2001. urtean, Euskal Autonomia Erkidegoan, guztira, 619 milioi euro inbertitu ziren ikerketa zientifiko eta garapen teknologikoko (I+Gko) jardueretan, aurreko urtean baino %4,2 gehiago, Eustatek landu dituen datuen arabera. Kopuru horrek BPGaren %1,49 hartzen du, eta, beraz, estatuko batez bestekoaren gainetik dago (2000. urtean %0,94), baina Europar Batasuneko batez bestekoaren azpitik (%1,94). Hala ere, 2000n baino bi ehunen gutxiago dira, aurten BPGa gehiago hazi baita (%5,4) I+G gastua baino.

Egiaztatzen da erlazio positiboa dagoela biztanleko BPGaren eta I+Gra bideratutako BPGaren ehunekoaren artean. Herrialde aberatsenek egiten dute I+Gko inbertsiorik handiena, hau da, euren BPGaren %2,5 gainditzen dutenak, eta Suedia, Japonia, Finlandia eta AEB dira. Bitarteko ahalegina, BPGaren %1,5en eta %2,5en artekoa, egiten dutenen artean, Alemania, Frantzia, Danimarka, Erresuma Batua, Norvegia, Austria, Islandia eta Kanada daude. Inbertsio baxuak, azkenik, Italia, Polonia, Hungaria, Espainia eta Portugalen izaten dira.

Autonomia-erkidegoka, Euskal AEk bigarren tokian jarraitzen du I+Gko ahaleginaren rankingean, eta Madrilgo Erkidegoa baino ez dago aurretik (2000. urtean %1,67ko gastua BPGaren aldean), I+Gan diharduten zentro publiko asko han biltzen direlako. Horiek horrela, ezein autonomia-erkidegok ez du gainditzen Europar Batasuna-15eko batez bestekoa.

Egikaritze-sektoreei dagokienez, enpresek I+Gko gastuaren %80 kontsumitu zuten; %17 unibertsitate-ikerketara bideratu zen, eta gainerako %3a Administrazioaren mendeko zenbait organismo publikoetara. Arlo horretan ere diferentzial handia dago Espainiar Estatuko emaitzen aldean, non 2000. urtean, enpresek I+Gko gastuaren %54 besterik ez baitute egikaritu.

Gastu handiena burutzen duen eta langile-kopuru handiena erabiltzen duen zientzia-diziplina ingeniaritza eta teknologia da, diziplina horretara bideratzen baitira baliabideen %79 eta han lan egiten dute I+Gn dedikazio osoko baliokidetzan (DOB) diharduten langileen %75ek.

Industria-enpresei dagokienez, aipatzekoak dira garrantzi handieneko produktu ikertu gisa makineria eta tresneria mekanikoa, eta aireontzi eta espazio-ontzien eraikuntza. Bi sektoreen artean, enpresek I+Grako bideratzen dituzten gastu arrunt guztien %27 (2000. urtearekiko %-2) kontsumitzen dute.

Zerbitzu-enpresen aldetik, telekomunikazioak, softwarea eta I+Gko zerbitzuak dira baliabide gehien jasotzen duten produktuak, eta guztien artean I+Gra bideratutako gastu arrunten %17ra (2000. urtearekiko %+1) iristen dira.

Finantzaketaren ikuspegitik, finantzaketa pribatuak, enpresen bidez, 411 milioi euro bideratu zituen ikerketara, guztizkoaren %66; finantzaketa publikoak %27 iritsi zuen, eta funtsen %7 atzerrian atzeman ziren. Euskal AE finantzaketa pribatu handieneko herrialdeen artean kokatzen da, AEB, Suitza eta Suediaren mailan.

Euskal AEn I+Gko jardueretan diharduen guztizko langile-kopurua 10.621 lagunera iristen da, biztanleria landunaren milako 12,28; eta kopuru horretatik, 5.809 ikertzaileak dira, milako 6,71.

Euskal AEn egindako ikerketaren ondorio eta adierazle gisa, 2001ean Europako bidetik, zein estatuko bidetik argitaratutako patenteak 202 dira, eta horietan artikulu metalikoak eta makinaria nabarmentzen dira, bien artean 94 patente egin baitituzte. Sortutako baliagarritasun-modeloak 168 dira eta horietan artikulu metalikoak, manufakturak eta makinaria nabarmentzen dira.

Argibide gehiagorako, deitu hona: