2023/12/18ko prentsa-oharra

KANPO MERKATARITZAREN ESTATISTIKA (KAMEE). 2023ko urria

Esportazioak % 0,7 jaitsi dira 2023ko urrian Euskal AEn; jaitsierarik txikiena izan da apirilaz geroztik

Urteko metatuari dagokionez, esportazioak 27.000 milioi eurotik gorakoak izan dira, eta % 0,2ko igoera izan dute aurreko urtekoekin alderatuta

Eustaten datuen arabera, Euskal AEko ondasunen esportazioek (2.814 milioi euro) % 0,7ko beherakada nominala izan dute 2023ko urrian, aurreko urteko hil berarekin alderatuta, batez ere produktu energetikoek % 35,4ko beherakada izan dutelako. Produktu ez-energetikoek, berriz, % 2,5eko igoera izan dute.

Inportazioen kasuan (2.229 milioi euro), % 12,6ko beherakada gertatu da. Inportazio ez-energetikoek % 7,6ko beherakada izan dute, eta inportazio energetikoek % 25,0koa. Azken inportazioen kasuan urtetik urterako alderaketa inportatutako tonekin egiten badugu, beherakada % 22,1ekoa izan da.

Merkataritza-saldoa positiboa izan da, eta 584,7 milioi euro ingurura iritsi da. Horrela, beraz, % 126,2ko estaldura-tasa ahalbidetu da.

Urrian erregistratutako hazkunde-tasa negatiboa Bizkaiko lurraldean izandako jaitsiera handiak baldintzatu du (% 8,2ko jaitsiera). Araban, tasa horrek % 7,8ko igoera izan du, eta Gipuzkoan, berriz, % 0,5ekoa. Bizkaiaren kasuan, esportazio energetikoek % 35,8ko beherakada izan dute aurreko urteko hil berarekin alderatuta. Lurralde horretan, azken zortzi hilabetetan erregistratu dira tasa negatiboak.

Araban, esportaziorik handienak honako hauetan egin dira nagusiki: “Garraio-materiala” (guztizkoaren % 60,7), % 10,9ko igoerarekin eta guztira 573,4 milioi euroko esportazioekin; eta ”Metalak eta haien manufakturak” (guztizkoaren % 14,5), % 13,9ko jaitsierarekin; horiek izan dira urriko “muga-zergen bi sekziorik” garrantzitsuenak. Igoera handia izan duen partida bat “Material, makina eta aparatu elektrikoak” izan da berriz ere (% 42,2ko igoera). Partida horretan, esportazioen balioa 63,1 milioi eurora iritsi da.

Gipuzkoan, nazioarteko merkataritzaren hiru laurden (% 75,7) muga-zergen hiru sekziotan bildu da, urtetik urterako alderaketan portaera desberdina izan badute ere: “Material, makina eta aparatu elektrikoak” (% 10,1), “Garraio-materiala” (% 25,1) eta “Metalak eta haien manufakturak” (-% 15,0).

Bizkaiaren kasuan, esportazioek gora egin dute ”Garraio-materiala” sekzioan (% 27,6), baina jaitsiera esanguratsuak izan dituzte “Produktu mineral eta energetikoak” sekzioan (-% 32,6). Azken kasu horretan, aurreko urteko hil berean baino 77,3 milioi euro gutxiago izan dira, eta 159,7 milioi euro izan dira guztira. Hortaz, 117 mila tona gutxiago esportatu dira.

Jatorri eta helmugako herrialdeak, 2023ko urria

2023ko urrian, bost herrialde (Alemania, Frantzia, Belgika, Ameriketako Estatu Batuak eta Erresuma Batua) izan dira Euskal AEko bezero nagusien taldea osatu dutenak, esportazio guztien % 51,2 hartu baitituzte (1.441,2 milioi euro). Herrialde horietako hiru EB-27koak dira (entitate horrek guztizkoaren % 64,2 bildu du).

