EUSTATen datuen arabera, eta lan-egutegi homogeneoari dagokionez, Euskal Autonomia Erkidegoko azalera handietako salmentek urtetik urtera %7,2ko hazkunde nominala izan zuten 2006ko otsailean. Prezioen eragin inflazionista kenduz gero, otsaileko urtetik urterako tasak %4,3ko gehitzea izan zuen, euro konstanteetan.

Urteko lehenengo bi hilabeteetako salmentak %9,0 hazi ziren urteko prezioetan eta %5,5 prezio konstanteetan.

2006ko otsailean, urte bereko urtarrilaren aldean, desestazionalizatutako hileko datuek hil arteko %2,2ko beherapena izan zuten urteko prezioetan eta %1,7koa prezio konstanteetan.

Jateko produktuen salmentek, Euskal Autonomia Erkidegoan, %2,9ko urte arteko hazkunde nominala izan zuten 2006ko otsailean; eta gainerako salgaiek %9,6ko gehitzea izan zuten. Balio errealetan, elikagaien salmentak %0,7 gutxitu ziren eta gainerako produktuak %7,1 hazi ziren.

Lurraldeak banan-banan aztertuz gero ikusten da soilik Euskal Autonomia Erkidegoko bi lurraldetan izan zutela hazkunde nominala salmentek: Bizkaian salmenta horiek %11,6 hazi ziren eta Araban %5,3, baina Gipuzkoan salmentak %0,7 gutxitu ziren. Datu horiek guztiak 2005eko otsailekoekin alderatutakoak dira betiere. Balio errealetan, aurreko urteko aldi beraren aldean, Bizkaian %9,2 hazi ziren salmentak eta Araban %1,9 baina Gipuzkoan %4,0 gutxitu ziren.

Aurreko hilabetearen aldean, Arabako azalera handietako salmentak hil artean %1,7 gutxitu ziren urteko prezioetan (2006ko urtarriletik 2006ko otsailera) eta gutxitze bera izan zuten salmentek (%1,7) prezio konstanteetan.

Bizkaian, bestalde, salmentak urteko prezioetan %2,6 gutxitu ziren otsailean, aurreko hilabetearen aldean; prezio konstanteetan, gainera, %1,6 gutxitu ziren hil arteko aldi horretan.

Gipuzkoan, azalera handietako salmentek otsailean hil arteko %1,8ko beherapen nominala izan zuten, eta euro konstanteen kasuan %1,9 gutxitu ziren salmenta horiek.

2006ko otsailean, azalera handietako establezimenduetako langileen kopurua %0,7 hazi zen hil artean, urtarrilaren aldean; Araban %0,4ko aldakuntza negatiboa izan zen eta beste bi lurraldeetan positiboa (Bizkaian hil arteko %1,2ko hazkundea eta Gipuzkoan %0,2koa).