2022/12/15eko prentsa-oharra

KANPO-MERKATARITZAREN ESTATISTIKA (KAMEE). 2022ko urria

Euskal AEko ondasunen esportazioek % 29 egin dute gora 2022ko lehen 10 hiletan, eta, dagoeneko, 2021eko zifra osoak gainditzen dituzte

2022ko lehen hamar hiletan metatutako kanpo-saldoak 2.647 milioi euroko superabita izan du

Euskal AEko ondasunen esportazioek (2.833 milioi euro), 2022ko urrian, aurreko urteko hil beraren aldean, % 23,6ko igoera izan dute, produktu energetikoen % 78,1eko eta ez-energetikoen % 20,2ko igoeraren ondorioz, Eustaten datuen arabera. 2022ko urrira arte, esportazioen metatua 27.000 milioi eurotik gorakoa izan da; % 29ko igoera egon da, eta zifra hori 2021eko esportazio guztiena baino handiagoa izan da, orduan 25.665 milioi eurokoa izan baitzen.

Inportazioen kasuan (2.552 milioi), % 25,6ko igoera izan da. Inportazio ez-energetikoek % 20,6 egin dute gora, eta energetikoek, % 39,7.

2022ko urrian, merkataritza-saldo positiboa izan da (281 milioi) eta estaldura-tasa % 111,0koa.

Euskal AEko hiru lurralde historikoek hazkuntza-tasa positiboak izan dituzte, eta igoera-ehunekoa % 27,4koa izan da Araban, % 29,7koa Bizkaian eta % 12,9koa Gipuzkoan. Arabako esportazio ez-energetikoek % 27,4 egin dute gora; Bizkaikoek, % 21,0, eta Gipuzkoakoek, % 12,7. Esportazio energetikoek, Bizkaiaren kasuan, % 78,1 egin dute gora.

Araban, esportazioak honako hauetan kontzentratu dira hilabete honetan: “Garraio-materiala” (guztizkoaren % 59), % 33,7ko igoerarekin (517,2 milioi esportatu, guztira) eta “Metalak eta haren manufakturak” (urte arteko % 42,0ko igoera).

Gipuzkoan, gora egin dute bi arantzel-partida nagusien salmentek: “Materiala, makinak eta aparatu elektrikoak” (% 14,3) eta “Metalak eta haien manufakturak" (% 9,5). Baina rankingeko hirugarrenak, “Garraio-materiala”k, atzera egin du % 12,1.

Bizkaiaren kasuan, berriz, hazi egin dira “Garraio-materiala” partidaren esportazioak (% 40,8), bai eta “Materiala, makinak eta aparatu elektrikoak” (% 35,9), “Produktu kimikoak” (% 54,0) eta “Produktu mineralak eta energetikoak” (% 75,5) partidenak ere.

Jatorri-helmugako herrialdeak, 2022ko urria

2022ko urrian, bost herrialdek (Alemania, Frantzia, Erresuma Batua, Estatu Batuak eta Belgika) eratu dute Euskal AEren bezero nagusien taldea; esportatutako guztizkoaren % 49,5 hartzen dute (1.402 milioi). Haietako hiru EB27koak dira; entitate horri % 64,4 dagokio.

Alemaniara eginiko esportazioek % 36,7 egin dute gora; Frantziara eginikoek, % 13,8; Estatu Batuetara eginikoek, % 6,5 eta Belgikara eginikoek, % 38,0. Italiara, Portugalera eta Herbeheretara eginikoak ere areagotu dira (% 32,2, % 28,3 eta % 47,4). Europatik kanpora, Marokokoak, Mexikokoak, Brasilekoak, Txinakoak eta Singapurrekoak handitu dira (% 182,5, % 36,1, % 51,3, % 9,5 eta % 955,3, hurrenez hurren) eta behera egin dute, nabarmen, Errusiakoek (–% 81,1).

Gure inportazioen % 42,7 EB27tik etorri dira. Europako herrialde garrantzitsuenen artean, Polonia nabarmentzen da gehien, % 46,1eko urte arteko hazkuntza izan baitu, bai eta Herbehereak ere, % 45,9ko hazkuntzarekin; ondoren, Alemania (% 1,5), Frantzia (% 6,2), Italia (% 9,1) eta Portugal (% 10,6) daude. Erresuma Batuan, % 35,9ko atzerapena egon da.

