2003ko abuztuan, EUSTATek eskainitako datuen arabera, %3,1eko urte arteko gehikuntza nominala izan zuten Euskal AEko azalera handietan egindako salmentek, aurreko urteko hil beraren aldean. Behin prezioen eragin inflazionista kenduz gero, joan den abuztuko urte arteko tasa %0,1ko beherapena izan zen, hazkunde errealeko baliotan.

Merkataritza-sektore horretako salmentek %4,2ko hazkunde nominalak izan zituzten Gipuzkoan, %3,1ekoak Bizkaian, eta %1,1ekoak Araban. Zifra horiek balio errealetara ekarrita, Gipuzkoako azalera handiek %0,9 gehitu zituzten salmentak; baina Bizkaikoek (%-0,1) eta Arabakoek (%-2,0) gutxitu egin zituzten.

Elikadura-produktuen salmentek %3,4ko urte arteko gehikuntza nominala izan zuten 2003ko abuztuan Euskal AEn; gainerako salgaiek, berriz, igoera txikixeagoa izan zuten, %2,7koa. Balio errealetan (prezioen igoeraren eragina deskontatuta), elikadura-produktuen salmentak %0,4 jaitsi ziren; gainerako produktuetan, berriz, %0,7 igo ziren salmentak.

Euskal AEko hiru lurraldeetan, urte arteko bilakaera desberdina izan zuten elikadura-produktuen salmentek, balio errealetan: Bizkaian ez dira apenas aldatu, baina aldakuntza-tasa negatiboak izan dira Araban (%-2,2) eta Gipuzkoan (%-0,3).

Gainerako produktuen salmenten bilakaerari dagokionez ere, urte arteko bilakaera desberdina izan zuten hiru herrialdeetan. Hartara, 3,3 hazi ziren Gipuzkoan, Bizkaian ez ziren aldatu (%0,0) eta %1,5 jaitsi ziren Araban, balio konstanteetan neurtuta.

Euskal AEko azalera handietako establezimenduetako enplegatuak %0,4 gehitu ziren 2003ko abuztuan, aurreko uztailaren aldean; eta %0,8, aurreko urteko abuztuaren aldean. Joan zen abendutik, enpleguaren bilakaerak aldakuntza positibo hauek metatu ditu azken zortzi hilabeteotan: Gipuzkoan %1,7, Bizkaian %0,8, Araban %0,7 eta ondorioz, Euskal AEn %1,0.