2002an, 310.796 lagun zeuden aseguratuta aseguru libreko entitateetan (aurrerantzean, ALE), aurreko urtean baino % 3,9 gehiago. Datu horrek adierazten du Euskal AEko biztanleen % 15,1 osasun-laguntzako 158.158 polizen onuradun direla, EUSTATen datuen arabera.

Lurralde historikoak bereizita, Bizkaian dago, oraindik ere, osasun-laguntzako asegurua egiteko joerarik handiena, han baitago proportziorik handiena biztanleko (% 19,9). Araban (% 13,4) eta Gipuzkoan (% 7,9) txikiagoa da. Hala ere, kopuru erlatiboetan, Araban gehitu ziren gehienik aseguratuak (% 5) 2001. urtearen aldean; Bizkaian eta Gipuzkoan, ordea, % 4 eta % 3 gehitu ziren, hurrenez hurren.

Euskal AEko aseguratu-kopuruaren gehikuntza hori (% 3,9) Estatuan izan dena (% 2,9) baino handiagoa da, eta azken zortzi urteko (1994-2001) joeraren aldaketa ekarri du, urte-bitarte hartan aseguratuen kopurua etengabe murriztu baitzen.

Poliza-modalitateari begiratuta, banakakoa edo familiako polizek hartzen dituzte barruan aseguratu gehienak, % 54,9. Hurrengoak, enpresetarako edo bestelako kolektibo konkretuetarako polizak dira (% 25,8), eta mutualitate publikoenak (% 19,3). Dena dela, poliza kolektiboak gora jarraitzen du, aurreko hiru urtean (1999-2001) bezalaxe. Poliza kolektiboak izan du hazkunderik handiena (% 6,1), 2001. urtearen aldean; banakakoa edo familiako polizak eta mutualitate publikoak, berriz, % 3,3 eta % 4,4 hazi ziren, hurrenez hurren.

2002an osasun-laguntzako aseguru-sektorean bildutako primak, guztira, 137 milioi euro baino gehiago izan ziren. Hala, bada, aurreko urtearen aldean, % 5,8 baino gehiagoko gehikuntza izan zuten, eta Euskal AEko BPGaren % 0,3 hartu zuten.

Aseguratuko batez besteko prima, Euskal AE osorako, 441 eurokoa izan zen, hots, Estatuan izandakoaren (443 euro) antzekoa. Hortaz, 2001. urtetik, % 1,8ko igoera neurritsua gertatu zen. Banakako edo familiako modalitatean, gehikuntza hori % 4,2koa izan zen. Beste kolektiboen modalitatean, aldiz, % 1,6ko beheratzea gertatu zen, eta mutualitate publikoetan ia ez zen aldaketarik izan.

ALEen osotasunean, aseguru pribatuko osasun-sektoreak bere aseguratuei guztira 8.019 profesional eskaini zizkien. Lehen mailako arretarako, medikuntza orokorreko 1.285 mediku eta 331 pediatra dira; eta arreta espezializaturako, 5.494 espezialista. Eremu horretan, odontologia, tokoginekologia eta traumatologia izan ziren profesional gehien eskaini ziren espezialitateak.

Aseguratuen gehikuntza horrek berekin ekarri zuen mediku- eta ospitale-laguntzako jarduera gehitzea. Guztira 1.164.635 kontsultari kasu egin zieten ALEetan aseguratutako biztanleen artean (2001ean baino % 3,3 gehiago). Horiek horrela, aseguratuko 3,7 kontsulta izan ziren, batez beste. Aseguratuek gehien erabilitako espezialitateak hauek izan ziren: traumatologia (100 aseguratuko 48 kontsulta, batez beste) eta, ondoren, pediatria eta tokoginekologia (bietan ere, batez beste 41 kontsulta, 100 aseguratuko)

Mediku-aseguratzaileetatik zetozen pazienteek guztira 40.186 ospitale-ingresu izan zituzten, 2001ean baino % 7,8 gehiago. Hartara, Euskal AEn 2002an izandako ospitale-ingresu guztien % 14,7 izan ziren. Beste alde batetik, ALE erregimenean ospitaleratutakoen % 72,3ri ebakuntza kirurgikoa egin zieten: guztira 29.066 ebakuntza (aurreko urtean baino % 4,2 gehiago).