EUSTATen datuen arabera, eta lan-egutegi homogeneoari dagokionez, Euskal Autonomia Erkidegoko azalera handietako salmentek urtetik urtera %6,2ko hazkunde nominala izan dute 2006ko abuztuan. Prezioen eragin inflazionista kenduz gero, abuztuko urtetik urterako tasak %2,8ko gehitzea izan zuen, euro konstanteetan.

Urteko lehenengo zortzi hilabeteetako salmentak %5,5 gehitu dira urteko prezioetan, eta %2,0 prezio konstanteetan.

2006ko abuztuan, urte bereko uztailaren aldean, desestazionalizatutako hileko datuek hil arteko %5,4ko gehikuntza izan dute urteko prezioetan eta %5,1eko gehikuntza prezio konstanteetan.

Jateko produktuen salmentek, %6,8ko urte arteko hazkunde nominala izan zuten 2006ko abuztuan; eta gainerako salgaiek %5,9koa. Termino errealetan, elikagaien salmentak %2,6 gehitu ziren eta gainerako produktuak %2,8.

Azalera handietako merkataritzaren indizea, lurralde historikoaren arabera. Prezio konstanteak. Egutegiaren ondorioen datu zuzenduak.

Iturria: EUSTAT

Lurraldeak banan-banan aztertuz gero ikusten da Euskal Autonomia Erkidegoko hiru lurraldeetan izan zutela hazkunde nominala salmentek: Araban salmenta horiek %10,6 gehitu ziren, Bizkaian %6,9 eta Gipuzkoan %2,9. Datu horiek guztiak 2005eko abuztukoekin alderatutakoak dira betiere. Balio errealetan, aurreko urteko hilabete beraren aldean, Araban %7,1 gehitu ziren salmentak, Bizkaian %3,6 gehitu ziren eta Gipuzkoan %0,8 murriztu ziren.

Aurreko hilabetearen aldean, Arabako azalera handietako salmentak hil artean (2006ko uztailetik 2006ko abuztura) %6,6 gehitu dira urteko prezioetan eta %6,9 prezio konstanteetan.

Bizkaian, bestalde, salmentak urteko prezioetan %6,7 gehitu ziren abuztuan, uztailaren aldean; eta prezio konstanteetan %6,5 gehitu ziren hil arteko aldi horretan.

Gipuzkoan, azalera handietako salmentek hil arteko %1,9ko hazkunde nominala izan dute abuztuan, eta euro konstanteen kasuan %1,1 gehitu dira salmenta horiek.

2006ko abuztuan, uztailaren aldean, azalera handietako establezimenduetako langileen kopurua %0,3 gehitu zen; kopuru hori positiboa izan zen Gipuzkoan (%1,8) eta Bizkaian (%0,3), baina Araban %1,8 gutxitu zen.