2025/06/23ko prentsa-oharra

KANPO-MERKATARITZAREN ESTATISTIKA (KAMEE). 2025eko apirila

Euskal AEko esportazioek % 4,5 egin dute gora 2025eko apirilean

1.132 milioi euroko merkataritza-saldo positiboarekin, % 2,3koa izan da hazkunde metatuta 2025eko lehen lau hilabeteetan

Eustaten datuen arabera, Euskal AEko ondasunen esportazioak 2.652 milioi eurokoak izan ziren 2025eko apirilean, aurreko urteko hil berean baino % 4,5 handiagoak. Energiazkoak ez diren esportazioek % 1,7 egin zuten gora eta energiazkoek % 57,3.

Inportazioen kasuan, % 14,0ko beherapena izan da, energiazkoak ez diren produktuen kasuan % 7,8koa eta energia-produktuen kasuan % 27,8koa.

2025eko apirilean, merkataritza-saldoa positiboa izan zen 378 milioi eurorekin eta % 116,6ko estaldura-tasarekin.

Hilabete horretan Bizkaiko esportazioek % 3,2 egin dute behera, Gipuzkoan % 11,1 igo dira eta Araban ere % 8,1 igo dira. Esportazio energetikoak, Bizkaian, % 58,3 hazi dira aurreko urteko hil beraren aldean.

2025eko apirilean merkaturatutako produktuak

Produktuen xehetasunetara jaitsiz gero, muga-zergen hamar partida nagusiek esportazioen % 41,2 biltzen dutela ikusten da, guztira 1.093 milioi euro.

Muga-zergen 25 partida nagusien taldearen barruan, nabarmentzekoak dira lau partidatan erregistratutako hazkundeak: "Petrolioaren olio finduak" (% 83,8, 192,6 milioi esportatuta), "10 pertsona baino gutxiagoko turismoak" (% 59,2 eta 268,5 milioi esportatuta, hau da, guztizkoaren % 10,1 eta esportazioen rankingean lehen postuan), "Burdinbide eta antzekoetarako ibilgailuen parteak" (% 433,1 eta 104,1 milioi esportatuta) eta "Trenbideetarako eta antzekoetarako bidaiarien autoak, ekipaje-furgoiak, posta-autoak eta bestelakoak", 57,8 milioi esportatuta, aurreko urteko hil bereko 257 mila euroen aldean.

Kontrako noranzkoan, "Kautxuzko pneumatiko berriak" % 28,5 jaitsi dira, "Zamak garraiatzeko ibilgailu automobilak" % 12,5 eta "Automobilentzako zati eta osagarriak" % 12,0.

Inportazioen kasuan, eta muga-zergen 25 partida garrantzitsuenei dagokienez, honako hauetan metatu dira hazkunde esanguratsuenak: "Zamak garraiatzeko ibilgailu automobilak" (% 782,5, 21,5 milioi inportatuta, batez ere Alemaniatik, 18,2 milioi), "10 pertsona baino gutxiagoko turismoak" (% 298,2 eta 45,9 milioi inportatuta, batez ere Alemaniatik, 32,7 milioi) eta "Petrolioaren olio finduak" (% 26,2, 188,7 milioi inportatuta honako herrialde hauetatik: Kuwaitetik 60,5 milioi, Estatu Batuetatik 54,9 milioi, Saudi Arabiatik 49,2 milioi eta Indiatik 18,1 milioi, besteak beste).

Aitzitik, atzera egin dute honako hauen inportazioek: "Petrolioaren edo mineral bituminosoaren olio gordinak" (% -39,0, nahiz eta inportazioen rankingean lehenengo postuan egon 359,4 milioirekin, hau da, guztizkoaren % 15,8), "Petrolio-gasa eta gainerako hidrokarburo gaseosoak" (% -44,8 eta 43,6 milioi inportatuta, ia guztia Errusiatik), "Automobilentzako zati eta osagarriak" (% -25,3 eta 63,2 milioi, erdia Alemaniatik, 33,8 milioi) eta "Beroan ijetzitako produktu lauak, aleatu gabeko eta txapatu edo estali gabeko burdinazkoak edo altzairuzkoak > 599 mm" (% -42,9 eta 45,4 milioi).

