2024/08/19ko prentsa-oharra

KANPO-MERKATARITZAKO ESTATISTIKA (ECOMEX). 2024ko ekaina

Euskal Autonomia Erkidegoan ondasunen esportazioek % 4,1 egin zuten behera 2024ko ekainean

2024ko lehen sei hilabeteetako metatuan esportazioak % 7,4 jaitsi dira, baina merkataritza-saldo positiboari eutsi zaio, 2.000 milioi eurotik gorakoa

EUSTATen datuen arabera, 2024ko ekainean, Euskal Autonomia Erkidegoko ondasunen esportazioek % 4,1 egin zuten behera urte arteko datuei erreparatuta. 2.770 milioi euroko esportazioak izan ziren, aurreko urteko hil berean 2.889 milioi euro izan zirenean. Ondasun energetikoek % 116,6 egin zuten gora eta ez-energetikoek % 7,5 egin zuten behera.

Arabako esportazioek % 15,1 egin zuten behera eta Gipuzkoakoek % 6,9; aitzitik, Bizkaian esportazioek % 8,8 egin zuten gora.

Euskal Autonomia Erkidegoko ondasunen inportazioek % 4,3ko beherakada izan zuten, eta 2.266 milioi eurokoak izan ziren. Inportazio energetikoek % 3,5 egin zuten bera eta ez-energetikoek % 4,5. Merkataritza-saldoa positiboa da (+503,5 milioi) eta estaldura-tasa % 122,2koa da.

Arabako inportazioek % 0,9 egin zuten behera eta Bizkaikoek % 7,6; Gipuzkoek, aitzitik, % 0,4 egin zuten gora.

Produktuen araberako analisia (muga-zergen partidak)

Xehetasunetan arreta jarriz, hilabete honetan hauek dira muga-zergen bost esportazio-partida nagusiak: “10 pertsona baino gutxiagoko automobilak” (269,6 milioi, baina 2023ko hilabete berean baino 39,2 milioi gutxiago, eta % 12,7ko murrizketa); “Ibilgailu automobilen zatiak eta osagarriak” (195,7 milioi; 29,8 milioi gutxiago eta % 13,2ko murrizketa); “Salgaiak garraiatzeko ibilgailu automobilak” (118,6 milioi; 83,5 milioi gutxiago eta % 41,3ko murrizketa); “Petrolio-olio finduak” (80,1 milioi esportatu dira, aurreko urtean baino 10,1 milioi gehiago, hau da, % 14,4ko gehikuntza); eta “Petrolio edo mineral bituminosoko olio gordinak” (79,0 milioi merkaturatuak; 75,9 miloi gehiago). Partida horiek, ekainean, esportatutakoaren guztizkoaren % 26,8 izan ziren, guztira 742,8 milioi euroko balioarekin.

Araban, muga-zergen bi partida nagusiek, “10 pertsona baino gutxiagoko automobilak” (-% 15,2) eta “Salgaiak garraiatzeko ibilgailu automobilak” (-% 41,4), beherakada nabarmenak izan dituzte aurreko urtearekin alderatuta, 41 milioi lehenengoak eta 83,5 milioi bigarrenak. “Hodi eta profil hutsak, soldadurarik gabeak, burdinazkoak edo altzairuzkoak” partida ere jaitsi egin da (-% 32,7 eta 20 milioi gutxiago). Hau da gehien hazi den partida (% 213,9): “Aluminiozko manufakturak: burdin-sareak, puntak, torlojuak, azkoinak, errematxeak, larakoak eta antzeko gaiak”.

Bizkaian, nabarmentzen da “Petrolio edo mineral bituminosoko olio gordinak” partidaren igoera, aurreko urteko aldi berean baino 75,9 milioi gehiago, eta “Metala lantzeko mekanizazio-zentroak”, 24,4 milioi euroko esportazioarekin. Partida nagusien artean, “Kautxuzko pneumatiko berriak” partidako esportazioek soilik egin dute nabarmen atzera (% 67,6 eta % 51,4 milioi gutxiago).

Gipuzkoan, adierazgarriak dira partida hauetan izan diren igoerak: “Bidaiarien, ekipaje, posta eta abarren bagoiak trenbideetarako eta antzekoetarako” eta “Beste kapitulu batean sartzen ez diren beste makina eta aparatu mekaniko batzuk” 24,1 eta 19 milioi esportaturekin, hurrenez hurren. Haatik, atzera egin dute “Ibilgailu automobilen zatiak eta osagarriak” partidak (-% 16,1 eta 14,4 milioi euro gutxiago) eta “Burdinazko edo aleatu gabeko altzairuzko profilak” partidak (-% 39,4 eta 29,3 milioi euro gutxiago).

Inportazioak aztertuta, ikusten da partidarik garrantzitsuenak, “Petrolio edo mineral bituminosoko olio gordinak” partidak (guztizkoaren % 15,6), % 9,7 egin duela behera, 354,1 milioi euroko inportazioekin. Hurrengo partidarik garrantzitsuenak, “Petrolio-olio finduak”, igoera nabarmena izan du (% 42,7ko igoera eta 127,8 milioi inportatu), baita “10 pertsona baino gutxiagoko automobilak” partidak ere (57,3 milioi, ia guztiak Arabatik).

