2025/03/24ko prentsa-oharra
ESKOLA-JARDUERAREN ESTATISTIKA. 2024
2023/24 ikasturtean Euskal AEko ikastetxe publikoetako 0 eta urte 1eko geletako matrikulen kopurua % 27 hazi zen
Lehen Hezkuntzak 10.000 ikasle galdu ditu bost urtean
Unibertsitatez kanpoko irakaskuntza arautuetan guztira 405.616 matrikula egin ziren 2023/24 ikasturtean Euskal AEn, aurreko ikasturteko kopuruaren oso antzekoa.
Hala ere, bilakaera desberdina izan zen hezkuntza-mailaren arabera. Lehen Hezkuntzan aurreko urtean baino 2.612 matrikula gutxiago egin ziren, hau da, % 2,1 gutxiago. Horrekin, bost urteko jaitsiera kateatu eta 10.000 ikasle inguru galdu ziren. Bestalde, Derrigorrezko Bigarren Hezkuntzak eta Lanbide Heziketak azken hogei urteetako matrikula-kopuru altuenak izan dituzte: 90.000 eta 46.000 inskripzio baino gehiago, hurrenez hurren.
Oro har, Araubide Bereziko Irakaskuntzek aldaketa handirik gabe jarraitu zuten, eta % 1,1eko igoera orokorra Kirolaren Irakaskuntzen errekuperazioaren ondorioz gertatu zen; 2022/23 ikasturtean galdutako 300 ikasle baino gehiago irabazita.
Unibertsitatetik kanpoko irakaskuntzetan matrikulatutako ikasleak Euskal AEn, irakaskuntza mailaren arabera, zentroaren titulartasunari jarraiki. 2023/24
| | Guztira | Publikoa | Pribatua | Aldaketa, aurreko ikasturtearen aldean (%) |
| GUZTIRA | 405.616 | 227.751 | 177.865 | 0,0 |
| Araubide orokorreko irakaskuntzak | 377.088 | 200.389 | 176.699 | -0,0 |
| Haur-Hezkuntza | 73.031 | 39.894 | 33.137 | -1,0 |
| Lehen Hezkuntza | 121.539 | 63.289 | 58.250 | -2,1 |
| Derrigorrezko Bigarren Hezkuntza | 90.335 | 43.011 | 47.324 | 1,6 |
| Oinarrizko lanbide heziketa | 5.283 | 1.601 | 3.682 | 7,7 |
| Batxilergoa | 32.575 | 15.599 | 16.976 | 0,3 |
| Erdimailako lanbide-heziketa | 16.305 | 10.284 | 6.021 | 1,7 |
| Erdi-mailako LHko espezializazio-ikastaroak | 39 | 25 | 14 | -33,9 |
| Goimailako lanbide-heziketa | 24.669 | 14.428 | 10.241 | 4,1 |
| Goi-mailako LHko espezializazio-ikastaroak | 434 | 301 | 133 | 70,9 |
| Hezkuntza Berezia | 1.779 | 1.008 | 771 | 5,5 |
| Helduen Hezkuntza | 11.099 | 10.949 | 150 | -2,0 |
| Araubide bereziko irakaskuntzak | 28.528 | 27.362 | 1.166 | 1,1 |
| Hizkuntzen irakaskuntzak | 23.763 | 23.763 | - | -0,3 |
| Musika arte-irakaskuntzak | 2.452 | 1.808 | 644 | -3,4 |
| Dantza arte-irakaskuntzak | 160 | 160 | - | 15,9 |
| Arte plastikoen eta diseinuaren irakaskuntzak | 875 | 582 | 293 | 9,5 |
| Kirol irakaskuntzak | 1.218 | 989 | 229 | 46,9 |
| Arte dramatikoaren irakaskuntza artistikoak | 60 | 60 | - | -4,8 |
Data 2025eko Martxoaren 24a
Iturria: Eustat. Eskola-jardueraren estatistika
0 eta urte 1eko matrikulak izugarri igo dira ikastetxe publikoetan
Haur Hezkuntzako datuak zehatzago aztertu behar dira. Oro har, hezkuntza-etapa honetan % 1 murriztu zen matrikulazioa, baina 0 eta urte 1eko geletako izen-emateak % 13 igo ziren. Hala ere, alde handiak egon ziren sare publikoaren eta pribatuaren artean.
