2001. urtean, osasun-asistentziako aseguru libreko entitateek (ALEek) aseguratutako biztanleria 299.050 laguneko kopurura iritsi zen, hau da, aurreko urtean baino %0,2 gutxiago; datu horrek esan nahi du ordurako Euskal AEko biztanleriaren %14,4k osasun-asistentziako asegurua kontratatuta zeukala, EUSTATek eskainitako datuen arabera.

Herrialde mailan, berriro ere Bizkaia da biztanleria aseguratuaren proportziorik handiena duen herrialdea (guztizko biztanleriaren %18,8), eta haren atzetik datoz Araba (%12,8) eta Gipuzkoa (%7,6).

Euskal AEn aseguratuta dagoen biztanleriaren gutxitze horrek, Estatuan ere isla du, %0,6 gutxitu baitira. Beraz, azken urteetako jaisteko joera baieztatu egin da osasun-aseguruko entitate pribatuetan aseguratutakoak etengabe jaisten ari baitira.

Primen balioari dagokionez, aipagarria da batutako primen guztizkoak 129 milioi euroko kopurua gainditu izana, urte horretako Euskal AEko BPGren %0,3 hartuz. Primen bolumena %6,3 gehitu zen aurreko urtearen aldean eta datu hori txikiagoa izan zen Estaturako, %4,2 inguruan kokatu baitzen.

Aseguratuko urteko batez besteko prima Euskal AEko guztizkorako 433 eurokoa izan da, 2000n baino %6,5 gehiago. Zifra hori ere Estatuan 2001ean izandakoa (368 euro) baino altuagoa ere bada.

Iturria: EUSTAT eta ICEA (Investigación Cooperativa entre Entidades Aseguradoras y Fondo de Pensiones)

Biztanleko batez besteko gastuari dagokionez, 2001ean 62 eurora iritsi zen, 2000ko zifra baino %5,6 altuagoa.

Kontratu-motari dagokionez, ohikoena familia-poliza edo banakako poliza izan zen eta kontratatutako polizen %62,2 hartu zuten; %13,6 mutualitate publikoen polizei egokitu zitzaizkien, eta gainerako %24,1, berriz, beste poliza kolektibo batzuei.

Aseguru pribatuaren osasun-sektoreko ALEen multzoak 7.842 profesional jarri ditu bere aseguratuen eskueran, eta koadro medikoa honela osatzen da: medikuntza orokorreko 1.261 mediku eta 5.162 espezialista. Espezialitatekako pertsonal fakultatibotik, Medikuntza Orokorrak eta Pediatriak hartzen dute osasun-profesional gehien, guztizkoaren %24,6, hain zuzen ere.

1.128.243 kanpo-kontsultari erantzun zieten guztira ALEek 2001ean, aurreko urtean baino %0,6 gutxiago, eta aseguratuko 3,8 kanpo-kontsulta egin ziren batez beste. Espezialitateka, kontsulta-bolumen handiena traumatologian izan zen (48 kontsulta 100 aseguratuko), eta haren atzetik tokoginekologia eta pediatria datoz (42 eta 41 kontsulta, hurrenez hurren).

Azkenik, aipagarria da ALEetan aseguratutako pazienteen ospitaleratzeak 37.281era iritsi izana, 2000n baino %4 gehiago.