Arabako hiru eskualdek, berriz, biztanleko BPG balio handienak dituzte : Errioxa, Gorbeiako inguruak eta Arabako ibarrak

Euskal AEn, Eustaten datuen arabera, Olaberriako udalerriak, zeina Gipuzkoakoa baita, du biztanleko BPG handiena. Bigarren eta hirugarren Zamudio eta Zierbena daude, Bizkaikoak biak. Araban Legutio da biztanleko BPG handiena duen udalerria, erkidegoan laugarren delarik.

Biztanleko udal BPGk udalerri baten barruko ekoizpen-faktoreek (lantegiak, saltokiak, zerbitzu-enpresak…) sortutako aberastasuna neurtzen du.

Lau udalerri horietako BPG sektoreka nola banatzen den ikusiz, lauotan nabarmena da balio erantsi handiko industria adarren pisua; Zamudioko kasuan Teknologi Parkera lotutako zerbitzu sektorearen sendotasuna dugu baita ere.

1. taula. Biztanleko BPG handiena (eurotan) duten udalerriak eta banaketa sektoreka (%). 2005

Iturria: Eustat

Eskualdeka, Araban daude biztanleko BPG handienak dituzten lehenengo hirurak. Aurrena Errioxa dugu, bai ardogintzaren sendotasunagatik, bai biztanle-dentsitate txikiagatik. Errioxako udalerrietan, Laguardia eta Eskuernaga daude aurreneko postuetan.

Errioxaren ondoren Gorbeiako Inguruak eta Arabako Ibarrak datoz bigarren eta hirugarren. Laugarren eta bosgarren Debagoiena (Gipuzkoa) eta Durangaldea (Bizkaia) daude. Berriz ere nabarmentzekoa da eskualde hauetako balio erantsi osoaren gaineko industri-adarraren pisua. Euskal AE guztira hartuta, zerbitzuen sektoreak du pisurik handiena.

Azken hamar urteetako biztanleko BPGren bilakaerari begiratuz gero, Bizkaiko Zierbena eta Gipuzkoako Aramak dituzte hazkunderik handienak, urteko batez besteko hazkunde metatuak %39,1 eta %32,8 direlarik; Euskal AEko batez bestekoa %7,2 da.

Olaberriak (%18,9) Gipuzkoan, Bernedok (%16,6) eta Berantevillak (%16,5) Araban, eta Mañariak (%16,3) eta Larrabetzuk (%15,2) Bizkaian hazkunde nabarmenak ere izan dituzte.

2. taula. Biztanleko BPG hazkunderik handiena (eurotan) duten udalerriak 1996-2005

Iturria: Eustat

Emankortasunaren ikuspegitik, horren neurri gisa pertsona okupatuko BPG harturik, alegia, biztanleria aintzat hartu beharrean udalerri bakoitzeko pertsona okupatuak hartuz gero, Zierbena eta Muskiz ditugu aurreneko lekuetan, Bizkaikoak biak; hirugarren Arabako Zambrana dugu eta laugarren Gipuzkoako Olaberria.

3. taula. Pertsona okupatuko BPG handiena duten udalerriak (eurotan) 2005

Iturria: Eustat

Eskualdeka, berriz ere Arabako Errioxa agertzen zaigu Pertsona okupatuko BPG handiena duen eskualde gisa; ondoren Arabako Ibarrak eta Goierri, Gipuzkoan. Bizkaian Durangaldea da okupatuko BPG handiena duen eskualdea.