salmentak eta garraio-materialak, berriz, %12,4 urritu.

2003ko lehen hiruhileko esportazioen urte arteko bilakaerak desberdinak izan dira hiru lurralde historikoetan: batez bestekoaren gainetiko hazkundeak Gipuzkoan (%9,2), batez bestekoaren parekoak Bizkaian (%4,6) eta jaitsierak Araban (%-0,9). Inportazioek ere, bilakaera-tasa desberdinak izan arren, lurraldekako joera bera adierazten dute: Gipuzkoan %19,6, Bizkaian %7,3 eta Araban %-18,3. Arabako guztizko esportazioen emaitzetan zuzenean eragiten dute garraio-materialek (%-13,1) eta kimika-produktuek (%-15,0). Bizkaian ere urritu egin dira garraio-materialen (%-29,6) esportazioak, baina gehitu egin dira metalak eta manufakturak alorrenak (%14,0) eta material elektrikoarenak (%0,8). Gipuzkoan gehitu egin dira kanporako salmentak ekipo-ondasunetan (%9,6) eta metalak eta manufakturak arloetan (%16,5).

EUSKAL AE-KO KANPO-MERKATARITZA (datu originalak eta joera)