Euskal AEko industri prezioak mantendu egin dira (%0,0) 2003ko ekainean, EUSTATek landutako datuen arabera. Datu horiek kontuan hartuta, ekaineko urte arteko tasa (azken hamabi hilabeteetan industri prezioek izandako aldakuntza laburbiltzen duena) %0,9 hazi da. Beste alde batetik, urteko lehen sei hileko bilakaera %0,3 hazi da, aurreko abenduaren aldean.

Sektorekako azterketa xehatuak agerian uzten du, ekainean, honako hauek izan direla inflazionistenak aurreko hilaren aldean: petrolioa fintzea (%2,7), garraio-materiala (%0,4), ez-metalezko industria (%0,2) eta makineria (%0,2) sektoreak. Industri prezioetako hileko jaitsierarik handienak, aitzitik, honako sektore hauei dagozkie: larruaren eta oinetakoen industria (%-2,5), energia elektrikoa, gasa eta ura (%-1,2), metalezko eta ez-metalezko meak (%-0,8), kautxua eta plastikoa (%-0,6) eta kimika--industria (%-0,5) sektoreei.

2002ko ekainaren eta 2003ko ekainaren bitarteko epean, prezio-hazkunderik handienak honako sektore hauei egokitu zaizkie: metalezko eta ez-metalezko meak (%6,5), ez-metalezko industria (%3,1), elikagai-industria (%3,0) eta garraio-materiala (%2,9) sektoreei. Kontrako noranzkoan, urte arteko tasa negatiboak izan dituzte energia elektrikoa, gasa eta ura (%-6,3) eta petrolioa fintzea (%-1,0) sektoreetako prezioek.

Ondasunen helburu ekonomikoaren araberako sailkapenari jarraituz, ekainean, aurreko hilaren aldean, hirurek izan dituzte balio oso antzekoak: bitarteko ondasunak mantendu egin dira (%0,0), kontsumo-ondasunak %0,1 igo dira eta ekipo-ondasunak %0,2.

Hiru ondasun-taldeen bilakaerak alde nabarmenak erakusten ditu bakoitzaren urte arteko bilakaeran (2003ko ekaina, 2002ko ekainaren aldean): kontsumo-ondasunen eta ekipo-ondasunen prezioak %2,3 eta %1,7 igo dira, hurrenez hurren; eta bitarteko ondasunenak, berriz, %0,1 igo dira aldi honetan.