2025/01/20ko prentsa-oharra

KANPO-MERKATARITZAKO ESTATISTIKA (ECOMEX) 2024ko azaroa

Ondasunen esportazioak % 20,1 murriztu ziren 2024ko azaroan Euskal AEn

2024ko lehenengo hamaika hilabeteetan, oro har, esportazioak % 5,1 jaitsi dira, baina 28.700 milioi eurotik gorakoak dira

2024ko azaroan, Euskal AEko ondasunen esportazioek % 20,1 egin zuten behera urte arteko tasan, EUSTATen datuen arabera. Zenbatekoa 2.519 milioi eurokoa izan zen, aurreko urteko hilabete bereko 3.152 milioi euroen aldean. Energia-produktuen esportazioak % 83,8 jaitsi ziren eta ez-energetikoenak % 12,2.

Bizkaia da atzerakada handiena izan duen lurralde historikoa (-% 34,0), produktu ez-energetikoen esportazioak (-% 15,5) eta, batez ere, energetikoenak (-% 84,2) jaitsi direlako. Gipuzkoan, oro har, esportazioak % 13,1 jaitsi dira eta Araban % 8,1.

Euskal AEko ondasunen inportazioek % 2,7ko hazkundea izan zuten, 2.281 milioi eurora iritsiz. Inportazio energetikoak % 5,4 murriztu egin ziren eta ez-energetikoak % 5,8 hazi ziren. Lurraldeka, Arabako inportazioek % 22,9 egin dute gora, eta Gipuzkoakoek % 2,6 eta Bizkaikoek % 3,0 egin dute behera.

Lau esportazio-partida nagusiak, 731,5 milioi euro merkaturatuta, automobilaren sektorekoak dira, baina % 18,1 galdu dute 2023ko azaroarekin alderatuta

Xehetasunak aztertuz, ikusten da 988 esportazio-partiden rankingaren buruan honako hauek daudela: "10 pertsona baino gutxiagoko turismoak", 328,8 milioi merkaturatuta eta % 8,6ko atzerapenarekin aurreko urteko hilabete beraren aldean; "Ibilgailu automobilen zatiak eta osagarriak", 178,1 milioi esportatuta —aurreko urteko hilabete berean baino % 16,8 gutxiago—; "Salgaiak garraiatzeko ibilgailu automobilak", 143,9 milioi —% 27,8 jaitsi da—; "Kautxuzko pneumatiko berriak", 80,7 milioi —% 33,0 jaitsi da—; eta "Hodietarako txorroten, balbula eta antzeko organoen artikuluak", 56,1 milioi, —% 21,4 hazi da—.Bost partida horiek, azaroan, salerositako guztiaren % 31,3 hartzen dute, guztira 787,7 milioi euroko balioarekin; horietatik 731,5 milioi euro automobilaren sektoreari dagozkio, baina % 18,1 galdu dute 2023ko azaroarekin alderatuta.

Lehenengo 25 posizioetan dauden partiden artean, nabarmentzekoak dira "Trenbideetarako eta antzekoetarako bidaiari-autoak, bagajeak, posta eta abar" (% 4.912,5), "Xafla, barra, profil, hodi eta antzeko burdinurtuzko, burdinazko edo altzairuzko eraikuntzak" (% 152,6) eta "Findu gabeko kobrea; finketa elektrolitikorako kobrezko anodoak" (% 135,3). Aipatzekoa da, baita ere, “Petrolio-olio finduen” jaitsiera, 39,2 milioi esportatu baitira —% 87,2 gutxiago—.

Azaroan, Alemania, Frantzia, Erresuma Batua, Belgika eta Italia izan ziren Euskal AEren bezero nagusiak, esportazio guztien % 48,5 hartzen baitute. Bost herrialde horietatik lau EB-27koak dira; Bertan, esportazioaren % 61,5 biltzen da.

