2024/07/19ko prentsa-oharra

KANPO-MERKATARITZAKO ESTATISTIKA (KAMME) 2024ko maiatza

Ondasunen esportazioak % 5,8 hazi ziren 2024ko maiatzean Euskal AEn

2024ko lehenengo bost hilabeteetan, oro har, esportazioak % 8,1 jaitsi egin dira, baina merkataritza-saldo positiboak 1.500 milioi eurotik gorakoa izaten jarraitu du

2024ko maiatzean, Euskal AEko ondasunen esportazioek % 5,8ko urte arteko hazkundea izan zuten, EUSTATen datuen arabera. Zenbatekoa 2.990 milioi eurokoa izan zen, aurreko urteko hilabete bereko 2.827 milioi euroen aldean. Ondasun energetikoen esportazioak % 170,3 handitu ziren eta ez-energetikoenak % 1,2 murriztu ziren.

Araban esportazioek % 17,6 egin dute behera; Bizkaian, aldiz, esportazioen hazkundea % 16,4koa izan da eta Gipuzkoan % 18,4koa.

Euskal AEko ondasunen inportazioek % 2,8ko jaitsiera izan zuten eta 2.402 milioi eurora iritsi ziren. Inportazio energetikoak % 36,9 hazi egin ziren eta ez-energetikoak % 13,2 murriztu.

Merkataritza-saldoa positiboa da (588 milioi) eta estaldura-tasa % 124,5ekoa da.

Araban inportazioak % 11,3 jaitsi dira, Gipuzkoan % 6,0 eta Bizkaian % 1,5 igo dira.

Produktuen araberako analisia (muga-zergen partidak)

Xehetasunetan arreta jarriz, hilabete honetan muga-zergen bost partida esportatzaile nagusiak hauek dira: "Petrolio-olio finduak" (285,3 milioi esportatu dira, aurreko urtean baino 193,1 milioi gehiago, hau da, % 209,6ko igoera); " Ibilgailu automobilen zatiak eta osagarriak " (211,4 milioi; 14,3 milioi gehiago eta % 7,2ko gehikuntza); "10 pertsona baino gutxiagoko automobilak" (188,8 milioi, baina 2023ko hilabete berean baino 74,6 milioi gutxiago, eta % 28,3ko murrizketa); "Salgaiak garraiatzeko ibilgailu automobilak" (115,5 milioi; 86,5 milioi gutxiago eta % 42,8ko murrizketa); eta "Kautxuzko pneumatiko berriak" (88,2 milioi; 34,1 milioi gutxiago eta % 27,9ko murrizketa). Partida horiek, maiatzean, guztizkoaren % 29,7 izan ziren, guztira 889 milioi euroko balioarekin.

Araban, "10 pertsona baino gutxiagoko automobilak" (-% 30,6) eta " Salgaiak garraiatzeko ibilgailu automobilak" (-% 42,9), muga-zergen bi partida nagusiek, beherakada nabarmenak izan dituzte aurreko urtearekin alderatuta, 79 milioi lehenengoarentzat eta 86 milioi bigarrenarentzat. "Hodi eta profil hutsak, soldadurarik gabeak, burdinazkoak edo altzairuzkoak" ere jaitsi egin dira (-% 32,9 eta 18,7 milioi gutxiago). Bestalde, hamar partida nagusietatik lau automobilaren sektorekoak dira eta guztizkoaren % 54 ordezkatzen dute.

Bizkaian, "Petrolio-olio finduak" (% 213,0 eta aurreko urteko aldi berean baino 192,5 milioi gehiago) eta "Arrantza-ontziak eta itsas produktuen tratamendurako lantegi-ontziak" (21,3 milioi euro esportatu dira) nabarmendu behar dira. Soilik "Kautxuzko pneumatiko berrien" esportazioek (-%64,5 eta 44,4 milioi gutxiago) egin dute behera, partidarik garrantzitsuenen artean.

