Euskal AEn. 2001ean, 18.087 lagun hil ziren, 9.670 gizonezko eta 8.417 emakumezko; aurreko urtean baino 155 heriotza gutxiago. Zifra horretan, % 0,8ko gutxitzea gertatu zen, 2000. urtearen aldean, EUSTATen datuen arabera.

Jaiotzak baino 440 heriotza gehiago gertatu ziren. Horrenbestez, 1990etik gertatu den bezala, Autonomia Erkidegoko hazkunde begetatiboa negatiboa izan zen. Lurraldeka, saldo positiboak gertatu ziren Araban eta Gipuzkoan, 217 eta 311 pertsona irabazi baitzituzten, hurrenez hurren. Bizkaian, Euskal AEko saldo begetatibo negatiboaren eragile den lurraldean, heriotza-kopurua jaiotzena baino nabarmen handiagoa izan zen (-968).

Hilen batez besteko adina 75,3 urtekoa izan zen; 1990ean, aldiz, 71 urtekoa zen, hots, 4,3 urteko gehikuntza jazo da. Sexuka, gizonezkoak batez beste 71,4 urterekin hil ziren, eta emakumezkoak 79,9rekin. Hala ere, sexuen arteko alde hori txikituz doala ikusten da. Alde horren emaitza gisa, 80 urte bete arte emakumezkoak halako bi hiltzen dira gizonezkoak; 80 urtetik aurrera, ordea, alderantziz da.

Haurren heriotza-tasari dagokionez, urtebeteko 3,4 adingabe hil ziren, mila jaioko. Jaioberritako heriotzak —bizitzako lehendabiziko 28 egunetan gertatua— 44 izan ziren. Horietatik 30, jaioberritako heriotza goiztiarrak —aurreneko astean gertatuak—; eta azken horietatik 12, lehenengo 24 orduetan. Urtebetez beherakoen artean, gizonezko hilak (36) emakumezkoak (24) baino gehiago izan ziren.

2001ean jazotako heriotza gehien, % 31,8 (5.743 heriotza), zirkulazio-aparatuko gaixotasunek eragin zuten; ondoren, tumoreek, % 30,4 (5.496 heriotza); eta hirugarren, askoz atzerago, arnas aparatuko gaixotasunek, % 9,12 (1.649).

Heriotzen kausak ez ziren berdinak izan sexu batean eta bestean: gizonezkoen artean, tumoreak hilgarriago gertatu ziren zirkulazio-aparatuko gaixotasunak baino; emakumezkoen artean, berriz, heriotza-kausa nagusia gaixotasun kardiobaskularrak izan ziren, eta tumoreak bigarren.

Era berean, heriotzaren kausa ez zen berdina izan adin guztietan. Urtebetez beherakoen artean, heriotza gehien jaiotza-inguruko aldian sortutako gaixotasunek eta sortzeko anomaliek eragin zuten; 34 urte bitarte, kanpoko kausek; 35 eta 74 urte bitarte, tumoreek; eta 75 urtetatik aurrera, zirkulazio-aparatuko gaixotasunek.

Kanpoko kausek eragindako heriotzen artean, nabarmen ageri dira zirkulazioko istripuak (245 heriotza) eta suizidioak (152). Bi talde horietan, emakumezkoak baino gizonezko gehiago hil ziren: 187 gizonezko eta 58 emakumezko zirkulazio-istripuengatik, eta 102 gizonezko eta 50 emakumezko suizidioengatik.