EUSTATen datuen arabera, Euskal Autonomia Erkidegoko industriako prezioek %0,7ko hazkundea izan dute 2006ko martxoan. Datu horien arabera, gainera, azken hamabi hilabeteetako industriako prezioen aldaketa jaso duen martxoko urte arteko tasak %3,9ko hazkundea izan du. Industriako prezioak %2,2 gehitu dira 2006ko lehenengo hiruhilekoan, 2005eko abenduaren aldean.

(*) 2006ko martxoko urte arteko hazkundea

Sektore-azterketa xehekatuenak erakutsi bezala 2006ko martxoan, eta aurreko hilabetearen aldean, hauexek izan dira inflazio handiena izan duten adarrak: “petrolioaren birfinketa” (%2,6), “metalurgia eta gai metalikoak” (%1,2), “energia elektrikoa, gasa eta ura” (%0,9), “industria kimikoa” (%0,9) eta “larruaren eta oinetakoen industria” (%0,8). Aitzitik, prezioetan beherakadak izan dituzten sektoreak hauexek izan dira: “mineral metalikoak eta ez-metalikoak” (%-3,1), “garraio-materiala” (%-0,6), “beste manufaktura batzuk” (%-0,2) eta “elikaduraren industria” (%-0,1).

2005eko martxotik 2006ko martxora arteko aldian, prezioen hazkunderik handienak ondoko adarretan eman dira: “petrolioaren birfinketa” (%17,9), “energia elektrikoa, gasa eta ura” (%15,9), “larruaren eta oinetakoen industria” (%3,2), “papera, edizioa eta arte grafikoak” (%3,2) eta “ehungintza eta joskintza” (%3,1). Baina prezioen beherapenak edo hazkunde txikiagoak izan dituzte ondoko sektoreek: ”garraio-materiala” (%-3,3), “mineral metalikoak eta ez-metalikoak” (%-1,8), “material elektrikoa” (%0,5), “beste manufaktura batzuk” (%1,0) eta “zuraren industria” (%1,1).

Xede ekonomikoaren araberako ondasunen sailkapenari jarraituz, sektore garrantzitsuenen prezioek martxoan izan duten bilakaerak gorako joera izan du hiru adarretan: ekipamenduko ondasunen prezioak %0,1 igo dira, tarteko ondasunenak %0,9 eta energiarenak %2,1. Hala ere, kontsumo-ondasunen prezioek martxoan bilakaera negatiboa izan dute (%-0,1), aldaketa-tasa negatibo horrek eragina izan du, gainera, kontsumo-ondasun iraunkorren prezioetan (%-0,1) eta kontsumo-ondasun ez iraunkorren prezioetan (%-0,1).

Ondasun talde garrantzitsu hauen prezioen bilakaerek urtetik urtera gero eta ezberdintasun nabarmenagoak izan dituzte, baina guztiak positiboak. Energiaren prezioak %17,3 igo dira, tarteko ondasunenak %2,5, ekipamenduko ondasunenak %0,5 eta kontsumo-ondasunenak %2,1. Azken hauen artean, %2,9 igo dira kontsumo-ondasun ez iraunkorren prezioak eta %0,5 kontsumo-ondasun iraunkorren prezioak.