2005eko uztailean, EUSTATek eskainitako datuen arabera, %0,4ko urte arteko murrizte nominala izan zuten Euskal AEko azalera handietan egindako salmentek, aurreko urteko hil beraren aldean. Behin prezioen eragin inflazionista kenduta, joan den uztaileko urte arteko tasa %3,4ko gutxitzean estimatu zen, euro finkotan.

Merkataritzako azpisektore horretako salmentek hazkunde nominalak izan zituzten Euskal AEko bi lurraldetan: %2,3 hazi ziren Gipuzkoan eta %1,7 Araban, baina %2,6 jaitsi Bizkaian. Salmenta nominalen zifra horiek termino errealetara itzulita, azalera handiek aldakuntza negatiboak izan zituzten hiru lurraldeetan: Araban %-1,4, Bizkaian %-5,6 eta Gipuzkoan, %-0,8; guztietan murriztu baitziren salmentak balio errealetan.

Jateko produktuen salmentek, Euskal AEn, %1,5eko urte arteko gehikuntza nominala izan zuten 2005eko uztailean; baina gainerako salgaienak %2,9ko murrizteka izan zuten. Balio errealetan (prezioen igoeraren eragina deskontatuta), jateko produktuen salmentak %1,8 jaitsi ziren eta gainerako produktuenak %5,6.

Jateko produktuen salmenten bilakaerak negatiboak izan ziren hiru lurraldeetan, urte arteko balio errealetan: %1,2 murriztu ziren Araban, %2,2 Bizkaian eta %1,5 Gipuzkoan.

Gainerako produktuen urte arteko salmenten bilakaerei dagokienez, desberdintasunak izan zituzten aldakuntza-tasetan: indarrez jaitsi ziren Bizkaian (%-9,0), neurritsuago Araban (%-1,6), eta apur bat gehitu ziren Gipuzkoan (%0,2%), beti ere, balio finkoetan neurtuta.

2005eko uztailean, Euskal AEko azalera handietako establezimenduetako enplegatuak %0,5 gehitu ziren aurreko ekainaren aldean, %1,2 aurreko urteko hil beraren aldean; eta %2,5, urteko lehenengo zazpi hilabeteetan, aurreko urteko aldi beraren aldean.