EUSTATek egin duen Azalera Handietako Merkataritzaren Indize berriaren datuen arabera, eta lan-egutegi homogeneoari dagokionez, Euskal AEko azalera handietako salmentek urte arteko %8,8ko hazkunde nominala izan zuten 2005eko azaroan. Prezioen eragin inflazionista kenduta, azaroko urte arteko tasa %5,5eko gehitzean estimatu zen, euro konstanteetan. Kontuan hartu behar da, azken bi urteetan hiru lurralde historikoetan ireki diren establezimendu berriek eragina dutela gehitze horietan.

2005eko azaroan, urte bereko urriaren aldean, desestazionalizatutako hileko datuek hil arteko %0,3ko beherakada izan zuten uneko terminoetan, eta %0,8koa prezio finkoetan.

Salmentek hazkunde nominalak izan zituzten hiru lurraldeetan: %5,3 igo ziren Araban, %12,4 Bizkaian, eta %3,5 Gipuzkoan. Termino errealetan, azalera handiek ere urte arteko aldaketa positiboak izan zituzten hiru lurraldeetan: Araban %2,1ekoa, Bizkaian %9,1ekoa eta Gipuzkoan %0,3koa.

Jateko produktuen salmentek, Euskal AEn, %1,8ko urte arteko hazkunde nominala izan zuten 2005eko azaroan; eta gainerako salgaiek %12,7koa. Termino errealetan, jateko produktuen salmentak %1,8 jaitsi ziren eta gainerako produktuenak, aldiz, %9,7 igo ziren.

Arabako azalera handietako salmentek hil arteko %3,3ko jaitsiera izan zuten (2005eko azaroa urriarekin erkatuta) uneko prezioetan, eta %3,4koa termino konstanteetan.

Azaroan, Bizkaiko azalera handien salmentak, uneko terminotan, mantendu egin ziren aurreko urriaren aldean; termino finkoetan, berriz, %0,7 jaitsi ziren hil arteko aldi berean.

Azaroko hil arteko hazkunde nominala %0,8koa izan zen Gipuzkoako azalera handietako salmentei dagokienez, euro finkotan %0,7 gehitu ziren.

Azalera handietako establezimenduetako langile kopurua %2,0 murriztu zen 2005eko azaroan (urriarekin alderatuta); %2,0ko aldakuntza positiboa izan zen Araban, baina negatiboak Bizkaian eta Gipuzkoan, %3,4koa eta %0,1ekoa, hurrenez hurren.

Oharra: 2005eko urritik, Azalera Handietako Merkataritzaren Indizea 2004ko oinarri berriarekin eta 2002ko oinarriarekin lotuta egin da. Oinarria aldatzean, besteak beste, informazioa ematen zuen enpresa kopurua gehitu egin da; izan ere, Euskal AEn saltzeko gutxienez 2.500 metro koadroko azalera baino handiagoko establezimendua duten enpresa guztiak sartu dira, enpresa horien jarduerak EJSN-52 delakoan kokatzen badira, hau da, txikizkako merkataritza espezializatuan edo ez-espezializatuan.

Eurostat-ek “Methodology of Short-term Business Statistics. Interpretation and Guideliness. 2002 edition” delako agirian egindako gomendioak jarraituz, EUSTATek 2005eko urritik aurrera, AHMIrako, egutegiaren ondorioak zuzenduta dituen serieak erabiltzen ditu urte arteko hazkunde-tasetarako (m/m-12) eta tasa metatuetarako (At/At-1); ildo berean, serie desestazionalizatuak erabiltzen ditu hil arteko tasetarako (m/m-1), uneko terminoetan eta termino konstanteetan.

Datu gordinak eta horri lotutako serieak erabiltzaileen eskura daude EUSTATen web gunean eta datu-bankuan.