2024/09/20ko prentsa-oharra

KANPO-MERKATARITZAREN ESTATISTIKA (KAMEE). 2024ko uztaila

Euskal AEko ondasunen esportazioak % 1,8 hazi ziren 2024ko uztailean

2024ko lehen zazpi hilabeteetako metatuan esportazioak % 6,2 jaitsi dira, baina merkataritza-saldo positiboa mantendu egin da, 2.289 milioi eurotik gora

2024ko uztailean, Euskal AEko ondasunen esportazioek % 1,8ko urte arteko hazkundea izan zuten, EUSTATen datuen arabera. Zenbatekoa 2.550 milioi eurokoa izan zen, aurreko urteko hilabete bereko 2.505 milioien aldean. Ondasun energetikoen esportazioak % 92,4 igo ziren eta ez-energetikoenak % 1,0 jaitsi.

Araban esportazioek % 8,3 egin dute behera, Gipuzkoan % 9,5 hazi dira eta Bizkaian % 4,7.

Euskal AEko ondasunen inportazioak % 0,4 jaitsi ziren eta 2.267 milioi eurora iritsi ziren. Inportazio energetikoek % 29,0 egin zuten behera eta ez-energetikoek % 12,6 egin zuten gora. Merkataritza-saldoa positiboa da (+282,9 milioi) eta estaldura-tasa % 112,5ekoa da.

Arabako inportazioak % 13,0 igo dira eta Gipuzkoakoak % 21,2, baina Bizkaikoak % 10,9 jaitsi dira.

Produktuen araberako analisia (muga-zergen partidak)

2024ko uztail honetan, muga-zergen bost partida esportatzaile nagusiak honako hauek izan dira: "10 pertsona baino gutxiagoko turismoak" (225 milioi, baina 2023ko hilabete berean baino 40,8 gutxiago, eta horrek % 15,4ko murrizketa dakar), "Ibilgailu automobilen zatiak eta osagarriak" (181,5 milioi, 2023an baino 24,3 gehiago, eta % 15,5eko hazkundea), "Salgaiak garraiatzeko ibilgailu automobilak" (131,8 milioi, 47,7 milioi gutxiago eta % 26,6ko beherapena), "Petrolio-olio finduak" (72 milioi esportatu dira, aurreko urtean baino 34,1 milioi gehiago, hau da, % 90,2ko igoera) eta "Kautxuzko pneumatiko berriak" (71,7 milioi esportaziorako salmentetan, eta 37,1 milioi gutxiago, % 34,1eko atzeraldia). Partida horiek guztizkoaren % 26,7 hartzen dute uztailean, eta guztira 681,9 milioi euroko balioa dute.

Araban, muga-zergen bi partida nagusiek ("10 pertsona baino gutxiagoko turismoak" (%-8,6) eta "Salgaiak garraiatzeko ibilgailu automobilak" (%-26,5) atzerapen nabarmenak izan dituzte aurreko urtearen aldean, 19,9 milioi lehenengoaren aldean eta 47,6 bigarrenaren aldean. Gehien hazi den partida D % 54,9) "Elektrizitatea kontrolatzeko edo banatzeko koadroak, panelak eta euskarriak" izan da.

Bizkaian "Petrolio olio gordinak edo mineral bituminosoarenak" nabarmendu behar dira, aurreko urteko aldi berean baino 33,7 milioi gehiago (% 171,2ko hazkundea) eta "Petrolio olio finduenak", 35,0 milioi gehiago eta % 101,5eko hazkundea. Bestalde, "Kautxuzko pneumatiko berrien" esportazioak (-%61,9 eta 41 milioi gutxiago) eta "Aduana-arantzelan berariaz jasota ez dauden merkantzien" esportazioak (-%30,2 eta 10,8 milioi gutxiago) nabarmen egin dute atzera partida garrantzitsuenen artean.

Gipuzkoan, aipagarriak dira "Bidaiarien autoak, bagajeak, posta, etab. trenbideetarako eta antzekoetarako" eta "Igogailuak, eskailera mekanikoak, garraiatzaileak, etab.", 37,1 eta 29,9 milioi esportatu baitituzte, hurrenez hurren. Aitzitik, "Aleatu gabeko burdinazko edo altzairuzko profilen" esportazioak murriztu egin dira (-%8,7 eta 4,4 milioi gutxiago).

Inportazioak aztertuta, ikusten da garrantzitsuenak, "Petrolio edo mineral bituminosoko olio gordinak" (guztizkoaren % 18), % 8,9 jaitsi direla, 408,9 milioi inportatuta. Garrantzian horren atzetik doan partida ere nabarmen jaitsi da, "Petrolio-olio finduak" (% 23,6 jaitsi da, 28,2 milioi gutxiagorekin). Aitzitik, tradizioz gure esportazioen parte ziren hiru produktu nabarmen hazi dira: "10 pertsona baino gutxiagoko turismoak" (33,5 milioi Arabatik ia osorik erosita), "Xaflaz, barraz, profilez, hodiz eta antzeko burdinurtuz, burdinaz edo altzairuz egindako eraikuntzak" (30,6 milioi inportatuta) eta "Berotan ijeztutako produktu lauak, aleatu gabeko eta txapatu edo estali gabeko burdinazkoak edo altzairuzkoak > 599 mm" (72,4 milioi).