Alemania esportazioen sailkapeneko lehen tokian geratu da, 453,3 milioi eurorekin, eta jasotzen dituen 396 produktu moten artean, automobilaren sektoreari lotutakoak nabarmendu dira: “10 pertsona baino gutxiagoko turismoak” (114,6 milioi euro), “Salgaiak garraiatzeko ibilgailu automobilak” (82,9 milioi euro), “Ibilgailu automobilen zatiak eta osagarriak” (35,9 milioi euro) eta “Kautxuzko pneumatiko berriak” (22,8 milioi euro).

Frantziara egindako esportazioen zenbatekoa 415,5 milioi eurora iritsi da, eta honako hauetan egin dira nagusiki: “Petrolioaren olio finduak” (53,6 milioi euro), “Ibilgailu automobilen zatiak eta osagarriak” (27,1 milioi euro), “Kautxuzko pneumatiko berriak” (26,6 milioi euro), “10 pertsona baino gutxiagoko turismoak” (22,1 milioi euro) eta “Salgaiak garraiatzeko ibilgailu automobilak” (16,8 milioi euro). 671 produktu mota esportatu dira guztira.

Belgikara 210,9 milioi euroko esportazioak egin dira, eta honako hauek nagusitu dira egindako transakzioetan: “Petrolioaren olio finduak” (54,3 milioi euro), “Muga-zergan berariaz jasota ez dauden salgaiak” (35,6 milioi euro), “10 pertsona baino gutxiagoko turismoak” (30,2 milioi euro), “Salgaiak garraiatzeko ibilgailu automobilak” (17,9 milioi euro) eta “Trenbideetarako automotorrak eta tranbia autopropultsatuak” (13,6 milioi euro). Guztira, 266 produktu izan dira.

Laugarren tokian Ameriketako Estatu Batuak kokatu dira, 181,3 milioi eurorekin, eta esportazioak honako partida hauetan egin dira: “Salgaiak garraiatzeko ibilgailu automobilak” (31,2 milioi euro), “10 pertsona baino gutxiagoko turismoak” (14,8 milioi euro), “Soldadurarik gabeko burdinazko edo altzairuzko hodi eta profil hutsak” (13,9 milioi euro) eta “Biodiesela eta haren nahasteak” (13,4 milioi euro). Guztira, 344 produktu mota izan dira.

Euskal Autonomia Erkidegoak Erresuma Batura egindako esportazioak 180,1 milioi eurora iritsi dira, eta honela banatu dira: “Turboerreaktoreak, turbopropultsoreak eta gainerako gas-turbinak, piezak eta osagaiak barne” (18,3 milioi euro), “10 pertsona baino gutxiagoko turismoak” (17,2 milioi euro), “Salgaiak garraiatzeko ibilgailu automobilak” (14,5 milioi euro), “Aleatu gabeko burdinazko edo altzairuzko profilak” (13,9 milioi euro) eta “Burdinurtuzko, burdinazko edo altzairuzko xafla, barra, profil, hodi eta antzekoekin egindako eraikuntzak” (13,8 milioi euro). Guztira, 442 produktu mota izan dira.

Bestalde, Errusiara egindako esportazioak (3,9 milioi eurokoak) “Ontziak eta paketatzeko aparatuak garbitu, bete, itxi eta etiketatzeko makinak” sekzioan egin dira nagusiki (1,9 milioi euro). Gainerako zenbatekoa (2 milioi euro) 21 produkturen artean banatu da.

Gure inportazioen % 50,4 EB-27tik iritsi dira hil honetan. Ondasun-hornitzaileak izan diren herrialdeen artean, Alemania nabarmendu da 347 milioi euroko transakzioekin, batez ere “Ibilgailu automobilen zatiak eta osagarriak”, “Enbolo, diesel edo erdi-diesel motorrak”, “Motor eta sorgailu elektrikoak (talde elektrogenoak izan ezik)” eta “Ijeztutako produktu lauak, aleatu, txapatu edo estali gabeko burdinazkoak edo altzairuzkoak > 599 mm” partidetan (53,1, 43,2, 14,5 eta 13,3 milioi euro, hurrenez hurren).

