2024/06/17ko prentsa-oharra

KANPO-MERKATARITZAKO ESTATISTIKA (ECOMEX) 2024ko apirila

Ondasunen esportazioak % 4,9 hazi ziren 2024ko apirilean Euskal AEn

2024ko lehenengo lau hilabeteetan, oro har, esportazioak % 11,5 jaitsi egin dira, baina merkataritza-saldo positiboak 900 milioi eurotik gorakoa izaten jarraitu du

2024ko apirilean, Euskal AEko ondasunen esportazioek % 4,9ko urte arteko hazkundea izan zuten, Eustaten datuen arabera. Zenbatekoa 2.537 milioi eurokoa izan zen, aurreko urteko hilabete bereko 2.419 milioi euroen aldean. Ondasun energetikoen esportazioak % 38,4 handitu ziren eta ez-energetikoenak % 3,6.

Araban esportazioek % 9,9 egin dute behera; Bizkaian, aldiz, esportazioen hazkundea % 15,9koa izan da eta Gipuzkoan % 7,0koa.

Euskal AEko ondasunen inportazioek % 18,1eko hazkundea izan zuten, 2.644 milioi eurora iritsiz. Inportazio energetikoak % 21,1 hazi egin ziren eta ez-energetikoak % 16,9.

Merkataritza-saldoa negatiboa da (-106,8 milioi) eta estaldura-tasa % 96,0koa da. 2022ko abendura jo behar da (hiru hilabete saldo negatiboarekin) zeinu horretako emaitza aurkitzeko. Saldo negatibo handienak 2006an erregistratu ziren (bederatzi hilabetetan inportazioak izan ziren nagusi).

Arabako inportazioak % 4,3 hazi dira, Gipuzkoakoak % 20,8 eta Bizkaikoak % 22,4.

Produktukako analisia

Xehetasunetan arreta jarriz, hilabete honetan muga-zergen bost partida esportatzaile nagusiak hauek dira: "Ibilgailu automobilen zatiak eta osagarriak" (191,9 milioi esportatu dira, aurreko urtean baino 19,6 milioi gehiago, hau da, % 11,4ko igoera); "10 pertsona baino gutxiagoko automobilak" (168,6 milioi, baina 38,6 milioi gutxiago edo -% 18,6 gutxiago); "Salgaiak garraiatzeko ibilgailu automobilak" (110,4 milioi, 2023ko hilabete berean baino 37,9 milioi gutxiago, eta -% 25,6); "Petrolio-olio finduak" (104,8 milioi, 36,4 gehiago eta % 53,2); eta "Kautxuzko pneumatiko berriak" (90,3 milioi, 24 gutxiago eta -% 21,0). Partida horiek, apirilean, guztizkoaren % 26,2 izan ziren, guztira 665,9 milioi euroko balioarekin.

Araban muga-zergen bi partida nagusiek —"10 pertsona baino gutxiagoko automobilak" (-% 18,7) eta "Salgaiak garraiatzeko ibilgailu automobilak" (-% 25,7)— jaitsierak izan dituzte aurreko urtearen aldean; 38 milioiko atzerapen esportatzailea bakoitzak. "Hodi eta profil hutsak, soldadurarik gabeak, burdinazkoak edo altzairuzkoak" ere jaitsi egin dira (-% 50,9 milioi eta 32,7 milioi gutxiago). Hamar partida nagusietatik lau automobilaren sektorekoak dira eta guztizkoaren % 53,6 ordezkatzen dute.

Bizkaian soilik "Kautxuzko pneumatiko berriek" izan dute tasa negatiboa (-% 51,6, 34,3 milioi gutxiagorekin); gainerakoek aldakuntza positiboak izan dituzte. Nabarmentzekoak dira "Petrolio-olio finduak" (% 59,1 eta 38,1 milioi gehiago), "Transmisio-zuhaitzak, kojineteak, engranajeak, enbrageak, etab." (% 730,1 eta 24,3 milioi gehiago) eta "Arrantza-ontziak eta itsas produktuen tratamendurako lantegi-ontziak" (21 milioi esportatuta; 0 aurreko urteko hilabete berean).