Gipuzkoan nabarmentzekoak dira "Bidaiarien, ekipaje, posta eta abarren bagoiak trenbideetarako eta antzekoetarako" eta "Arrantza-ontziak eta itsas produktuen tratamendurako lantegi-ontziak" arloetan izandako igoerak, 43,3 eta 30,3 milioi esportatuta. "Makina erreminten eta forjatzeko, estanpatzeko, zizailatzeko, puntzonatzeko, entailatzeko, biribilkatzeko, kurbatzeko, tolesteko eta abarrerako prentsen" (% 912,5 eta 25,8 milioi gehiago), "Trenbideetarako automotorrak eta tranbia autopropultsatuen" (% 97,1 eta 20,7 milioi euro gehiago) eta "Aleatu gabeko burdinazko edo altzairuzko profilen" (% 29,2 eta 18,3 milioi gehiago) esportazioak ere hazi egin dira.

Inportazioak aztertuz gero, ikusten da garrantzitsuenak —"Petrolio edo mineral bituminosoko olio gordinak" (guztizkoaren % 21,9)— % 32,6ko hazkundea izan duela, 522,6 milioi inportatuz. Garrantzian horri darraion partida ere hazi egin da —"Petrolio-olio finduak" (% 90,5 eta 173,4 milioi)—, baina hurrengo zazpiek atzera egin dute, "Ibilgailu automobilen zatiak eta osagarriak" partidaren -% 5,1etik " Berotan ijeztutako produktu lauak, aleatu gabeko eta xaflatu edo estali gabeko burdinazkoak edo altzairuzkoak > 599 mm" partidaren -% 39,6ra.

Jatorri/helmuga herrialdeak, 2024ko maiatza

Hilabete honetan, ranking esportatzailearen lehen postuetan honako hauek daude:

-Frantzia: 433,7 milioi euroko balioa zuten ondasunak esportatu dira, % 238,3ko estaldura-tasarekin; 667 produktu moten artean, "Petrolio-olio finduak" (62,9 milioi), "Ibilgailu automobilen zatiak eta osagarriak" (27,8 milioi), "Kautxuzko pneumatiko berriak" (22,9 milioi) eta "Salgaiak garraiatzeko ibilgailu automobilak" (17,1 milioi) nabarmentzen dira.

-Alemania: 397,3 milioiko balioa duten produktuak jaso ditu gure erkidegotik, % 129,0ko estaldura-tasarekin. Aurreneko lekuetan agertzen dira "10 pertsona baino gutxiagoko automobilak" (110,0 milioi), "Ibilgailu automobilen zatiak eta osagarriak" (38,3 milioi), "Salgaiak garraiatzeko ibilgailu automobilak" (37,2 milioi) eta "Kautxuzko pneumatiko berriak" (14,4 milioi).

-Erresuma Batua: 246,5 milioi euroko balioagatik esportatu da, % 255,3ko estaldura-tasarekin. Nabarmentzekoak dira "Petrolio-olio finduak" (65,0 milioi), "Turborreaktoreak, turbopropultsatzaileak eta gainerako gas-turbinak, horien zatiak eta osagaiak barne" (24,9 milioi), "Xaflak, barrak, profilak, hodiak eta antzeko burdinurtuzko, burdinazko edo altzairuzko eraikuntzak" (24,1 milioi) eta "Aleatu gabeko burdinazko edo altzairuzko profilak" (11,5 milioi) muga-zergen partidak.

-Ameriketako Estatu Batuak: herrialde honetara 227,6 milioi euroko salmentak egin dituzte, % 169,9ko estaldura tasarekin. Aurreneko lekuan agertzen dira "Petrolio-olio finduak" (29,1 milioi), “Transformadore elektrikoak, bihurgailu estatikoak eta erreaktantzia-bobinak” (19,8 milioi), "Aleatu gabeko burdinazko edo altzairuzko profilak" (18,9 milioi) eta "Hodi eta profil hutsak, soldadurarik gabeak, burdinazkoak edo altzairuzkoak" (14,4 milioi).

-Italia: gure esportazioetatik 185,9 milioi herrialde horretara bideratu dira, eta estaldura-tasa % 160,6koa izan da. Herrialde horretan, "Petrolio-olio finduak" (16,5 milioi), "Kautxuzko pneumatiko berriak" (8,9 milioi), " Trenbideetarako automotorrak eta tranbia autopropultsatuak" (8,6 milioi) eta "Hamar pertsona edo gehiago —gidaria barne— garraiatzeko ibilgailuak" (7,9 milioi) izan dira gehien eskatu direnak.

