Euskal AE jaiotzerik gutxien duten 25-EBko herrialdeen artean dago, Eustaten 2004ko datuen arabera, urte horretakoak baitira azken datu eskuragarriak.

1.000 biztanleko 9,3 jaiotze ditugu; 25-EBko batez bestekoa 10,5 da. Polonia gu bezalaxe dabil, eta azpitik Eslovenia (9,0), Lituania (8,9), Letonia (8,8) eta Alemania (8,6).

Espainiako jaiotze-tasa 1.000 biztanleko 10,6 da.

Oraingo datuak 1975ekoekin alderatuz gero azken 30 urteetako errotiko aldaketa ikusten da, orduan gurean 1.000ko 19,1 baitzen batez bestekoa. Urte hartan Espainian 18,8koa zen eta 25-EB osatzen dutenen artean adierazle hau 14,4 zen, beraz, urteen arteko (1975-2004) aldea gurean bezain nabarmena ez da, inondik ere.

Jaiotzeak eta heriotzak, 1.000 biztanleko, 25-EBn.

Iturria: Eustat eta Eurostat

Heriotzen gainean, 1975ean 1.000 biztanleko 7,1 zen gurean, eta 2004an 8,9 Espainian, data horietantxe, 8,4 eta 8,7 ziren. 25-EBko datuak ikusiz gero, 1975ean 1.000ko 10,7 heriotza ziren, eta 9,5 2004an.

Bizi-itxaropena da, baita ere, adierazle demografiko jakingarria. 2005eko datuen arabera Euskal AEn 77,3 urte ziren gizonentzat eta 84,8 emakumeentzat, azken hau EBko altuena delarik. Espainian 77,4 gizonentzat eta 83,9 emakumeentzat. 25-EBko datuak 75,8 gizonak eta 81,9 urte emakumeak dira, gureen azpitik.

Azkenik, nabarmentzekoa ere bada ezen Euskal AEk zuela 2005ean 65 urte edo gehiagoko biztanleriaren portzentajerik altuena (%18,4) 25-EBko herrialde guztien artean, eta gainera 14 urte edo gutxiagoko portzentajerik txikiena (%12,2). Ehuneko horiek % 16,8 eta % 14,5 ziren Espainian. 1995. urtea erreferentzia hartuta, 65 urte edo gehiagokoak %15,1 eta 14 urte edo gutxiagokoak %13,3 ziren Euskal AEn eta Espainian %15,2 eta %16,9.