2001. urtean, joan zirenak baino 7.079 lagun gehiago etorri ziren Euskal AEra, Eustatek emandako datuen arabera. Bigarren urtez jarraian, migrazio-saldo positiboa du autonomia-erkidegoak. Izan ere, 1991z geroztik, ia etenik gabe gutxituz joan ziren saldo negatiboak harik eta 2000. urtean positibo bilakatu ziren arte.

Lurraldeka, Bizkaiak, 3.184 lagun irabazi dituenez, migrazio-saldorik altuena du kopuru absolutuetan, eta aurreko urtearen aldean % 284 hazi da saldo hori. Gipuzkoak 1.579 lagun irabazi ditu migrazioagatik, eta % 596 gehitu du saldo positiboa, aurreko urtearekin alderatuta. Arabak, berriz, gehikuntza txikiagoa du, % 54koa, 2.316 lagun irabazita.

Euskal AEren eta gainerako autonomia-erkidegoen arteko mugimenduak besterik kontuan hartzen ez badugu, aurreko urtean baino 2.892 lagun gehiago etorri ziren 2001. urtean, hau da, % 22 gehiago. Nahiz eta Euskal AEren eta gainerako autonomia-erkidegoen arteko saldoa oraindik negatiboa den, saldo hori % 201 murriztu da, eta 1.338 lagun galdu ditu. Beste alde batetik, atzerriko herrialdeekiko migrazio-saldoa positiboa da, 8.417 lagun gehiago ditugu alde horretatik; aurreko urtean baino % 32 gehiago.

Egoitza-aldaketek Euskal AEko biztanleen %7,3ri eragin die 2001. urtean; aldaketen % 71tan, mugimendua Euskal AEren barruan izan da; eta gainerakoetan, berriz, mugimendua erkidegotik kanpokoa izan da.

Guztira, ohiko egoitzaren 153.338 aldaketa zenbatu dira Euskal AEn:

Egoitza-aldaketa horietatik 73.765 udalerri beraren barruan gertatu dira.

Erkidego barneko mugimenduak, guztira, 35.102 izan dira. Bai jatorria eta bai helmuga Euskal AEko udalerrietan dituzten mugimenduak dira horiek.

Era berean, kanpoko —erkidegoaz kanpotiko— 25.775 immigrazio gertatu dira. Jatorria gure erkidegoaz kanpoko udalerri batean eta helmuga Euskal AEn duten mugimenduak dira horiek.

Azkenik, kanpoko —erkidegoaz kanpoko— 18.696 emigrazio gertatu dira. Jatorria gure autonomia-erkidegoko udalerri batean eta helmuga gure erkidegotik kanpora duten mugimenduak dira horiek.

Kanpoko edo erkidegoz kanpoko mugikortasun geografiko hori txiki samarra da, beste autonomia-erkidegoekin ekartzen bada, haietan mila biztanleko 29 mugitzen baitira. Euskal AEn, berriz, 2001. urtean mila biztanletik 21ek izan zuten halako mugikortasuna (Araban ‰ 27, Bizkaian ‰ 23 eta Gipuzkoan ‰ 16).

Euskal AEn emigrazio-tasa 2001. urtean ‰ 8,9koa izan da; eta atzerrira egindako emigrazioa kenduz gero, ‰ 8,4koa, autonomia-erkidego guztien batez bestekoaren bi puntuz azpitik. Beste erkidego batzuk (Errioxa, Gaztela-Mantxa, Balearrak eta Ceuta-Melilla) batez bestekoa baino gorago dabiltza; eta, ‰ 11ren eta ‰ 30en artean direnez, Euskal AEko tasaren gainetik ere bai.

Euskal AEri bertatik jasotzen duten biztanleria baino gehiago ekarri dioten autonomia-erkidegoak hauek dira: Katalunia, Gaztela eta Leon, Gaztela-Mantxa, Asturias, Galizia, Extremadura eta Aragoi, bai eta Ceuta eta Melilla hiri autonomoak ere (76 laguneko saldo positiboa dago haiekin). Atzerriarekin, 8.417 laguneko saldo positiboa erregistratu da 2001. urtean.

Euskal AEtiko emigrante gehien erakarri duten autonomia-erkidegoak honako hauek izan dira, hurrenkera honetan: Gaztela eta Leon, Kantabria, Madril eta Valentziako Erkidegoa. Lauen artean, gure erkidegoa uzten duten bi lagunetatik bat hartzen dute.

Atzerriko nazionalitatea duten immigranteak, 2001. urtean, 11.353 lagun izan direla zenbatu da, hots, aurreko urtean baino % 55 gehiago, eta gure erkidegoko sarrera guztien % 44 izan dira. 1988az geroztik, nabarmen gehitu dira atzerriko nazionalitatea duten immigranteen sarrerak, Euskal AEn. Kopuru absolututan, 500 sarrera ingurutik 10.000 pasara igo da 2001ean, hau da, atzerritarren immigrazioak hogeirekin biderkatu dira hamabi urtean. Kontuan izan behar da atzerriko immigranteetatik zenbait beste autonomia-erkidego batzuetatik etorri direla. Zehazki, 2001ean 3.152 kasutan gertatu zen hori.

Titulu-mailari dagokionez, titulu-maila apalenetakoak dira immigrazioen % 48 eta emigrazioen% 50; goi-mailakoetan ez da alderik, % 17 dira.

Emigranteen batez besteko adina, 37,2 urte, immigratzaileena (33,6) baino 3,6 urte handiagoa da.