Herrialde horiek esportazioen guztizkoaren % 49,5 hartzen dute; horietako lau EB27koak dira, eta erakunde horrek biltzen ditu esportazioen % 57,7.

Euskal AEko ondasunen kanpo-merkataritzak 1.503 milioi euroko saldo positiboa izan du 2024ko urtarriletik maiatzera bitarteko metaturako

Lehenengo bost hilabeteetan, eta Euskal AEko esportazioen kasuan, % 8,1eko jaitsiera erregistratu da aurreko urteko aldi beraren aldean, hau da, 1.146 milioi euro gutxiago izan dira. Esportazioen zenbatekoa, berriz, 13.056,3 milioikoa izan da aldi horretan.

Bizkaiko esportazioak Euskal AEko handienak dira, 5.112,7 milioi guztira; Gipuzkoakoak 4.0177,0 miloi eta Arabakoak 3.766,6 milioi.

Produktu mota kontuan hartuta, "Produktu ez-energetikoak" dira ugarienak, 12.114,6 milioirekin.

Xehetasunei erreparatuz, ikusten da muga-zergen partida nagusiak (999,7 milioi), "Ibilgailu automobilen zatiak eta osagarriak" izenekoak, % 6,2ko hazkundea izan duela, baina ia gainerako aurreneko hamarrek atzerakada esportatzailea izan dutela; atzerakada horiek, "Soldadurarik gabeko hodi eta profil hutsak, burdinazkoak edo altzairuzkoak" izan duen -% 40,4ren eta "Burdinazko edo altzairuzko gainerako manufakturak" izan duen -% 2,3ren artean eman dira.

Aipatutako multzoaren barruan, "Petrolio-olio finduak" atalean izan da esportazioen hazkunderik handiena (% 30,5; izan ere, 800 milioi esportatu dira, aurreko urteko aldi berean baino 187 milioi gehiago). Atzerapen handienak jada aipatu diren hauetan eman dira: "Soldadurarik gabeko hodi eta profil hutsak, burdinazkoak edo altzairuzkoak", "10 pertsona baino gutxiagoko automobilak" (-% 26,5, eta 350 milioi gutxiago) eta "Salgaiak garraiatzeko ibilgailu automobilak" (-% 30,5 eta 294,7 milioi gutxiago).

2024ko lehen bost hilabete hauetako rankingaren arabera, Frantzia da herrialde hartzaile nagusia, esportatutako guztizkoaren % 16,5ekin. Frantziaren atzetik daude Alemania (% 14,4) eta Erresuma Batua (% 7,3); horrela, hiru herrialde horien artean, euskal esportazioen ia % 40 biltzen da (% 38,1).

Euskal AE osorako inportazioen metatua 11.553,3 milioi euro ingurukoa da. Zifra horren urte arteko alderaketa eginez gero, ikusten da aurreko urteko aldi berean erregistratutakoa baino 284,4 milioi gutxiago dela. Jaitsiera hori, hein handi batean, Arabako lurraldean (2.389 milioiko inportazio metatuekin) aldi horretan % 9,5eko beherapena eman zelako gertatu da, hau da, 2023ko aldi berean baino 251,6 milioi gutxiago. Gipuzkoaren inportazioek ere atzera egin dute, 66 milioi gutxiago, eta guztira 2.223,9 milioi izan dira; baina Bizkaian hazi egin dira (33,3 milioi gehiago), eta guztira 6.940,5 milioi izan dira. "Produktu ez-energetikoen" inportazioa % 8 jaitsi da, baina "Produktu energetikoena" % 15 igo da.

Euskal AEko ondasunen kanpo-merkataritzak, 2024ko urtarriletik maiatzera, 1.503 milioi euroko saldo positiboa izan du, eta estaldura-tasa % 113 izatera heldu da.

Informazio gehiago nahi izanez gero:

Eustat - Euskal Estatistika Erakundea / Instituto Vasco de Estadística Donostia-San Sebastián kalea, 1 01010 Vitoria-Gasteiz Prentsa-zerbitzua: servicioprensa@eustat.eus Tel.: 945 01 75 62