Euskal AEko industri prezioak %0,4 goratu dira 2003ko abuztuan, EUSTATek landutako datuen arabera. Datu horiek kontuan hartuta, abuztuko urte arteko tasa (azken hamabi hilabetean industri prezioek izandako aldakuntza laburbiltzen duena) %1,4 hazi da. Beste alde batetik, urteko lehen zortzi hilabeteko bilakaerak %1,0ko handitzea dakar, aurreko abenduaren gainean.

Sektoreka xehe-xehe aztertzeak agerian uzten du, abuztuan, petrolioa fintzea (%2,9) energia elektrikoa, gasa eta ura (%1,4), papera, argitalpena eta arte grafikoak (%0,5), eta ez-metalezko industria (%0,3) sektoreek gehitu dituztela gehien prezioak, aurreko hilaren aldean. Hileko jaitsierarik nabarmenenak, aitzitik, honako sektore hauei dagozkie: metalezko eta ez-metalezko meak (%-1,4), kautxua eta plastikoa (%-1,2), garraio-materiala (%-0,6) eta larruaren eta oinetakoen industria (%-0,3).

2002ko abuztuaren eta 2003ko abuztuaren urte arteko epean, prezio-hazkunderik handienak metalezko eta ez-metalezko meak (%4,2), petrolioa fintzea (%2,8), ez-metalezko industria (%2,6), elikagai-industria (%2,6) eta makineria (%2,0) sektoreenak izan dira. Kontrako noranzkoan, urte arteko hazkunde-tasa negatiboak izan dituzte eta kautxua eta plastikoa (%-1,3), energia elektrikoa, gasa eta ura (%-0,6), kimika-industria (%-0,5) eta ehungintza eta jantzigintza (%-0,4) sektoreetako prezioek.

Ondasunek helburu ekonomikoaren arabera duten sailkapenari jarraituz, prezioek abuztuan aldakuntza hau izan dute, aurreko hilaren aldean: bitarteko ondasunenak %0,6 handitu dira, eta ekipo-ondasunenak eta kontsumo-ondasunenak, %0,1 handitu dira.

Hiru ondasun-talde horietako prezioen bilakaerek alde nabarmenagoak markatu dituzte urte arteko aldian (2003ko abuztua, 2002ko abuztuaren aldean): prezio-igoerarik handiena kontsumo-ondasunetan (%2,0) gertatu da; ondoren, ekipo-ondasunetan (%1,6); eta bitarteko ondasunetako prezioek aldakuntza txikiagoa (%1,1) izan dute.