Euskal AEko biztanleen ia %20, 5. mota bezala definitzen diren zentsu ataletan bizi da. Hain zuzen, atal horiek ondoko ezaugarriak izaten dituzte: biztanle gehienak euskaldunak dira, industria da horien jarduera nagusia eta lanbide prestakuntza ertaina-baxua da. Aitzitik, soilik euskal herritarren %1,5 bizi da 9. motako zentsu ataletan, hau da, nekazariak eta euskara ez dakiten pertsonak nagusi diren ataletan.

Datu horiek guztiak EUSTATek duela gutxi argitaratutako liburu batean jasotzen dira; liburu horretan zentsu atalak aztertzen dira, betiere Biztanleria eta Etxebizitza Zentsuko informazioa oinarritzat hartuta.

Abiapuntutzat hartzen den informazioa zentsu atalak eta horien egoiliarrei buruzko ezaugarriak dira, gero datuak laburtu eta sailkatzeko teknikak aplikatzen dira. Hona hemen informazio hori laburtzeko erabiltzen diren faktore nagusienak: hizkuntza, etxebizitzaren ezaugarriak, heziketaren eta lanbide prestakuntzaren maila eta landa-hiri ingurunea.

Aurreko azterketetan bezala, azterketaren helburua Euskal AEko zentsu atalak ezaugarri berberen arabera biltzea da, euren artean batu eta besteengandik bereiztu egiten dituzten horien arabera, hain zuzen ere. Azterketa honen azken helburua zentsu atalen ezaugarri sozio-demografiakoen adierazle sintetikoa eskaintzea da.

Atalek ezaugarri edo faktore batzuk dituzte, eta horien arabera 9 motatan bil daitezke. Mota bakoitzean ezaugarri komunak dituzten eta, beraz, beste atalengandik bereizten dituzten ezaugarriak hartzen dira. Lortutako motak honela azal daitezke:

- 1. mota. Biztanle gehienak ez dira euskaldunak, ikasketa-maila baxuena dute eta 60. hamarkadako etxebizitzetan bizi da (Euskal AEko biztanleen %18 ezaugarri hauek nabarmentzen dituzten zentsu ataletan bizi da).

- 2. mota. Biztanle gehienak oso gazteak dira eta familia-nukleoetan bizi dira (biztanleen %6,5).

- 3. mota. Biztanle gehienak ez dira euskaldunak eta 70. hamarkadako tamaina ertaineko etxebizitzetan bizi dira (biztanleen %14).

- 4. mota. Biztanle gehienak ez dira euskaldunak, 50. eta 60. hamarkadako etxebizitzetan bizi dira eta oinarrizko ikasketak dituzte (biztanleen %13).

- 5. mota. Biztanle gehienak euskaldunak dira, industria da jarduera nagusia eta euron prestakuntza ertaina-baxua da (ia biztanleen %20, zabalduena).

- 6. mota. Biztanle gehienek unibertsitateko ikasketak dituzte, gazteak dira eta familia-nukleoetan bizi dira (biztanleen %14).

- 7. mota. Biztanleak helduak dira, ikasketa-maila eta lanbide prestakuntza altuak dira eta 1940. urtea baino lehen eraikitako etxebizitzetan bizi dira (biztanleen %11).

- 8. mota. Biztanle gehienak euskaldunak dira eta jarduera ia nagusiena nekazaritza da (biztanleen %3).

- 9. mota. Biztanle gehienek ez dira euskaldunak eta nekazariak dira (biztanleen %1,5).

Argitalpenean, gainera, Euskal AEko 15.000 biztanleko edo gehiagoko udalerrien planimetria ere jasotzen da, atal motetan banatuta. Euskal AEko hiru hiriburuek heterogeneotasuna erakusten dute, baina udalerri batzuetan biztanleak soilik bi ataletan bizi dira. Adibidez, Bermeoko biztanleak atal mota bitan banatzen dira: 5. motako atalean (biztanle gehienak euskaldunak dira, industria da jarduera nagusia eta euron prestakuntza ertaina-baxua da) eta 8. motako atalean (hau da, biztanle gehienak euskaldunak dira eta jarduera ia nagusiena nekazaritza da).

Gernika-Lumo eta Zarautz udalerrietako biztanleak ere zentsu atal bitan bakarrik banatzen dira.

Azterketa honetan, Euskal AEko familia-etxebizitza nagusienetan bizi diren pertsonen banakako ezaugarriak jasotzen dira, etxebizitzarekin eta familiarekin lotutako ezaugarri batzuk ere emanez.