Araban, muga-zergen partida nagusitik —"10 pertsona baino gutxiagoko turismoak"— 309,6 milioi euroko balioaz esportatu da, eta aurreko urteko mailatik % 5,7 hazi da; baina ondoren datorren partidak —"Salgaiak garraiatzeko ibilgailu automobilak"— % 28,0 egin du atzera. Halaber, kasu honetan % 28,9 jaitsi da "Soldadurarik gabeko burdinazko edo altzairuzko hodi eta profil hutsen" esportazioa, hau da, 2023ko azaroan baino 14,8 milioi euro gutxiago.

Bizkaian, nabarmentzekoa da "Petrolio-olio finduen" esportazioen beherakada —266,5 milioi euro gutxiago—, hau da, % 87,7ko jaitsiera. "Kautxuzko pneumatiko berriak" (27,3 milioi euro esportatu eta aurreko urtean baino 43,8 milioi euro gutxiago, hau da, % 61,6 gutxiago), eta "10 pertsona baino gutxiagoko turismoak" (% 71,6 gutxiago eta 46,2 milioi euro gutxiago).

Gipuzkoan igoera nabarmenak izan dituzte "Hodietarako txorroten, balbula eta antzeko organoen artikuluek" eta "Trenbideetarako eta antzekoetarako bidaiari-autoek, bagajeek, postak eta abarrek", 40,6 eta 31,1 milioi esportatu baitituzte, hurrenez hurren. Hala ere, % 18,8 murriztu dira "Ibilgailu automobilen zatiak eta osagarriak" (2023ko azaroan baino 16,8 milioi euro gutxiago) eta % 20,2 "Aleatu gabeko burdinazko edo altzairuzko profilak" (11,3 milioi euro gutxiago).

"Petrolio-olio finduen" inportazioak % 209,5 igo dira 2024ko azaroan

Inportazioak muga-zergen partiden arabera aztertuz gero, ikusten da garrantzitsuenak, "Petrolio edo mineral bituminosoko olio gordinak" (guztizkoaren % 16,5) % 29,3ko jaitsiera izan duela. Aitzitik, hazkunde esanguratsua izan dute "Salgaiak garraiatzeko ibilgailu automobilen" (66,8 milioiko balioagatik, hau da, 2023ko aldi berean baino % 1.558,7 gehiago), "Petrolio-olio finduen" (% 209,5 igo dira, 154,2 milioiko balioagatik inportatu baitira) eta "Petrolio-gas eta gainerako hidrokarburo gaseosoen" (% 55,1 gehiago eta 46,6 milioi erosi dira) inportazioek.

Hil honetan, inportazio handienak herrialde hauetatik egin dira, hurrenkera honetan: Alemania 380,4 milioi, Frantzia 174,2 milioi, Txina 165,4 milioi, Mexiko 116,0 milioi eta Italia 113,4 milioi.

2024ko lehen hamaika hilabeteetan, ondasunen kanpo-merkataritzak 3.609 milioi euroko saldo positiboa izan du, aurreko urteko aldi berean baino ia 1.600 milioi euro gutxiago

Urteko lehenengo hamaika hilabeteetan, Euskal Autonomia Erkidegoko esportazioak % 5,1 jaitsi dira aurreko urteko aldi beraren aldean, hau da, 1.541 milioi gutxiago. Horrek esan nahi du merkataritza-saldoa 1.596 milioi euro murriztu dela, aurreko urteko aldi berean erregistratutakoaren aldean.

Bizkaiko esportazioak, aztertutako aldian, Euskal AEko garrantzitsuenak dira, 11.094,4 milioiko guztizko metatuarekin eta % 2,7ko jaitsierarekin. Araban, 8.413,6 milioi merkaturatu dira, eta % 12,2ko murrizketa izan da. Urteko metatuan, Gipuzkoak izan du portaerarik onena: %0,8 egin du behera, eta 9.215,9 milioi euro esportatu dira. Produktu-mota kontuan hartuta, “Produktu ez-energetikoak”, 26.830,1 milioi salduta, % 6,1 jaitsi direla ikusten dugu. “Energia-produktuek”, aldiz, %12,2ko hazkundea izan dute, 1.893,9 milioira iritsi arte.

