EUSTATek eskainitako datuen arabera, 2005eko abuztuan, %4,3ko urte arteko hazkunde nominala izan zuten Euskal AEko azalera handietan egindako salmentek, aurreko urteko hil beraren aldean. Behin prezioen eragin inflazionista kenduz gero, joan den abuztuko urte arteko tasa %1,0ko gehikuntza izan zen, euro finkotan.

Merkataritza-sektoreko salmentek hazkunde nominalak izan zituzten hiru lurraldeetan: %8,9 igo ziren Araban, %4,3 Gipuzkoan, eta %3,0 Bizkaian. Salmenta nominalen zifra horiek balio errealetara ekarrita, azalera handitako salmentek aldakuntza positiboak izan zituzten Araban (%5,5) eta Gipuzkoan (%1,1), baina Bizkaian %0,2 jaitsi ziren.

Jateko produktuen salmentek, Euskal AEn, %5,1eko urte arteko hazkunde nominala izan zuten 2005eko abuztuan; eta gainerako salgaienak, %3,1ekoa. Balio errealetan (prezioen igoeraren eragina deskontatuta), jateko produktuen salmentak %1,6 igo ziren, eta gainerako produktuenak, %0,2.

Jateko produktuen salmentek lurraldez lurralde izandako bilakaerek zeinu positiboa izan zuten hiru lurraldeetan, urte arteko balio errealetan: %4,5 gehitu ziren Araban, %1,2 Bizkaian eta %0,8 Gipuzkoan.

Gainerako produktuen urte arteko salmenten bilakaerei dagokienez, desberdintasunak izan zituzten aldakuntza-tasetan: jaitsi egin ziren Bizkaian (%-2,0), neurritsu igo ziren Gipuzkoan (%1,3), eta gehiago igo ziren Araban (%7,0), beti ere, termino finkotan neurtuta.

2005eko abuztuan, Euskal AEko azalera handietako establezimenduetako enplegatuak %3,7 gutxitu ziren aurreko uztailaren aldean, %0,7 gehitu ziren aurreko urteko hil beraren aldean; eta %2,3 gehitu ziren, urteko lehenengo zortzi hilabeteetan, aurreko urteko aldi berdinaren aldean.