Gipuzkoan nabarmentzekoak dira "Hamar pertsona edo gehiago —gidaria barne— garraiatzeko ibilgailu automobilak" (% 153,5 eta 11,7 milioi gehiago aurreko urteko hilabete berean baino), "Igogailuak, eskailera mekanikoak, garraiatzaileak, etab." (% 127,2 eta 11,4 milioi gehiago) eta "Ibilgailu automobilen zatiak eta osagarriak" (% 16,2 eta 11,6 milioi gehiago). Aitzitik, jaitsi egin ziren "Trenbideetarako automotorrak eta tranbia autopropultsatuak" (-% 36,5, 18,3 milioi euro gutxiagorekin) eta "Txorrotetarako artikuluak, balbulak eta antzeko organoak hodietarako" (-% 17,8, 5,7 milioi gutxiagorekin).

Jatorri/helmuga herrialdeak, 2024ko apirila

Hilabete honetan, bost herrialde daude ranking esportatzaileko lehen postuetan:

-Frantzia: 386,3 milioi herrialde horretara esportatu dira eta estaldura-tasa % 193,1 izan da; jasotzen dituen 686 produktu moten artean, "Ibilgailu automobilen zatiak eta osagarriak" (32,7 milioi), "Salgaiak garraiatzeko ibilgailu automobilak" (19,6 milioi) eta "Kautxuzko pneumatiko berriak" (19,2 milioi) nabarmentzen dira.

-Alemania: 355,5 milioiko balioa duten produktuak jaso ditu gure erkidegotik, % 106,3ko estaldura-tasarekin. Nabarmentzekoak dira "10 pertsona baino gutxiagoko automobilak" (73,3 milioi), "Ibilgailu automobilen zatiak eta osagarriak" (37,3 milioi), "Salgaiak garraiatzeko ibilgailu automobilak" (28,9 milioi) eta "Kautxuzko pneumatiko berriak" (14,6 milioi).

-Erresuma Batua: 199,8 milioi euroko balioagatik esportatu du, % 518,5eko estaldura-tasarekin. Nabarmentzekoak dira "Petrolio-olio finduak" (30,6 milioi), "Turborreaktoreak, turbopropultsatzaileak eta gainerako gas-turbinak, horien zatiak eta osagaiak barne" (18,8 milioi) eta " Aleatu gabeko burdinazko edo altzairuzko profilak" (18,2 milioi) muga-zergen partidak.

-Italia: 172,3 milioiko balioa duen bezeroa, % 160,5eko estaldura-tasarekin. Lehenengo postuan agertzen dira "10 pertsona baino gutxiagoko automobilak" (11,6 milioi), "Soja-olioa" (10,6 milioi) eta "Kautxuzko pneumatiko berriak" (9,1 milioi).

-Belgika: gure esportazioetatik 141,7 milioi herrialde horretara bideratu dira, eta estaldura-tasa % 280,0koa izan da. Herrialde honetan, honako hauek izan dira hilabete honetan gehien eskatu dituztenak: "muga-zergan berariaz jasota ez dauden merkantziak" (39,4 milioi, 59.774 tona), "petrolio-olio finduak" (17,3 milioi) eta "findu gabeko kobrea; finketa elektrolitikorako kobrezko anodoak" (16,4 milioi).

Herrialde horiek esportazioen guztizkoaren % 49,5 hartzen dute; horietako lau EB27koak dira, eta erakunde horrek biltzen ditu esportazioen ia bi herenak (% 63).

Inportazioak aztertuz gero, ikusten da garrantzitsuenak, "Petrolio edo mineral bituminosoko olio gordinak" (guztizkoaren % 22,3), % 67,0ko hazkundea izan duela. Haren atzetik datozen partidak ere hazi egin dira, hala nola "Petrolio-olio finduak" (% 27,0), "Ibilgailu automobilen zatiak eta osagarriak" (% 30,7) eta "Berotan ijeztutako produktu lauak, aleatu gabeko eta txapatu edo estali gabeko burdinazkoak edo altzairuzkoak > 599 mm" (% 53,8).