Xehetasunak aztertuta, muga-zergen partida nagusia (2.505 milioi esportatu dira) "10 pertsona baino gutxiagoko turismoena" da, % 16,3ko atzerakada izan duen arren. Jarraian, "Ibilgailu automobilen zatiak eta osagarriak" daude, % 2,9ko hazkundearekin, 2.157 milioi eurora iritsiz; ondoren, "Salgaiak garraiatzeko ibilgailu automobilak", 1.369 milioirekin eta % 31,6ko jaitsierarekin. Hamar muga-zergen partida nagusien artean esportazioen hazkunde handiena (% 248,1) "Petrolio edo mineral bituminosoko olio gordinak" arloan izan da, 385,8 milioi esportatu baitira, aurreko urteko aldi berean baino 275 milioi euro gehiago.

"Petrolio-olio finduak" % 10,1 murriztu dira eta "Kautxuzko pneumatiko berriak" % 28,5, hau da, zifra absolutuetan, 2023ko azaroan baino 142,6 eta 384,7 milioi gutxiago. Beste jaitsiera aipagarri bat "Soldadurarik gabeko burdinazko edo altzairuzko hodi eta profil hutsetan" gertatu da, 195 milioi jaitsi (% 29,1) baitira aurreko urtearen aldean.

2024ko lehen hamaika hilabetetako esportazio-rankingaren arabera, Frantzia da herrialde hartzaile nagusia, esportatutako guztizkoaren % 15,9arekin. Frantziaren atzetik daude Alemania (% 14,4) eta Erresuma Batua (% 7,1); horrela, hiru herrialde horien artean, euskal esportazioen % 37,4 biltzen da.

Euskal AE osorako inportazioen metatua 2024ko azarora arte 25.114,9 milioi eurotara iristen da. Zifra horren urte arteko alderaketa eginez gero, ikusten da 2023ko aldi berean erregistratutakoa baino 55 milioi gehiago dela.

Hauek dira ranking inportatzaileko lehen hiru postuetan dauden produktuak: "Petrolio edo mineral bituminosoko olio gordinak", 4.606,8 milioi inportatuak (guztiaren % 18,3); "Petrolio-olio finduak", 1.591 milioi inportatuak (guztiaren % 6,3); eta "Ibilgailu automobilen zatiak eta osagarriak", 895,3 milioi inportatuak (guztiaren % 3,6).

Euskal AEko ondasunen kanpo-merkataritzak, 2024ko lehenengo hamaika hilabeteetan, 3.609 milioi euroko saldo positiboa izan du, aurreko urteko aldi berean baino 1.596 milioi gutxiago, eta estaldura-tasa % 114,4koa izan da. Tasa hori 100etik gora dago, hau da, inportatzen duguna baino gehiago esportatzen dugu, 27-EBko ia herrialde guztiekin alderatuta, Irlanda (% 13,8), Luxenburgo (% 88,5), Finlandia (% 89,4), Letonia (% 52,4) eta Bulgariaren (% 96,6) kasuetan izan ezik.

Ranking esportatzailearen lehen postuetan dauden herrialdeen kasuan, tasa hori % 111,7koa da Alemaniaren kasuan, % 228,5ekoa Frantziaren kasuan eta % 326,7koa Erresuma Batuaren kasuan.

Informazio gehiago:

Eustat - Euskal Estatistika Erakundea / Instituto Vasco de Estadística C/ Donostia-San Sebastián, 1 01010 Vitoria-Gasteiz Prentsa-zerbitzua: servicioprensa@eustat.eus Tlf: 945 01 75 62