2023/24 ikasturtean haur-eskola publikoen doakotasuna indarrean jartzeak eskaera nabarmen handitzea eragin zuen. Zehazki, ikastetxe publikoetako 0 urteko haurren matrikulak % 57 igo ziren aurreko ikasturtearen aldean, 1.111tik 1.746ra. Urte 1eko ikasgeletan % 20 inguruko hazkundea izan zen.
Bestalde, zentro pribatuetan ere 0 urteko matrikulek gora egin zuten, baina apalago; 2022/23 ikasturtean baino 100 inskripzio gehiago baino ez ziren erregistratu. Urtebeteko ikasleei dagokienez, sare pribatuko eskoletako matrikulak % 7 jaitsi ziren.
Parekotasuna Zientzia eta teknologiako Batxilergoan
2023/24 ikasturtean guztiz ezarri zen Batxilergoaren antolamendua ezartzen duen 243/2022 Errege Dekretua. Besteak beste, arau horrek Batxilergoa egiteko modalitateak aldatu zituen, eta horren berritasun nagusia Modalitate Orokorra sortzea izan zen. Modalitate berri hori prestakuntza globalagoa eta malguagoa bilatzen dutenentzat pentsatuta dago, hainbat modalitatetako ikasgaiak aukeratuz, askotariko prestakuntza-ibilbideak konfiguratzeko aukera emanez.
Oraingoz, modalitate berri horrek ez du harrera handirik izan Euskal AEn: 451 ikaslek soilik aukeratu zuen, guztizkoaren % 1,4k. Aldiz, Zientzien eta teknologiaren modalitateak Batxilergoko ikasleen erdia baino gehiago erakarri zuen.
Batxilergoko modalitatea aukeratzerakoan, neskek eta mutilek desberdin jokatu zuten. Gizonen % 62k Zientzien eta teknologien adarra aukeratu zuen, neskek baino ehuneko hamaika puntu gehiago (% 51). Aldiz, Humanitateetan eta Gizarte Zientzietan prestakuntza jaso zuten emakumeen proportzioa (% 42) gizonena (% 34) baino zortzi puntu handiagoa izan zen. Bide artistikoa aukeratu zutenak gutxiengoa izan ziren bi sexuetan, baina bide artistikoa aukeratu zuten emakumeen ehunekoa (% 6) gizonena halako hiru izan zen. Zifra absolutuetan, horrek desoreka handia eragin zuen ikasgeletan: modalitate horretan, hamar ikasletik zortzi emakumeak izan ziren. Azkenik, Batxilergo Orokorra gizonen % 2k eta emakumeen % 1ek soilik aukeratu zuen.
2023/24 ikasturtean 41.447 pertsona matrikulatu ziren erdi-mailako edo goi-mailako Lanbide Heziketan, espezializazio-ikastaroak barne; 2022/23 ikasturtean baino 1.400 gehiago. Osasunaren lanbide-arloko zikloak izan ziren gehien eskatu zirenak, 5.129 inskripzio guztira. Horietatik guztietatik lautik bat baino ez zuen egin gizon batek. Fabrikazio mekanikoaren, Elektrizitatea eta elektronikaren, eta Informatika eta komunikazioen arloek osatu zuten matrikula gehien izan zituzten lanbide-arloen rankinga; horietan guztietan emakumeak % 15 baino gutxiago izan ziren.
Lehen hezkuntzako lau ikasletik hiruk eskolako jantokia erabili zuen
178.000 ikaslek baino gehiagok erabili zuen eskola-jantokia, Araubide Orokorreko Irakaskuntzetan matrikulatutako ikasle guztien ia erdiak. Bizkaikoak izan zen zerbitzu hori gehien erabili zuten ikasleak: % 56k baino gehiagok ikastetxean bazkaldu zuen, Gipuzkoan % 41ek eta Araban % 34k.
Lehen Hezkuntzan izan zen eskola-jantokiko eskari handiena, hezkuntza-etapa horretan matrikulatutako lau pertsonatik hiruk beren ikastetxean bazkaldu zuen. Aitzitik, Lanbide Heziketan ia ez zen erabili zerbitzua.
Oharra: oraingoz ez dago bekei buruzko informaziorik, ez eta atzerriko hizkuntzak irakaskuntza-hizkuntza gisa erabiltzeari buruzkorik ere. Espero dugu informazio hori laster zabaldu ahal izatea.
Informazio gehiago:
Euskal Estatistika Erakundea/Instituto Vasco de Estadística
Donostia kalea 1, 01010 Vitoria-Gasteiz
Prentsa-zerbitzua: servicioprensa@eustat.es Tel: 945 01 75 62