Munduko gainerako herrialdeak aztertuta ikusten da areagotu egin direla honako herrialde hauetan jatorria duten inportazioak: Estatu Batuak (% 125,1 eta 188 milioi inportatu), Brasil (% 112,4 eta 189 milioi inportatu), Txina (% 72,8 eta 213 milioi inportatu) eta Irak (114 milioi). Behera egin dute, berriz, Mexikokoek (–% 62,6 eta 47 milioi) eta Nigeriakoek (–% 97,5 eta 1 milioi). Errusiaren kasuan, % 51,1eko atzerakada egon da; 2021eko urrian 98,4 milioi izatetik 2022ko hil berean 48,1 milioi izatera igaro da; haietatik, 47 milioi “energetikoak” izan dira, zehazki, “Petrolioaren olio finduenak”.

Gure inportazio energetikoak honela banatu dira: 363 milioi Amerikakoak (% 48,8) eta, haietatik, 104 milioi Estatu Batuetakoak eta 177 Brasilekoak; 209 milioi Asiakoak (% 28,2) eta, haietatik, 114 milioi Irakekoak; 111 milioi Afrikakoak (% 15,0), eta 60 milioi Europakoak (% 8,0).

Merkaturatutako produktuak, 2022ko urria

Xehetasunak ikusteko, 2022ko urrian ikusten da hamar arantzel-partida nagusiek esportazioen % 43,3 kontzentratu dutela; baterako balioa 1.225,5 milioi eurokoa izan da.

Nabarmentzekoa da, talde horren barruan, “Aduana-tarifan berariaz jasota ez dauden merkantziak” partidaren igoera handia: % 182,8 eta 35 milioi gehiago aurreko urteko hilabete berean baino; hil honetan, guztira, 54 milioi eta, haietatik, 42 Belgikara bideratuak. Arantzel-partida horrek, 2022ko urrira arte, 408,6 milioi metatu ditu, eta, hala, aurreko bi urteetako esportazio bateratuak (367,7 milioi) gainditu ditu.

Espektroa 25 partida garrantzitsuenetara zabaltzen badugu, nabarmentzekoa da “Arrain izoztua xerratu gabe” partida (% 243,4), 9 milioi esportatutik 30 milioira egin baitu. Honako produktu hauek ere igoera handia izan dute: “Biodiesela eta bere nahasketak”, 0tik 31 milioira igaro dena; “Automotorrak, trenbideetarako eta tranbia autopropultsatuetarako”, 0 milioitik 51 milioira, eta “Hodiak eta profilak hutsak, soldadurarik gabe, burdinazko edo altzairuzkoak” (% 117,6 eta 63 milioi esportatu).

Esanguratsuak dira, era berean, besteak beste, honako partida hauetako hazkuntza-tasak: “Gainerako altzairu aleatuen barrak eta profilak eta zulatzeko barra hutsak” (% 72,4 eta 35,6 milioi esportatu), “Petrolioaren olio finduak” (% 101,1 eta 216,4 milioi; alegia, 108,8 milioi gehiago aurreko urteko hil berean baino), “10 pertsona baino gutxiagoko turismoak” (% 62,1 eta 300,3 milioi esportatu) eta “Automobilentzako zati eta osagarriak” (% 31,4 eta 185,9 milioi esportatu).

Berariaz aipatu behar da, era berean, “Soja-olioa”ren esportazioek izan duten hazkuntza handia; 21,3 milioi eurora iritsi da eta produktu horren hil bereko 23,9 milioi inportatuekin lotuta egon daitezke.

Inportazioen kasuan, arantzel-partidetan, garrantzitsuenak, “Petrolioaren edo mineral bituminosoaren olio gordinak” (guztizkoaren % 25,3) partidak, % 47,6ko hazkuntza izan du, 2021eko hil berean baino 208,2 milioi gehiago, 646 milioiko guztizko erosketetan, honela banatuta: 177,0 milioi Brasilekoak, 114,4 milioi Irakekoak, 111,0 milioi Libiakoak, 91,1 milioi Kazajstánekoak, 70,4 milioi Estatu Batuetakoak, 41,9 milioi Mexikokoak eta 40,2 milioi Trinidad y Tobagokoak.

