2005eko urtarrilean, EUSTATek eskainitako datuen arabera, %3,7ko urte arteko jaitsiera nominala izan zuten Euskal AEko azalera handietan egindako salmentek, aurreko urteko hil beraren aldean. Beste faktore batzuen artean, jaitsiera horren arrazoietako bat egutegiaren eragina izan zen, 2005eko urtarrilak 2004koak baino ostiral bat eta larunbat bat gutxiago izan baitzituen. Prezioen inflazio-eragina kenduta, joan den urtarrileko urte arteko tasa %6,4ko jaitsieran estimatu da, prezio finkotan.

Merkataritza-sektorearen salmentek jaitsiera nominalak izan zituzten hiru lurraldeetan: Araban %0,4 jaitsi ziren, Bizkaian %3,8 eta Gipuzkoan, %5,4. Salmenta nominalen zifra horiek balio errealetara ekarrita, Arabako azalera handietan %3,2 jaitsi ziren salmentak; Bizkaikoetan %6,4 eta Gipuzkoakoetan %8,0.

Jateko produktuen salmentek, Euskal AEn, %2,2ko urte arteko jaitsiera nominala izan zuten 2005eko urtarrilean; eta gainerako salgaiek %5,4koa. Balio errealetan (prezioen igoeraren eragina deskontatuta), jateko produktuen salmentak %5,5 jaitsi ziren; gainerako produktuenak, berriz, %7,5.

Lurraldeka, jateko produktuen salmenten bilakaera guztiak negatiboak izan ziren balio errealetan, baina indar desberdinekin: %4,1 jaitsi ziren Araban, %5,3 Bizkaian eta %6,4 Gipuzkoan. Ehuneko horiek guztiak, aurreko urteko hil beraren aldean.

Gainerako produktuen salmenten bilakaerari dagokionez ere, lurralde batetik bestera aldeak nabari dira aldakuntza-tasetan: %2,2ko jaitsiera Araban, %7,5ekoa Bizkaian eta %11,5ekoa Gipuzkoan, balio konstantetan neurtuta.

Euskal AEko azalera handietako establezimenduetako enplegatuak %2,6 gehitu ziren 2005eko urtarrilean, aurreko urteko hil beraren aldean.