ARABA. 2025eko apirileko esportazioak

Araban, esportazioak % 8,1 igo dira aurreko urteko hil beraren aldean. Horren arrazoia, funtsean, honako hauen salmenten portaera ona izan da: "10 pertsona baino gutxiagoko turismoak" (253,5 milioi euro eta % 53,0ko igoera aurreko urteko hil beraren aldean), "Hodi eta profil hutsak, soldadurarik gabe, burdinazkoak edo altzairuzkoak" (41,2 milioi eta % 30,7), "Burdinbide eta antzekoetarako ibilgailuen parteak" (7,8 milioi eta % 227,2) eta "Motorra duten edo ez duten aireontzien zatiak, tripulatuak izan edo ez, eta satelite eta ibilgailu espazialen zatiak" (15,4 milioi eta % 63,7).

Bestalde, "Zamak garraiatzeko ibilgailu automobilak" % 12,6 jaitsi dira, nahiz eta 95,8 milioi euro saldu diren. "Kautxuzko pneumatiko berriek" ere behera egin dute (-%28,1).

BIZKAIA. 2025eko apirileko esportazioak

Bizkaiko lurralde historikotik egindako esportazioek % 3,2 egin dute behera, besteak beste, "Automobilentzako zatiak eta osagarriak" (% -13,4 eta 9,1 milioi gutxiago) edo "Kautxuzko pneumatiko berriak" (-%29,3 eta 9,4 milioi gutxiago) bezalako produktuetan izandako beherapenen ondorioz.

Kontrako noranzkoan, nabarmen hazi dira "Petrolioaren olio finduak" (% 85,4, aurreko urteko hil berean baino 87,6 milioi gehiago), "Soja-olioa" (% 135,0 eta 19,8 milioi gehiago) edo "Erabilera tekniko industrialetarako animalia edo landare jatorriko koipeak eta olioak" (% 612,7 eta 15,2 milioi gehiago).

GIPUZKOA. 2025eko apirileko esportazioak

Gipuzkoako esportazioak % 11,1 hazi dira hilabete honetan, produktu nagusi gehienek portaera ona izan dutelako, hala nola: "Burdinbide eta antzekoetarako ibilgailuen parteak" (% 451,6 eta aurreko urteko hil berean baino 74,2 milioi gehiago), "Motor eta sorgailu elektrikoak (talde elektrogenoak izan ezik)" (% 231,2 eta 16,4 milioi gehiago) eta " Trenbideetarako eta antzekoetarako bidaiarien autoak, ekipaje-furgoiak, posta-autoak eta bestelakoak " (57,8 milioi esportatu dira).

2025eko apirileko xede-herrialdeak

Hilabete honetan, esportazio-rankingeko lehenengo postuetan honako hauek daude:

- Frantzia: 409,1 milioi euroko ondasunak esportatu diren herrialdea eta % 215,5eko estaldura-tasarekin.

- Alemania: 359,2 milioiko balioa duten Euskal AEko produktuak jasotzen ditu, % 101,5eko estaldura-tasarekin.

- Italia: herrialde horretara bideratutako salmentak 160,9 milioira iritsi dira, eta estaldura-tasa % 164,5 izan da.

- Estatu Batuak: 151,3 milioi euroko balioarekin esportatu da, % 78,7ko estaldura-tasarekin.

- Erresuma Batua: 147,9 milioi euro bideratu dira herrialde horretara, eta % 285,0ko estaldura-tasa lortu da.

Herrialde horiek esportazio guztien % 46,3 hartu dute, eta horietako hiru EB-27koak dira, hau da, EB-27ak esportazio horien % 59,7 hartu du.

2025ean URTARRILETIK APIRILERA ARTEKO METATUA: Euskal AEko ondasunen kanpo-merkataritzak 1.132 milioi euroko saldo positiboa izan du eta estaldura-tasa % 112,3koa izan da 2025eko lehen lau hilabeteetako metatuan

Euskal AEko esportazioak % 2,3 hazi ziren aurreko urteko aldi beraren aldean, 231,5 milioi euro gehiago. Esportazioen zenbatekoa 10.298 milioikoa izan da aldi horretan.

