2005eko otsailean, EUSTATek eskainitako datuen arabera, %8,5eko urte arteko hazkunde nominala izan zuten Euskal AEko azalera handietako salmentek, aurreko urteko hil beraren aldean. Behin prezioen eragin inflazionista kenduz gero, joan den otsaileko urte arteko tasa %5,1eko gehikuntza izan zen, prezio finkotan.

Merkataritza-sektoreko salmentek hazkunde nominalak izan zituzten hiru lurraldeetan: %11,5 igo ziren Araban, %10,6 Gipuzkoan, eta %6,4 Bizkaian. Salmenta nominalen zifra horiek balio errealetara ekarrita, Arabako azalera handietako salmentak %8,0 gehitu ziren, Gipuzkoakoak %7,1 eta Arabakoak %3,1.

Azalera Handietako Merkataritzaren Indizea, lurralde historikoka. Balio errealak.

Iturria: EUSTAT

Jateko produktuen salmentek, Euskal AEn, %7,4ko urte arteko hazkunde nominala izan zuten 2005eko otsailean; eta gainerako salgaiek %10,1ekoa. Balio errealetan (prezioen igoeraren eragina deskontatuta), jateko produktuen salmentak %3,3 igo ziren; gainerako produktuenak, berriz, %7,3.

Jateko produktuen salmentek lurraldez lurralde izan zituzten bilakaerak positiboak izan ziren urte arteko balio errealetan, baina indar desberdinekoak: %4,6 hazi ziren Araban, %3,8 Gipuzkoan, eta %2,5 Bizkaian.

Gainerako produktuen salmenten bilakaerari erreparatuta, lurralde batetik bestera aldeak nabariagoak izan ziren aldakuntza-tasetan, guztiak positiboak izan arren: %12,9 igo ziren Gipuzkoan, %12,7 Araban, eta %3,6 Bizkaian, balio konstanteetan neurtuta.

Euskal AEko azalera handietako establezimenduetako enplegatuak %3,7 gehitu ziren 2005eko otsailean, aurreko urteko hil beraren aldean; eta %3,2, urteko lehenengo bi hiletan, aurreko urteko aldi berarekin alderatuta.