EUSTATen datuen arabera, 2004. urtean, Euskal Autonomia Erkidegoko akutuen ospitaleetan (publikoetan eta pribatuetan) guztira 276.728 ospitalizazio izan ziren eta erdia baino zerbait gehiago (142.471) emakumeak izan ziren. Azken bost urteak aintzat hartuta (2000-2004), emakumeen ospitaleetara joateko maiztasun-tasa gehitu egin da: 2000. urtean 1.000 emakumetik 121 joan ziren ospitalera; 2004. urtean, aldiz, tasa hori 132ra igo zen.

2004. urtean ospitalizatzeko arrazoi nagusiena (%17) haurdunaldia, erditzea eta erditze ondokoa izan zen, nahiz eta ezin den berez patologiatzat hartu. Diagnostiko-multzo hori %18,7 gehitu da azken bost urteetan; ondorioz, amatasunaren batez besteko adina 32 urtekoa da eta gero eta beranduago ematen dira haurdunaldi gehienak: 35 eta 44 urte artean (%40) eta 45 eta 54 urte artean (%168). Era berean, azpimarratzekoa da aldi horretan erditze normalak (laguntzarik behar izaten ez dutenak edo laguntza gutxi behar izaten dutenak) behera egin dutela eta haurdunaldi luzeen kasuak eta haurdunaldia zailtzen duten amaren gaixotasunen kopurua (bereziki haurdunaldiko anemia eta glukosarekiko ohikoa ez den tolerantzia) gehitu direla.

Begi-lausoa nerbio-sistemako eta sentimen-organoetako gaixotasunen barruan sartzen da eta, gehienetan, eguneko ospitaleetan tratatzen da; bada, 2004. urtean ospitalera joan ziren emakumeen artean patologia ohikoena izan zen. Emakumeak denbora gehiago bizi izaten direnez, eurak dira patologia hori gehien izaten dutenak; izan ere, azken bost urteetan (2000-2004) %6,6 gehitu da. Batez ere 65 urteko eta gehiagoko emakumeen artean ematen da (2004. urtean 9.871 kasu izan ziren eta horien %88,6 adin-tarte horretako emakumeetan eman zen).

Zirkulazio-sistemako gaixotasunak ohikoenen artean bigarren postuan daude; 75 urteko eta gehiagoko emakumeengan ematen da batez ere, adin-tarte horretakoen ospitalizazioen arrazoi nagusiena baita. Patologiarik ohikoenak barize-zainak (barizeak) eta bihotz-gutxiegitasuna dira, eta azken hau, gainera, emakumeak ospitaleetan hiltzeko arrazoi nagusiena da.

Maiztasuna aintzat hartuta, aipatutakoen ondoren digestio-aparatuko gaixotasunak agertzen dira. Hauen artean maizen ematen direnak besikulako alterazioak (kolelitiasia) eta abdomen-hernia dira, 45 eta 64 urte arteko emakumeengan ematen direnak batez ere. Baina apendizitis akutua ere sarri ematen da, batez ere emakume gazteen artean (15-44 urte).

Aparatu muskular eta eskeletikoko gaixotasunak, oro har, ospitalizazioen laugarren arrazoia dira baina 45-64 urte dituzten emakumeen artean lehenengoa da, osteoartrosia, behatzetako deformazio eskuratua eta belauneko barne-nahastea bezalako patologien ondorioz: 2004. urtean ospitaleetan diagnostikatu ziren gaixotasun osteomuskularren %53 hiru patologia horien ondoriozkoak izan ziren.

Tumoreen multzoa (neoplasiak) ospitalizazioen bosgarren arrazoia bada ere, ospitaleetan hiltzen diren emakumeen artean bigarren arrazoia da. Jarraian, ospitalizatutako emakumeen artean maizen ematen diren tumoreak eta horien hurrenkera ematen dira: bularreko neoplasia gaiztoa, umetokiko fibroma eta kolonaren tumore gaiztoa. Azken tumore honek izan du, gainera, gehikuntzarik handiena azken urteotan (2000-2004).