Bizkaiko esportazioak Euskal AEko altuenak dira, 3.674 milioi guztira; Gipuzkoakoak 3.376 milioi eta Arabakoak 3.247 milioi.

Produktu mota kontuan hartuta, "Produktu ez-energetikoak" dira ugarienak, 9.831,7 milioi eurorekin.

Xehetasunetara jaitsiz gero, esportazioek gora egin dute (% 46,1) honako hauetan: "10 pertsona baino gutxiagoko turismoak" (1.143,2 milioi esportatu dira), "Burdinbide eta antzekoetarako ibilgailuen zatiak" (% 244,0 eta 213,9 milioi), "Trenbideetarako eta antzekoetarako bidaiarien autoak, ekipaje-furgoiak, posta-autoak eta bestelakoak" (% 303,7, 120,5 milioi esportatu dira) eta "Soja-olioa" (% 171,9 eta 101 milioi).

Atzerakada handienak honako hauek izan dituzte: "Automobilentzako zatiak eta osagarriak" (aurreko urtean baino 68,8 milioi gutxiago, % -8,7), "Zamak garraiatzeko ibilgailu automobilak" (113,5 milioi gutxiago, % -20,4) eta "Petrolioaren olio finduak" (122,7 milioi gutxiago, % -23,8).

2025eko lehen lau hilabete horietako rankingean, Frantzia da herrialde hartzaile nagusia, esportatutako guztizkoaren % 15,6rekin (1.605,6 milioi). Frantziaren atzetik, Alemania (% 14,5 eta 1.493,3 milioi) eta Erresuma Batua ( % 6,2 eta 641,1 milioi) daude. Horrela, EAEko esportazioen % 36,3 hiru herrialde horien artean biltzen da.

Inportazioen metatua 9.166 milioi eurokoa izan zen Euskal AE osoan. Urte arteko alderaketa eginez gero, aurreko urteko aldi berean baino 14,8 milioi gehiago direla ikusten da. % 0,2ko igoera apal horren arrazoia da, neurri batean, Arabako lurraldean, 2.251,5 milioiko inportazio metatuekin, aldi horretan izan den % 18,3ko hazkundea; hau da, 2024ko aldi berean baino 347,7 milioi gehiago. Gipuzkoako inportazioek ere 148,8 milioi egin dute gora (% 8,5), 1.905,6 milioi guztira. Bizkaian % 8,8 jaitsi dira (481,7 milioi gutxiago), 5.009,1 milioi guztira. "Produktu energetikoen" inportazioek % 16,9 egin dute behera, baina "Produktu ez-energetikoen" inportazioek % 7,0 egin dute gora.

Aldi horretan inportatutako produktu-partidak aztertuz gero, rankingeko lehen postuan "Petrolioaren edo mineral bituminosoen olio gordinak" daude (1.362,6 milioi, aurreko urtean baino 424,2 gutxiago, hau da, % 23,7 gutxiago); inportatutako tonen bolumenari dagokionez ere % 18,1eko atzerakada egon da, 3.400.007 tonatik 2.783.621 tonara. Bigarren postuan "Petrolioaren olio finduak" daude (606,1 milioi inportatu dira, 45,1 milioi gutxiago, eta % 6,9ko atzerakada). Partida horien atzetik datoz "Automobilentzako zati eta osagarriak" (% -15,4 eta 283,5 milioi inportatuta) eta "Petrolio-gasa eta gainerako hidrokarburo gaseosoak" (204,4 milioi inportatuta, hau da, % 20,3ko gehikuntza).

Euskal AEko ondasunen kanpo-merkataritzak 1.131,7 milioi euroko saldo positiboa izan du aldi horretan, eta estaldura-tasa % 112,3koa izan da.

         

Informazio gehiago:

Eustat - Euskal Estatistika Erakundea / Instituto Vasco de Estadística
Donostia kalea 1, 01010 Vitoria-Gasteiz
Prentsa-zerbitzua: servicioprensa@eustat.eus Tel: 945 01 75 62