Jatorri/helmuga herrialdeak, 2024ko ekaina

Hilabete honetan, esportatzaileen sailkapenaren lehen postuetan honako hauek daude:

- Frantzia: 457,2 milioi euroko balioa duten ondasunak esportatu dira, % 252,3ko estaldura-tasarekin.

- Alemania: gure Erkidegotik 418,5 milioi euroko balioa duten produktuak jaso ditu, % 114,2ko estaldura-tasarekin.

- Erresuma Batua: 207,5 milioi euroko balioa duten esportazioak egin dira, % 434,0ko estaldura-tasarekin.

- Italia: herrialde horretara 174,9 milioi euroko esportazioak bideratu dira, eta % 154,3ko estaldura-tasa lortu da.

- Ameriketako Estatu Batuak: herrialde horretara zuzendutako salmentak 166,4 milioi eurokoak izan dira, % 198,9ko estaldura-tasarekin.

Herrialde horiek esportazioaren guztizkoaren % 51,4 hartzen dute; horietako lau EB27koak dira, eta erakunde horrek biltzen ditu esportazioen % 61,9.

Euskal Autonomia Erkidegoko ondasunen kanpo-merkataritzak 2.006 milioi euroko saldo positiboa izan du 2024ko urtarriletik ekainera bitarteko metatuan

Lehenengo sei hilabeteetan, eta Euskal Autonomia Erkidegoko esportazioetarako, % 7,4ko jaitsiera erregistratu da aurreko urteko aldi beraren aldean, hau da, 1.264,8 milioi euro gutxiago izan dira. Esportazioen zenbatekoa, berriz, 15.826,3 milioikoa izan da aldi horretan.

Euskal Autonomia Erkidegoan, Bizkaiko esportazioak dira handienak 6.217,4 milioirekin, eta gero datoz Gipuzkoakoak 5.034,7 milioirekin eta Arabakoak 4.574,3 milioirekin.

Produktu mota kontuan hartuta, “Produktu ez-energetikoak” dira ugarienak 14.714,1 milioi eurorekin.

Xehetasunei erreparatuz, ikusten da muga-zergen partida nagusiak (1.241 milioi), “10 pertsona baino gutxiagoko automobilak”, % 23,9ko beherakada izan duela, aurreneko lehen hamar muga-zergen artean nagusi den joeraren bidetik; atzerakada horiek “Soldadurarik gabeko hodi eta profil hutsak, burdinazkoak edo altzairuzkoak" izan duen -% 40,0ren eta “Burdinazko edo altzairuzko gainerako manufakturak” izan duen -% 3,5en artekoak izan dira.

Aipatutako multzoaren barruan, “Petrolio-olio finduak” atalean izan da esportazioen hazkunderik handiena (% 28,8; guztira 880 milioi esportatu dira, aurreko urteko aldi berean baino 197 milioi gehiago). Beherakadarik handienak aurrez aipatutako partida hauetan izan dira: “Soldadurarik gabeko hodi eta profil hutsak, burdinazkoak edo altzairuzkoak”, "Salgaiak garraiatzeko ibilgailu automobilak" (-% 32,3 eta 378,3 milioi gutxiago) eta “Kautxuzko pneumatiko berriak” (-% 24,8 eta 189,7 milioi gutxiago).

2024ko lehen sei hilabete hauetako sailkapenaren arabera, Frantzia da herri hartzaile nagusia, esportatutako guztiaren % 16,5 hartzen baitu. Frantziaren ondoren datoz Alemania (% 14,5) eta Erresuma Batua (% 7,3). Hiru herrialde horien artean euskal esportazioen ia % 40 hartzen dute (% 38,3).

Euskal Autonomia Erkidegoan ondasunen inportazioen metaketa 13.819,8 milioi euro ingurukoa da. Zifra horren urte arteko alderaketa eginez gero, ikusten da aurreko urteko aldi berean erregistratutakoa baino 385,9 milioi gutxiago dela. Jaitsiera hori, hein handi batean, Arabako lurraldean aldi horretan izan den % 7,9ko beherapenaren ondoriozkoa da —2.981 milioiko inportazio metatuekin, hau da, 2023ko aldi berean baino 257 milioi gutxiago—. Atzera egin dute Gipuzkoako inportazioek ere, 64,4 milioi gutxiago (-% 2,3), guztira 2.704 milioirekin, eta Bizkaikoek (64,5 milioi gutxiago, -% 0,8), guztira 8.134 milioirekin. “Produktu ez-energetikoen” inportazioak % 7,4 egin du behera, baina “produktu energetikoenak” % 12,1 egin du gora.

Euskal Autonomia Erkidegoko ondasunen kanpo-merkataritzak 2.006,5 milioi euroko saldo positiboa izan du 2024ko urtarriletik ekainera bitartean, eta % 114,5eko estaldura-tasa izan du.

Informazio gehiago:

Eustat - Euskal Estatistika Erakundea Donostia kalea, 1. 01010 Gasteiz Prentsa-zerbitzua: servicioprensa@eustat.eus Tel: 945 01 75 62