Euskal AEko ondasunen kanpo-merkataritzak 914,9 milioi euroko saldo positiboa izan du 2024ko urtarriletik apirilera bitarteko metaturako

Lehenengo lau hilabeteetan, eta Euskal AEko esportazioen kasuan, % 11,5eko jaitsiera erregistratu da aurreko urteko aldi beraren aldean, hau da, 1.309 milioi euro gutxiago izan dira. Esportazioen zenbatekoa, berriz, 10.066,4 milioikoa izan da aldi horretan.

Bizkaiko esportazioak Euskal AEko handienak dira, 3.896,9 milioi guztira. Gipuzkoak 3.173,9 milioi metatu ditu eta Arabak 2.995,5 milioi. Produktu mota kontuan hartuta, "Produktu ez-energetikoak" dira ugarienak, 9.432,7 milioi esportatu baitituzte.

Xehetasunei erreparatuz, ikusten da muga-zergen partida nagusiak (788,3 milioi), "Ibilgailu automobilen zatiak eta osagarriak" izenekoak, % 5,9ko hazkundea izan duela, baina gainerako aurreneko hamarrek atzerakada esportatzailea izan dutela, % 41,2koa "Soldadurarik gabeko hodi eta profil hutsak, burdinazkoak edo altzairuzkoak" eta % 1,2koa "Petrolio-olio finduak".

Aipatutako multzoaren barruan, atzerakadarik handienak "10 pertsona baino gutxiagoko automobiletan" (-% 26,0 eta 275,5 milioi gutxiago aurreko urteko aldi berean baino) eta "Salgaiak garraiatzeko ibilgailu automobiletan" (-% 27,2 eta 208,2 milioi gutxiago) gertatu dira.

2024ko lehen lau hilabete hauetako rankingaren arabera, Frantzia da herrialde hartzaile nagusia, esportatutako guztizkoaren % 17arekin. Frantziaren atzetik daude Alemania (% 15) eta Erresuma Batua (% 7); horrela, hiru herrialde horien artean, euskal esportazioen ia % 40 biltzen da.

Euskal AE osorako inportazioen metatua 9.151,4 milioi euro ingurukoa da, kontuan hartutako epean. Zifra horren urte arteko alderaketa eginez gero, ikusten da aurreko urteko aldi berean erregistratutakoa baino 214,6 milioi gutxiago dela. Jaitsiera hori, hein handi batean, Arabako lurraldean (1.903,8 milioiko inportazio metatuekin) aldi horretan % 9,1eko beherapena eman zelako gertatu da, hau da, 2023ko aldi berean baino 190 milioi gutxiago. Gipuzkoaren inportazioek ere atzera egin dute, 36 milioi gutxiago, eta guztira 1.756,8 milioi izan dira; baina Bizkaian hazi egin dira (11,6 milioi gehiago), eta guztira 5.490,8 milioi. "Produktu ez-energetikoen" inportazioa % 6,6 jaitsi da, baina "Produktu energetikoena" % 10,3 igo da.

Euskal AEko ondasunen kanpo-merkataritzak, 2024ko urtarriletik apirilera, 914,9 milioi euroko saldo positiboa izan du, eta estaldura-tasa % 110,0 izatera heldu da.

Aldi horretan egiaztatu da gure esportazioen % 96,5ek "maila teknologikoko" graduren bat duela, eta maila hori "altua" edo "ertain-altua" dela kasuen % 52,5ean. Gure inportazioen % 71,4k maila teknologikoa dute. "Teknologikoak" deitutako produktu horiek egiterakoan nolabaiteko konplexutasuna dakartenak dira, eta, kasu askotan, batez ere maila altuetan, etengabeko ikerketa-ahalegina eta oinarri teknologiko sendoa eskatzen dute.

Informazio gehiago:

Eustat - Euskal Estatistika Erakundea / Instituto Vasco de Estadística C/ Donostia-San Sebastián, 1 01010 Vitoria-Gasteiz Prentsa-zerbitzua: servicioprensa@eustat.eus Tlf: 945 01 75 62