Frantziaren kasuan, produkturik eskatuena “Galdaketako, burdinazko edo altzairuzko txatarra” izan da, 26,3 milioi eurorekin (164 milioi euro guztira, 709 produktu motatan banatuak).

Italiatik 538 produktu mota iritsi dira, eta batez ere metal arrunten eta burdinazko eta altzairuzko galdaketaren eta haien manufakturen taldeko (43 milioi euro) eta makineriaren eta garraio-materialaren taldeko (36 milioi euro) produktuak izan dira.

EBtik kanpo, Brasil nabarmendu da, 249,8 milioi eurorekin. Zenbateko horretatik, 225 milioi euro “Petrolioaren edo material bituminosoaren olio gordinak” partidari dagozkio.

Txinatik inportatutako produkturik garrantzitsuenak “Metagailu elektrikoak eta haien zatiak” izan dira berriz ere, 41,1 milioi eurorekin (178,1 milioi euro guztira).

Hil honetan, Errusiako inportazioak 6,8 milioi eurora iritsi dira, eta honela banatu dira: “Landu gabeko aluminioa” (5,7 milioi euro), “Titanioa eta haren manufakturak, hondakinak barne” (0,5 milioi euro) eta “Landu gabeko nikela, aleatuta edo aleatu gabe” (0,2 milioi euro).

Inportazio energetikoak honela banatu dira: 308,8 milioi Amerikakoak (% 55,4), eta, haien barruan, 225,0 milioi Brasilgoak, 48,4 milioi Mexikokoak eta 35,3 milioi Ameriketako Estatu Batuetakoak; 123,8 milioi Asiakoak (% 22,2), eta haien barruan, 62,8 milioi Kazakhstangoak eta 60,8 milioi Irakekoak; 73,2 milioi Afrikakoak (% 13,1), guztiak Nigeriakoak; eta 51,8 milioi Europakoak (% 9,3), ia guztiak Belgikakoak (30,1 milioi) eta Herbehereetakoak (18,2 milioi).

2023ko urrian merkaturatutako produktuak

Produktuen xehetasuna lau digitura eramanez gero ikus daitekeenez, muga-zergen hamar partida nagusiek esportazioen % 43,7 bildu dituzte 2023ko urrian, 1.229,1 milioi euroko balioarekin.

Muga-zergen 25 partida nagusiez osatutako taldearen barruan, haietako lauk izan duten igoera nabarmendu da: “10 pertsona baino gutxiagoko turismoak” (333,4 milioi euroko esportazioak), “Salgaiak garraiatzeko ibilgailu automobilak” (206,7 milioi euroko esportazioak), “Kautxuzko pneumatiko berriak” (122,6 milioi euroko esportazioak) eta “10 pertsona edo gehiago –gidaria barne– garraiatzeko ibilgailu automobilak” (27,1 milioi euroko esportazioak). Bestalde, “Petrolioaren olio finduak” partidak izan duen beherakada nabarmendu da (-% 35,0). Zehazki, aurreko urteko hil berean baino 75,8 milioi euro gutxiago izan dira, eta guztira 140,6 milioi euroko esportazioak egin dira.

Inportazioen kasuan, eta muga-zergen partidarik garrantzitsuenei dagokienez, igoera handiak honako hauetan gertatu dira: “Ibilgailu automobilen zatiak eta osagarriak” (103,8 milioi euroko inportazioak), “Berotan ijeztutako produktu lauak, aleatu, txapatu edo estali gabeko burdinazkoak edo altzairuzkoak > 599 mm” (70,7 milioi euroko inportazioak), “Metagailu elektrikoak eta haien zatiak” (47,1 milioi euroko inportazioak) eta “Galdaketako, burdinazko edo altzairuzko txatarra” (35,3 milioi euroko inportazioak).

