Heriotzen behin-behineko datuen arabera, 2002an 18.037 lagun hil ziren; horietatik 9.521 gizonezkoak izan ziren eta 8.516 emakumezkoak. Erkidegotik kanpo hildako Euskal AEko egoiliarrei buruzko datuak jasotzeke daudela, 2001ean baino 550 heriotza gehiago izan ziren; horrenbestez, %3,1eko igoera izan zen.

2002an izandako heriotzetatik %30,5 (5.505 heriotza) zirkulazio-aparatuko gaixotasunek eragin zituzten. Jarraian tumoreak datoz, %29,6rekin (5.341 heriotza), eta hirugarrenik, askoz urrunago, arnas aparatuko gaixotasunak, heriotzen %10,4 eragin baitzituzten (1.873).

Heriotzen kausak ez ziren berdinak izan sexu batean eta bestean: gizonezkoen artean, tumoreak hilgarriago gertatu ziren zirkulazio-aparatuko gaixotasunak baino; emakumezkoen artean, berriz, heriotza-kausa nagusia gaixotasun kardiobaskularrak izan ziren, eta tumoreak bigarren.

100 urte eta gehiagorekin hildakoen kopurua bikoiztu egin zen 1990etik

2002an gertatuko heriotzen artean, 54 heriotza urtebetetik beheragoko haurrei egokitu zitzaizkien: 30 mutikori eta 24 neskatori. Bestalde, nabarmen gehitu zen 100 urte eta gehiagorekin hil zirenen kopurua: 1990ean 56 izan ziren eta 2002an 120 (23 gizonezko eta 97 emakumezko).

2002an gertatutako heriotzek 14 jaiotzak gainditu zituzten eta ondorioz, 1990tik gertatzen den bezala, hazkunde begetatiboa negatiboa izan zen Euskal AEn. Herrialdeka, saldo positiboak izan ziren Araban eta Gipuzkoan, 385 eta 380 biztanle irabazi baitzituzten, hurrenez hurren. Bizkaian, ostera, heriotzak gehiago izan ziren jaiotzak baino (-751).