Euskal Autonomia Erkidegoa EB-27n jaiotzarik gutxien duten herrien artean dago kokatuta Eustatek lurralde esparru horiei dagokienez eskura dituen datuen arabera. Gure Erkidegoan 9,5 jaiotza daude 1.000 biztanleko eta horrek esan nahi du EB-27ko batez bestekoaren azpitik dagoela, eremu horretan 10,6 jaiotza daudelako 1.000 biztanleko. Italian gurea bezalakoa dute (9,5) eta bakarrik gainditzen ditugu Austria eta Eslovenia (9,4 bakoitzak), Lituania (9,2) eta Alemaniakoak (8,2). Espainian jaiotza-tasa hori 10,8koa da 1.000 biztanleko.

Jaiotzak eta heriotzak (1.000 bizt.) EB-27n

Iturria: Eustat eta Eurostat

Datu hauek eta 1975 urtekoak erkatzen badira azken hamarkadetan gertatu den goitik beherako aldaketa antzematen da, urte horretan Euskal AEn 19,1 jaiotza egon zirelako 1.000 biztanleko. Orduan Espainian zenbatekoa 18,8koa izan zen eta gaur egun EB-27 eratzen duten herrien batez bestekoa adierazle honi dagokionez orduan 14,7 jaiotzakoa zen. Ondorioz, bi urte horien arteko aldea (1975-2006) askoz ere lausoagoa izan da gure Erkidegoan.

Heriotzei dagokienez Euskal AEk 7,1 heriotza zituen 1.000 biztanleko 1975ean eta 2006an hori 8,7 heriotzakoa zen. Espainian, urte horietan, 8,4 heriotzakoak ziren. EB-27ko datuak aztertzen badira 1975ean batez bestekoa 10,7 heriotzakoa zen 1.000 biztanleko, eta 2006an, ordea, 9,5 heriotzakoa.

Halaber interesgarria izan daiteke azpimarratzea Euskal AEn 2006 urtean 65 urte edo gehiagoko biztanleen portzentajea (%18,7) altuenetakoa dela EB-27 herrietan (gurearen gainetik Alemania eta Italia baino ez daude) eta, aldi berean, 14 urte eta gutxiago dituzten biztanleen taldean portzentajerik baxuena dugula (%12,2). Portzentaje horiek Espainiaren kasuan hurrenez hurren %16,7 eta %14,5 ziren. Erreferentzia moduan 1996 urtea hartuta Euskal AEn portzentajea %16,1 zen 65 urtetik gorakoen kasuan eta %12,3 14 urte eta gazteagoen taldearen kasuan eta, Espainian eta hurrenez hurren, %13,4% eta %16,4.

Amaitzeko garrantzitsua den beste adierazle demografiko bat, bizitza-itxaropena. 2006ko urteko datuen arabera itxaropen hori Euskal AEn 77,3 urtekoa zen gizonentzat eta 84,8 urtekoa emakumeentzat, eta azken hori altuena da EB-27 herrietan. Espainian 2006an 77,7 urtekoa zen gizonen kasuan eta 84,4 urtekoa emakumeen kasuan.