2002ko lehen hiruhilekoan, 5.212 pertsona hil ziren Euskal AEn, aurreko urteko aldi berean baino % 14,1 gehiago. Lurraldeka, Araban 605 pertsona hil ziren, Bizkaian 2.877, eta Gipuzkoan 1.730.
Urteko lehen hiruhilekoan izan ohi da heriotza gehien. Aurten, aipagarria da arnas aparatuko gaixotasunek eragindako heriotzen gehikuntza, aurreko hiruhilekoan baino % 59,3 gehiago izan baitira.
Heriotza-kausa nagusia zirkulazio-sistemako gaixotasunak izan ziren: 1.562 pertsona hil ziren kausa horrengatik (% 30); haren atzetik, bigarren heriotza-kausa gisa, tumoreak ageri dira, 1.404 heriotza eragin baitzituzten (% 26,9). Hirugarren tokia, eta urrunago, arnas aparatuko gaixotasunek hartu zuten, neguko hil haietan 704 heriotza eragin baitzituzten.
Heriotzen kausak ez ziren berdinak izan sexu batean eta bestean: gizonezkoen artean, tumoreak hilgarriago gertatu ziren zirkulazio-aparatuko gaixotasunak baino; emakumezkoen artean, berriz, heriotza-kausa nagusia gaixotasun kardiobaskularrak izan ziren, eta tumoreak bigarren.
2002ko lehen hiruhilekoan gertatukoen artean, 14 heriotza urtebetetik beheragoko haurrei egokitu zitzaizkien: 9 mutikori eta 5 neskatori.
Hazkunde begetatiboak zeinu negatiboa izan zuen 2002ko lehen hiruhilekoan, 958 pertsonako biztanle-galerarekin. Hiru lurralde historikoetan izan ziren saldo negatiboak. Izan ere, Arabako, Bizkaiko eta Gipuzkoako biztanleriek 41, 655 eta 262 biztanle galdu zituzten, hurrenez hurren.