2003ko bigarren hiruhilekoan izandako 4.571heriotzek %8ko hazkundea eragin zuten, iazko aldi beraren aldean, Eustatek landutako datuen arabera. Lurraldez lurralde, Araban 557 lagun hil ziren, Bizkaian 2.568, eta Gipuzkoan 1.446.

Heriotzen kausa nagusia zirkulazio-aparatuko gaixotasunak izan ziren: 1.390 lagun hil ziren gaixotasun horiengatik (%30,4); ondoren, tumoreak izan ziren bigarren heriotza-kausa eta 1.368 heriotza eragin zituzten (%29,9). Hirugarren, arnas eritasunak izan genituen eta hauek 460 heriotza eragin zituzten hiru hileotan (%10,1).

Heriotzen kausak ez ziren berdinak izan sexu batean eta bestean: gizonezkoen artean, tumoreak hilgarriago gertatu ziren zirkulazio-aparatuko gaixotasunak baino; emakumezkoen artean, berriz, heriotza-kausa nagusia gaixotasun kardiobaskularrak izan ziren, eta tumoreak bigarren.

2003ko bigarren hiruhilekoan izandako heriotzen artean, 16 heriotza urtebetetik beheragoko haurrei egokitu zitzaizkien: 10 neskatori eta 6 mutikori.

2003ko bigarren hiruhilekoko hazkunde begetatiboa positiboa izan zen, 409 laguneko biztanle-irabaziarekin. Herrialdeka, saldo positiboak izan ziren Araban eta Gipuzkoan, 206 eta 267 biztanle irabazi baitzituzten, hurrenez hurren. Bizkaian, ostera, heriotzak gehiago izan ziren jaiotzak baino (-64).