2004ko laugarren hiruhilekoan, Barne Merkataritzaren Indizeak %9,7ko urte arteko gehikuntza nominala izan zuen, aurreko urteko aldi beraren aldean, EUSTATek landu dituen datuen arabera. Prezioen igoeraren eragina kenduta, merkataritzasektoreko salmenten hazkunde erreala %2,2an estimatu zen, 2004ko laugarren hiruhilekoan.

Laugarren hiruhileko horretan handizkako sektorean %11,3 igo ziren urte arteko salmentak, eta txikizkakoan, ehuneko txikiagoan, %6,8 igo baitziren.

Handizkako sektorean, izandako hazkundeagatik nabarmendu ziren produktu erdilanduak eta txatarra (%24,0) eta neurri txikiagoan bada ere, makineria eta tresneria (%6,4) alorren salmenta nominalak. Nekazaritza-gaiak eta elikagaiak alorrak hazkunde-tasa neurritsuagoa lortu zuen (%4,1) eta elikaduraz besteko kontsumo-gaiek aurreko urteko zifra bertsuak lortu zituzten (%0,3).

Ohiko txikizkako merkataritzan, pertsonen hornikuntza (%13,0) eta bestelako kontsumo-gaiak (%8,9) nabarmendu ziren izandako hazkundeengatik; etxearen hornikuntza (%4,9) eta elikagaiak (%1,3) atalek ere urte arteko bilakaera positiboak izan zituzten, baina neurritsuagoak.

Urteko laugarren hiruhilekoan, azalera ertain eta handietako txikizkako merkataritzaren salmentak balio nominaletan %3,4 igo ziren. Igoera elikagaien salmentek (%4,2) eragin zuten, gainerako produktuenak apur bat jaitsi baitziren (%-0,9).

2004 osotara hartuta, Barne Merkataritzako salmenten Indizeak %8,0ko hazkunde nominala izan zuen, aurreko urtearen aldean: handizkako merkataritza %9,4 hazi zen eta txikizkakoa % 5,3.

Prezioen igoeraren eragina kendu eta zifra nominalak euro finko bihurtuz gero, Barne Merkataritzako Indizea %2,7 hazi zen 2004an: handizkako merkataritzan salmentak %1,9 gehitu ziren, eta txikizkakoan, %4,2; handizkako merkataritzak produktuen prezioak gehiago igo zituelako txikizkakoak baino.

Laugarren hiruhilekoan, Barne Merkataritzaren Indizeak aldakuntza nominal positiboak izan zituen hiru lurraldeetan: %5,0 hazi zen Araban, %8,7 Gipuzkoan eta %11,6 Bizkaian. Urtea osotara hartuta, Arabako indizea %2,8an kokatu zen, Gipuzkoakoa %8,2an eta Bizkaikoa %9,4an, balio nominaletan.

2004ko laugarren hiruhilekoan, Euskal AEko merkataritza-sektoreko enplegatuak %2,6 gehitu ziren aurrekoaren aldean: %2,0 gehitu ziren handizkako sektorean eta %2,9 txikizkakoan. 2004ko lau hiruhilekoen batez bestekoan, langileak %1,6 gehitu ziren: %1,1 handizkako merkataritzan eta %2,0 txikizkakoan.