Joera positiboa izan dute, era berean, arantzel-partida nagusi gehienek, eta honako hauen igoera nabarmentzen da: “Biodiesela eta bere nahasketak” (20,4 milioi inportatu eta 30,9 milioi esportatzen dira); “Soja-olioa” (23,9 milioi inportatu eta 21,3 milioi esportatzen dira), eta “Ongarri mineral edo kimiko nitrogenatuak" (18,0 milioi inportatu eta 3,4 milioi esportatzen dira). Nabarmentzekoak dira, era berean, honako hauen hazkuntza: “Soja-babak, baita hautsiak ere” (% 252,1 eta 36,8 milioi), “Metagailu elektrikoak eta haien zatiak” (% 170,3 eta 45,2 milioi) eta “Motozikleta eta bizikleten zati eta osagarriak” (% 89,4 eta 33 milioi), “Enbolo, diesel edo erdi-diesel motorrak” (% 31,3 eta 47,6 milioi inportatu) eta “Landu gabeko aluminioa” (% 43,2 eta 26,6 milioi).

Nabarmen egin dute atzera honako hauen inportazioek: “Petrolio-gasa eta gainerako hidrokarburo gaseosoak” (–% 46,6 eta 30,8 milioi gutxiago aurreko urteko hil berean baino) eta “Beroan laminatutako produktu lauak, aleatu gabeko burdinazkoak edo altzairuzkoak, 599 mm-tik gorako zabalerakoak” (–% 55,6 eta 50,1 milioi gutxiago aurreko urtean baino)

ARABA. Esportazioak 2022ko urrian

Araban, esportazioek % 27,4 egin dute gora, neurri handi batean hil honetan honako partida hauek izan duten igoera handiagatik: “10 pertsona baino gutxiagoko turismoak” (% 63,9 eta 298,4 milioi esportatu, guztira, aurreko urtean baino 116,4 milioi gehiago) eta “Hodiak eta profilak hutsak, soldadurarik gabe, burdinazko edo altzairuzkoak” (% 264,1 eta 55,9 milioi esportatu, aurreko urteko hil berean baino 40,6 milioi gehiago). Esportatzeko ahalegin horretan, honako hauek ere parte hartu dute: “Ibilgailuen zati eta osagarriak” (% 28,8 eta 50,0 milioi) eta “Motorra duten edo ez duten aireontzien zatiak, tripulatuak izan edo ez, eta satelite eta ibilgailu espazialen zatiak” (9,2 milioi esportatu).

BIZKAIA. Esportazioak 2022ko urrian

Bizkaiko lurralde historikotik eginiko esportazioek % 29,7 egin dute gora, aurreko urtearekin alderatuta. Hamar partida nagusietatik, kopuru osoaren % 49 baitira, esportatzeko ahaleginean honako hauek egin dute ekarpenik handiena: “Petrolioaren olio finduak” (% 101,3ko hazkuntza eta 213,8 milioi esportatu), “Aduana-tarifan berariaz jasota ez dauden merkantziak” (% 188,2 eta 50,8 milioi esportatu), “Biodiesela eta bere nahasketak” (30,9 milioi esportatu), “Soja-olioa” (21,3 milioi) eta “Arrain izoztua xerratu gabe” (29 milioi).

GIPUZKOA. Esportazioak 2022ko urrian

Gipuzkoako esportazioek % 12,9 egin dute gora eta, partida nagusien artean, honako hauen hazkuntzak nabarmentzen dira: “Automotorrak, trenbideetarako eta tranbia autopropultsatuetarako”, guztira 51,4 milioi esportaturekin, eta, haietatik, Israeli 14,7 milioi dagozkio, Italiari 8,6 milioi, Norvegiari 8,3 milioi, Finlandiari 7,7 milioi, Suediari 7,7 milioi eta Belgikari 4,4 milioi; “Automobilentzako zati eta osagarriak” (% 35,8 eta 67,9 milioi); “Metal arruntezko giltzarrapo, sarraila, morroilo eta giltzak” (% 33,2 eta 19,7 milioi), eta “Papera eta kartoia iztukatu eta estali gabea, helburu grafikoekin, bobinetan edo zulatzeko orri eta zintetan” (% 27,9 eta 16,4 milioi esportatu).

2022KO METATUA (URTARRILA-URRIA): kanpoko saldoak 2.647,5 milioi euroko superabita izan du, eta estaldura-tasa % 110,8koa da

2022ko lehen hamar hilotan, Euskal AEko esportazioek % 29,0ko urte arteko igoera izan dute, aurreko urteko aldi beraren aldean; alegia, 6.088 milioi euro gehiago. Aldi horretan, zenbateko esportatzailea 27.072 milioikoa izan da, eta kopuru horri Bizkaiak egin dio ekarpenik handiena, 11.139 milioikoa (guztizkoaren % 41), gero Gipuzkoak (8.182 milioi) eta, ondoren, Arabak (7.751 milioi).

