2025/06/10eko prentsa-oharra
JAIOTZEN ESTATISTIKA. 2024
2024an 12.937 jaiotza erregistratu ziren Euskal AEn, 2023an baino % 3,8 gutxiago eta 1975etik izandako zifra txikiena
Jaitsiera % 5,6koa izan zen ama espainiarren artean, atzerriko amen jaiotzak, berriz, % 1,4 igo ziren
Eustaten datuen arabera, Euskal AEn 12.937 jaiotza izan ziren 2024an, aurreko urtean baino % 3,8 gutxiago. Datu hori Euskal AEn 1975etik izandako jaiotza kopururik txikiena da. Gainera, espainiar nazionalitatea duten amen artean, jaitsiera % 5,6koa izan zen eta atzerriko amen artean, berriz, % 1,4ko igoera.
Lurraldeen araberako banaketari dagokionez, Araba izan da jaitsierarik handiena izan duen lurraldea (% -5,5), ondoren, Bizkaia (% -3,7) eta, azkenik, Gipuzkoa (% -3,2); horrela, jaiotzak lurralde horietan 2.094, 6.421 eta 4.422 izan ziren, hurrenez hurren.
Hilabeteen arabera, jaiotzak gutxitu egin dira hilabete gehienetan, bitan izan ezik; urtarrilean eta maiatzean jaiotzak % 6,4 eta % 1,2 igo dira, hurrenez hurren.
Jaiotza-tasa 5,8 jaiotzako izan zen mila biztanleko. Zifrarik altuena Arabak du (‰ 6,2), ondoren, Gipuzkoak (‰ 6,1) eta, azkenik, Bizkaiak (‰ 5,6). Euskal AEn tasa hori 0,3 puntu jaitsi da 2023. urtearen aldean, eta 3,1 puntu 2014aren aldean.
Euskal AEn bizirik jaioak, amaren bizilekuaren lurralde historikoaren, sexuaren, adinaren, egoera zibilaren, nazionalitatearen eta jaiotza-herrialdearen arabera. 2024
| | 2024 | 2023 | Gehikuntza (%) |
| | KOP | % | KOP | % | |
| GUZTIRA | 12.937 | 100,0 | 13.453 | 100,0 | -3,8 |
| | | | | | |
| Ama bizi den lurralde historikoa | | | | | |
| Araba / Álava | 2.094 | 16,2 | 2.216 | 16,5 | -5,5 |
| Bizkaia | 6.421 | 49,6 | 6.671 | 49,6 | -3,7 |
| Gipuzkoa | 4.422 | 34,2 | 4.566 | 33,9 | -3,2 |
| | | | | | |
| Amaren adina beteta | | | | | |
| <30 urte | 2.730 | 21,1 | 2.813 | 20,9 | -3,0 |
| >= 30 urte | 10.207 | 78,9 | 10.640 | 79,1 | -4,1 |
| | | | | | |
| Amaren egoera zibila | | | | | |
| Ezkondua | 6.396 | 49,4 | 6.656 | 49,5 | -3,9 |
| Ezkon gabea | 6.541 | 50,6 | 6.797 | 50,5 | -3,8 |
| | | | | | |
| Amaren nazionalitatea | | | | | |
| Espainiarra | 9.494 | 73,4 | 10.057 | 74,8 | -5,6 |
| Atzerrikoa | 3.443 | 26,6 | 3.396 | 25,2 | 1,4 |
| | | | | | |
| Ama jaio zen herrialdea | | | | | |
| Espainia | 8.454 | 65,3 | 9.116 | 67,8 | -7,3 |
| Bestelakoa | 4.483 | 34,7 | 4.337 | 32,2 | 3,4 |
| | | | | | |
Data 2025eko Ekainaren 10a
Iturria: Eustat. Jaiotzen Estatistika
Jaiotzen % 78,9an amek 30 urte edo gehiago zituzten
Jaiotzen talde handiena 30 eta 34 urte bitarteko emakumeena da, jaiotza guztien % 34,3. Ondoren, 35 eta 39 urte bitarteko amen jaiotzak daude (% 33,4). 40 urte edo gehiagokoen jaiotzak % 11,2 izan dira, aurreko urtean baino 0,1 puntu gutxiago. 25-29 urteko amen jaiotzak % 13,8 izan dira eta 20-24 urte artekoenak % 6,2. Azkenik, ama nerabeak guztizkoaren % 1,1 izan ziren, 2023an baino hamarren bat gutxiago.
Ama guztien batezbesteko adina 33,4 urtekoa izan zen, aurreko urteko bera, nahiz eta balio hori 34,3 urtera igo zen espainiar nazionalitateko amen artean eta 30,8 urtekoa izan zen atzerriko nazionalitatea zutenen artean. 2024an lehenengoz ama izan zirenen batezbesteko adina 32,4 urtekoa izan zen; 33,4 urtekoa espainiar nazionalitatea duten amen kasuan eta 28,7 urtekoa atzerriko nazionalitatea duten amen kasuan.
Ama atzerritarrek espainiarrek baino gazteago dituzte seme-alabak
Amen nazionalitatea kontuan hartuz gero, % 26,6k atzerriko nazionalitatea zuen eta 3.443 haur izan zituzten. 2023an ama atzerritarren ehunekoa % 25,2 zen. Ama horien jatorrizko herrialde nagusiak honako hauek dira: Maroko (620 ama), Kolonbia (437), Nikaragua (208), Paraguai (201), Pakistan (196), Errumania (192), Aljeria (155), Honduras (137), Venezuela (117) eta Peru (108). Atzerriko nazionalitatea duten ama guztien artean, % 43,8k Amerikako herrialderen bateko nazionalitatea du, % 32,5ek Afrikakoa eta % 12,6k Europakoa.
Euskal AEn bizi diren atzerriko emakumeek espainiar nazionalitateko emakumeek baino gazteago izan dituzte sema-alabak: kasuen % 41,5ean 30 urte baino gutxiagorekin izan dituzte sema-alabak, eta ama espainiarren kasuan % 13,7an.
Jaiotzen erdia baino gehiago ezkontzatik kanpo izaten dira
2024an ezkontzaz kanpoko jaiotzak 6.541 izan ziren, hau da, jaiotza guztien % 50,6; 2023an, berriz, % 50,5 izan ziren. Duela 10 urte, 2014an, ezkontzatik kanpoko jaiotzen ehunekoa % 39,9 izan zen.
Jaiotza-ordena kontuan hartuta, 2024an izandako lehen 6.528 jaiotzak guztizkoaren % 50,5 izan ziren; bigarrenak, % 36,2; eta hirugarrenak eta ondorengoak, guztizkoaren % 13,3. 2024an bizirik jaiotakoen artean, 100 neskako 104 mutil jaio ziren. Mutilen batezbesteko pisua 3.349,3 gramokoa izan zen eta neskena 3.228,8 gramokoa.
Jaiotzeko lekuen arabera, jaiotzen % 93,5 ospitale publikoetan izan ziren, % 5,9 ospitale pribatuetan eta % 0,6 etxean. Erditzeak 12.802 izan ziren, horietatik 12.620 ume bakarra jaioz, 179 bikoitzak eta 3 hirukoitzak. Erditze guztietatik 740 goiztiarrak izan ziren (% 5,8).
Informazio gehiago nahi izanez gero:
Eustat - Euskal Estatistika Erakundea / Instituto Vasco de Estadística
Donostia-San Sebastián kalea, 1 01010 Vitoria-Gasteiz
Prentsa-zerbitzua: servicioprensa@eustat.eus Tel.: 945 01 75 62