Jaitsieren kasuan, partidarik garrantzitsuena “Petrolioaren edo mineral bituminosoaren olio gordinak” izan da (guztizkoaren % 22,7), eta % 21,8ko beherakada izan du inportazioetan (2022ko hil berean baino 141,1 milioi euro gutxiago inportatu dira). Nolanahi ere, erosketen guztizkoa 504,9 milioi eurora iritsi da.

ARABA. 2023ko urriko esportazioak

Araban, esportazioek % 7,8ko igoera izan dute aurreko urteko hil berarekin alderatuta. Portaera hori honako hauetan agertu da batez ere: “10 pertsona baino gutxiagoko turismoak” (301,5 milioi euroko esportazioak), % 1,0ko igoerarekin, “Salgaiak garraiatzeko ibilgailu automobilak” (206,5 milioi euroko esportazioak), % 38,1eko igoerarekin, eta “Kautxuzko pneumatiko berriak” (48,8 milioi euroko esportazioak), % 30,1eko igoerarekin. Halaber, igoerak izan dira honako hauetan: “Burdinazko edo altzairuzko beste hodi eta profil huts batzuk” (% 84,0) eta “Ardatz eragileak, kojineteak, engranajeak, enbrageak eta abar” (% 69,1), 7,5 milioi euroko esportazioekin.

BIZKAIA. 2023ko urriko esportazioak

Bizkaiko lurralde historikoan, esportazioek % 8,2ko beherakada izan dute. Bizkaiko esportazioen sailkapenean lehenengoa den “Petrolioaren olio finduak” partidak eragin du batez ere beherakada hori. Izan ere, % 35,4ko beherakada izan du, eta esportazioen zenbatekoa 138,1 milioi eurora iritsi da (213,8 milioi euro aurreko urteko hil berean), hau da, 75,6 milioi euroko jaitsiera izan du.

Muga-zergen partida nagusien artean, honako hauek izan duten igoera nabarmendu da: “Kautxuzko pneumatiko berriak” (% 21,0ko igoera; 73,2 milioi euro) eta “Turboerreaktoreak, turbopropultsoreak eta gainerako gas-turbinak, piezak eta osagaiak barne” (% 62,1eko igoera; 31,9 milioi euro).

GIPUZKOA. 2023ko urriko esportazioak

Gipuzkoan, esportazioek % 0,5eko igoera izan dute urrian. % 100etik gorako igoerak egiaztatu dira honako partida hauetan: “Igogailuak, eskailera mekanikoak, garraiagailuak eta abar” eta “10 pertsona edo gehiago –gidaria barne– garraiatzeko ibilgailu automobilak”. “Aleatu gabeko burdinazko edo altzairuzko profilak” partidak, berriz, behera egin du (-% 42,3).

2023KO METATUA (URTARRILA-URRIA): ondasunen esportazioek % 0,2ko igoera izan dute, merkataritza-saldoa positiboa izan da eta 4.273 milioi eurora iritsi da, eta estaldura-tasa % 118,7ra iritsi da

2023ko lehen hamar hilabeteetan, Euskal AEko esportazioek % 0,2ko igoera izan dute aurreko urteko aldi berarekin alderatuta, eta, beraz, 40,7 milioi euro gehiago lortu dira esportazioetan. Aldi horretako esportazioen zenbatekoa 27.113 milioi eurora iritsi da, eta ekarpenik handiena Bizkaiak egin du, 10.120 milioi eurorekin (guztizkoaren % 37,3). Atzetik, Araba (8.639 milioi euro) eta Gipuzkoa (8.354 milioi euro) kokatu dira.

Araban, esportazioek 888,3 milioi euroko igoera izan dute 2022ko aldi berarekin alderatuta. Aurreko hilarekin alderatuta, berriz, % 11,5 igoera izan dute. Gipuzkoan, igoera askoz txikiagoa izan da (% 2,1, hau da, 2022an baino 171,9 milioi euro gehiago). Bizkaian, berriz, bilakaera negatiboa izan da (1.019,5 milioi euro gutxiago, hau da, % 9,2ko beherakada).

