EUSTATen datuen arabera, Euskal Autonomia Erkidegoko industriako prezioek %0,2ko hazkundea izan zuten 2006ko abuztuan. Datu horien arabera, gainera, azken hamabi hilabeteetako industriako prezioen aldaketa jaso duen abuztuko urte arteko tasak %5,7ko hazkundea izan du. Industriako prezioak %5,2 gehitu dira 2006ko lehenengo zortzi hilabeteetan, 2005eko abenduaren aldean.

Euskal Autonomia Erkidegoko Industriako Prezioen Indizeak izan dituen ehunekoen bilakaera

(*) 2006ko abuztuko urte arteko hazkundea

Iturria: EUSTAT

Sektore-azterketa xehekatuenak erakutsi bezala 2006ko abuztuan, eta aurreko hilabetearen aldean, hauexek izan dira inflazio handiena izan duten arloak: “Ehungintza eta jantzigintza” (%4,2), “energia elektrikoa, gasa eta ura” (%3,0), “metalurgia eta gai metalikoak” (%0,7) eta “papera, argitalpenak eta arte grafikoak” (%0,5). Aitzitik, prezioetan beherakadak izan dituzten sektoreak hauexek izan dira: “petrolioaren birfinketa” (-%2,2), “mineral metalikoak eta ez-metalikoak” (-%1,6) eta “zuraren industria” (-%0,1).

2005eko abuztutik 2006ko abuztura arteko aldian, prezioen hazkunderik handienak ondoko adarretan eman dira: “Energia elektrikoa, gasa eta ura” (%22,9), “metalurgia eta gai metalikoak” (%10,0), “ehungintza eta jantzigintza” (%7,2), “petrolioaren birfinketa” (%5,6) eta “papera, argitalpenak eta arte grafikoak” (%5,0). Baina prezioen beherapenak edo hazkunde txikiagoak izan dituzte ondoko sektoreek: “garraio-materiala” (-%2,6), “material elektrikoa” (%0,3), “zuraren industria” (%0,9) eta “beste manufaktura batzuk” (%1,3).

Xede ekonomikoaren araberako ondasunen sailkapenari jarraituz, sektore garrantzitsuenen prezioek abuztuan izan duten bilakaerak gorako joera izan du, aurreko hilabetearen aldean; salbuespen bakarra energiaren prezioak izan dira, %0,7 jaitsi baitira. Tarteko ondasunen prezioak %0,6 igo dira, ekipamenduko ondasunenak %0,1 igo dira eta kontsumo-ondasunen prezioak %0,2 igo dira. Hain zuzen, azken hauen igoera kontsumo-ondasun ez iraunkorren hazkundeak eragin du (%0,4); kontsumo-ondasun iraunkorrek ordea ez dute aldaketarik izan abuztuan (%0,0).

Ondasun talde garrantzitsu hauen prezioen bilakaerek urtetik urtera gero eta ezberdintasun nabarmenagoak izan dituzte, baina denak positiboak. Energiaren prezioak %10,4 igo dira, tarteko ondasunenak %7,6, ekipamenduko ondasunenak %1,0 eta kontsumo-ondasunenak %3,0. Azken hauen artean, %4,3 igo dira kontsumo-ondasun ez iraunkorren prezioak eta %0,5 kontsumo-ondasun iraunkorren prezioak.

Iturria: EUSTAT