Jatorri-helmuga herrialdeak, 2024ko uztaila

Hilabete honetan, honako hauek dira ranking esportatzailearen lehen postuak:

- Frantzia: 394,1 milioi euroko ondasunak esportatu dira herrialde horretara, % 217,9ko estaldura-tasarekin.

- Alemania: 365,5 milioiko balioa duten produktuak jasotzen ditu gure erkidegotik, % 97,5eko estaldura-tasarekin.

- Erresuma Batua: 171,9 milioi euroko balioarekin esportatzen da, % 161,1eko estaldura-tasarekin.

- Estatu Batuak: gure esportazioen 157,1 milioi herrialde horretara bideratu dira, % 130,9ko estaldura-tasarekin.

- Italia: herrialde horretara bideratutako salmentak 134,4 milioira iritsi dira, % 141,1eko estaldura-tasarekin.

Herrialde horiek esportazio guztien % 48 hartzen dute, eta horietako hiru 27. EBkoak dira, eta erakunde horrek esportazioen % 57,9 biltzen ditu.

Euskal AEko ondasunen kanpo-merkataritzak 2.289 milioi euroko saldo positiboa izan du 2024ko urtarriletik uztailera arteko metaturako

Lehenengo zazpi hilabeteetan, eta Euskal AEko esportazioen kasuan, % 6,2ko jaitsiera erregistratu da aurreko urteko aldi beraren aldean, hau da, 1.219,8 milioi euro gutxiago. Esportazioen zenbatekoa 18.376,3 milioikoa izan da aldi horretan.

Bizkaiko esportazioak Euskal AEko handienak dira (7.132,1 milioi), Gipuzkoan 5.891,2 milioi eta Araban 5.353,0 milioi.

Produktu-mota kontuan hartuta, "Produktu ez-energetikoak" dira ugarienak, 17.120,2 milioi eurorekin.

Xehetasunetara jaitsita, muga-zergen partida nagusiak (1.466 milioi), "10 pertsona baino gutxiagoko turismoak" izenekoak, % 22,7ko jaitsiera izan du, eta aldi horretako muga-zergen hamar partida garrantzitsuenen artean nagusi da, "Burdinazko edo altzairuzko gainerako manufakturak" atalaren % 3,3tik "Soldadurarik gabeko hodi eta profil hutsak, burdina edo altzairuzkoak" atalaren % 35,3ra bitarteko atzerapenekin. Atzerakadarik handienak, azken horretan ez ezik, "Salgaiak garraiatzeko ibilgailu automobiletan" (-%31,6 eta 425,9 milioi gutxiago) eta "Kautxuzko pneumatiko berrietan" (-%26,0, 226,8 milioi gutxiago) gertatu dira.

Aipatutako multzoaren barruan, esportazioen hazkunde handiena "petrolio-olio finduetan" gertatu da (% 32,1, 952 milioi esportatuta eta 231 milioi gehiago aurreko urteko aldi berean baino).

2024ko lehen zazpi hilabete hauetako rankingaren arabera, Frantzia da herrialde hartzaile nagusia, esportatutako guztizkoaren % 16,3arekin (3.001,2 milioi). Frantziaren atzetik daude Alemania (% 14,5 eta 2.659,3 milioi) eta Erresuma Batua (% 7,3 eta 1.332,8 milioi). Horrela, hiru herrialdeen artean, euskal esportazioen ia % 40 biltzen dira (% 38,1).

Euskal AE osorako inportazioen metatua 16.087 milioi euro ingurukoa da. Zifra horren urte arteko alderaketa eginez gero, ikusten da 395,7 milioi txikiagoa dela aurreko urteko aldi berean erregistratutakoa baino. Jaitsiera hori, hein handi batean, Arabako lurraldean, 3.533,8 milioiko inportazio metatuekin, aldi horretan % 5,2ko beherapena izan delako gertatu da, hau da, 193,5 milioi gutxiago 2023ko aldi berean baino. Bizkaiko inportazioek ere atzera egin dute, 218,2 milioi gutxiago (-%2,3), 9.388,3 milioi guztira. Gipuzkoan % 0,5eko hazkunde txikia izan da (16 milioi gehiago), guztira 3.164,9 milioirekin. "Produktu ez-energetikoen" inportazioa % 4,9 jaitsi da, baina "Produktu energetikoena" % 5,0 igo da.

Euskal AEko ondasunen kanpo-merkataritzak, 2024ko urtarriletik uztailera, 2.289,4 milioi euroko saldo positiboa izan du, eta estaldura-tasa % 114,2koa.

Informazio gehiago:

Eustat - Euskal Estatistika Erakundea / Instituto Vasco de Estadística C/ Donostia-San Sebastián, 1 01010 Vitoria-Gasteiz Prentsa-zerbitzua: servicioprensa@eustat.eus Tlf: 945 01 75 62