Esportatutako produktu mota kontuan hartuta egiazta daitekeenez, “produktu ez-energetikoek” bilakaera positiboa izan dute, 1.065,5 milioi euro gehiagorekin. “Produktu energetikoen” esportazioak, berriz, 2022ko urrira bitarte metatutakoak baino % 43,3 txikiagoak izan dira (1.024,7 milioi euro gutxiago).

Hamar produkturik (edo muga-zergen partidarik) salduenen zenbatekoa 11.048,1 milioi eurora iritsi da, hau da, guztizkoaren % 40,7ra. Haietatik, bost produktuk hazkunde-tasa positiboak izan dituzte 2022ko aldi berarekin alderatuta. Haien artean, honako hauek nabarmendu dira: “10 pertsona baino gutxiagoko turismoak”, berriz ere Euskal AEko esportazio-bolumenik handiena izan dutenak (2.631,9 milioi euroko esportazioak eta % 22,6ko igoera), eta “Salgaiak garraiatzeko ibilgailu automobilak” (1.801,0 milioi euroko esportazioak eta % 22,8ko igoera). Aldi horretan portaera bikaina agertu duten gainerako partida garrantzitsuak “Soldadurarik gabeko burdinazko edo altzairuzko hodi eta profil hutsak”, “Kautxuzko pneumatiko berriak” eta “Ibilgailu automobilen zatiak eta osagarriak” izan dira, eta % 13,6ko, % 18,6ko eta % 5,1eko igoera izan dute, hurrenez hurren.

Bestetik, “Petrolioaren olio finduak” partidak izan duen beherakada esanguratsua nabarmendu da (-% 49,1, hots, 2022an baino 1.068,5 milioi euro gutxiago). Beherakada hori ez du prezioen jaitsierak eragin soilik, esportatutako tonek ere % 42,7ko beherakada esanguratsua izan baitute (2.597.317 tona 2022an, eta 1.487.696 tona 2023ko metatuan).

Kontuan hartutako aldian, gure esportazioen helmuga-herrialdeen sailkapeneko lehenengoa Alemania izan da (guztizkoaren % 16,3). Alemaniaren atzetik, honako hauek kokatu dira: Frantzia (% 15,0), Ameriketako Estatu Batuak (% 7,8), Erresuma Batua (% 6,3) eta Italia (% 5,6). Bost herrialde horiek esportazioen % 51 bildu dituzte.

Euskal AE osoko inportazioen metatua 22.840 milioi eurora iritsi da. Urtetik urtera alderatuta, zifra hori 2022ko aldi berean erregistratutakoa baino 1.585 milioi euro txikiagoa izan dela ikus daiteke. Bizkaian, inportazioen balioa 13.364,4 milioi eurora iritsi da, eta % 10,5eko beherakada gertatu da (hau da, aurreko urteko aldi berean baino 1.570,5 milioi euro gutxiago). Gipuzkoak % 8,4ko beherakada izan du (403 milioi euro gutxiago), eta inportazioen balioa 4.397,6 milioi eurora iritsi da. Azkenik, inportazioetan gora egin duen lurralde bakarra Araba izan da (% 8,3ko igoera, hau da, aurreko urtean baino 388 milioi euro gehiago), eta zenbatekoa 5.077,8 milioi eurora iritsi da.

“Produktu energetikoen” inportazioak aurreko urteko aldi berekoak baino % 18,0 txikiagoak izan dira, eta “Produktu ez-energetikoenak”, berriz, % 1,8 txikiagoak.

Euskal AEko ondasunen kanpo-merkataritzak 4.273,1 milioi euroko saldo positiboa izan du 2023ko lehen hamar hilabeteetan, eta, horri esker, estaldura-tasa egokia lortu da (% 118,7koa).

Informazio gehiago:

Eustat - Euskal Estatistika Erakundea / Instituto Vasco de Estadística Donostia-San Sebastián kalea, 1 01010 Vitoria-Gasteiz Prentsa-zerbitzua: servicioprensa@eustat.eus Tel.: 945 01 75 62