Bizkaiko esportazioek, gainera, urte arteko hazkuntza handiena izan dute (% 32,4), 2021ean baino 2.727 milioi gehiago. Araban, hazkuntza % 29,3koa izan da (1.756 milioi gehiago) eta, Gipuzkoan, % 24,4koa (1.606 milioi gehiago).

Esportatutako produktu mota kontuan hartuta, egiaztatu da esportazioek hazkuntzak izan dituztela, bai “Produktu energetikoenek” (1.250,2 milioi gehiago), bai “Produktu ez-energetikoenek” (4.837,9 milioi gehiago 2021eko aldi bereko metatua baino).

Gehien saldu diren hamar produktuek (arantzel-partidak) guztizkoaren % 41,3 kontzentratzen dute, 11.175,3 milioiko zenbatekoarekin.

“Petrolioaren olio finduak” Euskal AEko esportazio-bolumen handiena duen partida da (2.177,3 milioi esportatu eta % 130,7ko hazkuntza-tasa).

Gehien hazi diren produktuen artean, honako hauek nabarmendu behar dira: “Automotorrak, trenbideetarako eta tranbia autopropultsatuetarako” (% 990,7 eta 374,9 milioi euro esportatu) eta “Hodiak eta profilak hutsak, soldadurarik gabe, burdinazko edo altzairuzkoak” (% 117,2 eta 538,7 milioi). Lehen hamarren rankinga eratzen duten gainerako produktuen kasuan, nabarmentzeko moduko bilakaerak “10 pertsona baino gutxiagoko turismoak” partidaren % 21,9 (2.147 milioi esportatu) eta “Aduana-tarifan berariaz jasota ez dauden merkantziak” partidaren % 124,8 (408,6 milioi) bitartekoak izan dira.

Kontuan hartzeko moduko beste hazkuntza batzuk honako hauek dira: “Aleatu gabeko burdinazko edo altzairuzko profilak”, “Salgaiak garraiatzeko automobilak”, “Ibilgailuen zati eta osagarriak” eta “Kautxuzko pneumatiko berriak”; % 39,8ko, % 24,1eko, % 23,2ko eta % 17,7ko aldakuntza positiboak dituzte, hurrenez hurren.

Alemania izan da esportazioen helmugako herrialdeen sailkapeneko buru (4.236 milioi), eta, ondoren, oso gertutik, Frantzia (4.144 milioi) eta, urrunago, Herbehereak (1.806 milioi), Estatu Batuak (1.732 milioi) eta Erresuma Batua (1.671 milioi); hala, bost herrialdeen artean, esportazioen % 50,2 hartzen da. Estaldura-tasa, Alemaniaren kasuan, % 139,3koa izan da. Gainerakoen kasuan, tasa horiek % 200era iristen dira edo gainditu egiten dute kopuru hori, Estatu Batuen kasuan izan ezik (% 94,6), ez baita iristen esportazio eta inportazioen arteko orekaren tartera, eta, hala, herrialde horri dagokionez, merkataritza-balantza defizitarioa izan da.

Euskal AErako inportazioen metatua 24.425 milioi euro ingurukoa da. Zifra hori urte artean erkatuz gero, 2021eko aldi berean erregistratutakoa baino 7.487 milioi handiagoa dela ikusten dugu. % 44,2ko gorakada hori izan da, zati handi batean, Bizkaiko lurraldean (14.934,9 milioiko balioa duten inportazioak ditu) % 56,7ko gorakada egon delako, alegia, aurreko urteko aldi berean baino 5.404,8 milioi gehiago. Araban ere inportazioek gora egin dute, % 28,5, 1.039,7 milioi euro gehiago, eta, Gipuzkoan, % 27,8ko igoera izan dute eta 1.042,7 milioi euro gehiago; inportatutakoaren balioa 4.689,4 eta 4.800,3 milioi euro izan da, hurrenez hurren, bi lurralde horietan.

“Produktu energetikoen” inportazioak % 97,6 egin du gora, aurreko urteko aldi beraren aldean, eta “Produktu ez-energetikoenak”, % 29,9.

Euskal AEko ondasunen kanpo-merkataritzak, 2022ko lehen hamar hiletan, 2.647,5 milioi euroko saldo positiboa izan du, eta aldeko estaldura-tasari eustea dakar, % 110,8koa.

Informazio gehiagorako:

Eustat - Euskal Estatistika Erakundea / Instituto Vasco de Estadística Donostia-San Sebastian kalea, 1 01010 Vitoria-Gasteiz Prentsa-zerbitzua: servicioprensa@eustat.eus Tel.: 945 01 75 62