2004ko apirilean, EUSTATek eskainitako datuen arabera, %7,0ko urte arteko gehikuntza nominala izan zuten Euskal AEko azalera handietan egindako salmentek, aurreko urteko hil beraren aldean. Behin prezioen eragin inflazionista kenduz gero, 2004ko apirileko urte arteko bilakaera %3,9ko tasa errealean estimatu zen.

Merkataritza-arloko salmentek %8,3ko hazkunde nominala izan zuten Gipuzkoan, %7,3koa Bizkaian, eta %3,3koa Araban. Salmenta nominalen zifra horiek balio errealetara ekarrita, Gipuzkoako azalera handietako salmentek %5,2ko urte arteko gehikuntza erreala izan zuten; Bizkaikoek %4,2koa eta Arabakoek %0,3koa.

Jateko produktuen salmentek, Euskal AEn, %7,6ko urte arteko gehikuntza nominala izan zuten 2004ko apirilean; eta gainerako salgaienak %6,1ekoa. Balio errealetan (prezioen igoeraren eragina deskontatuta), jateko produktuen salmentak %2,9 hazi ziren, eta gainerako produktuenak, %4,5 .

Lurraldeka, balio errealetan, aldeak izan zituen jateko produktuen salmenten bilakaerak. Izan ere, Bizkaiko %3,1 eta Gipuzkoako %2,6 arteko gehikuntzak izan ziren, eta Araba %2,7ko hazkundearekin, bien artean kokatu zen.

Hala ere, gainerako produktuen urte arteko salmenten bilakaerek alde handiagoak izan zituzten: nabarmenak izan ziren produktu horiek Gipuzkoan (%8,9) eta Bizkaian (%5,1) izan zituzten hazkunde errealak, baina Araban, aldiz, urte arteko %4,2ko jaitsiera izan zen. Izan ere, urte honen hasieratik, produktu horien salmentak azalera handien sektoretik zentro berezituetara pasa ziren eta badirudi horixe izan zela Arabako jaitsieraren arrazoia.

2004ko apirilean, Euskal AEko azalera handietako establezimenduetako enplegatuak %1,2 gehitu ziren joan den martxoaren aldean; %2,1, aurreko urteko hil beraren aldean; eta azkenik, %1,4ko aldakuntza izan zuten urteko lehenengo lau hilabeteetan, aurreko urteko aldi beraren aldean (tasa metatua).