2003ko laugarren hiruhilekoan, 4.650 pertsona hil ziren Euskal AEn, 2002ko laugarren hiruhilekoan baino % 3,1 gehiago, Eustaten datuen arabera. Lurraldeka, Araban 596 pertsona hil ziren, Bizkaian 2.589, eta Gipuzkoan 1.465.

2003. urteko heriotzen behin-behineko kopurua 18.558 da. Horietatik 9.631 dira gizonezkoak, eta 8.927 emakumezkoak. Bizilekua Euskal AEn izan eta erkidegotik kanpo hil direnen datuak falta direla, 2002an baino 521 heriotza gehiago erregistratu ziren, % 2,9 gehiago, alegia.

2003an izan ziren heriotzen % 30,2 (5.605) zirkulazio-sistemako gaixotasunen ondorioz gertatu ziren. Hurrengo heriotza-kausa tumoreak izan ziren, heriotzen % 29 eragin baitzituzten (5.375). Hirugarrenik, alde handiarekin, arnas aparatuko gaixotasunek heriotzen % 10,7 eragin zituzten (1.987)

Heriotzen kausak ez ziren berdinak izan sexu batean eta bestean: gizonezkoen artean, tumoreak hilgarriago gertatu ziren zirkulazio-aparatuko gaixotasunak baino; emakumezkoen artean, berriz, heriotza-kausa nagusia gaixotasun kardiobaskularrak izan ziren, eta tumoreak bigarren.

Gora egiten jarraitzen du 100 urte edo gehiago dituztela hil direnen kopuruak.

2003an hilen artean, urtebetetik beheragoko haurrak izan ziren 56 lagun: 29 mutiko eta 27 neskato. Bestalde, 100 urte edo gehiagorekin hil zirenen kopurua nabarmen handitu dela ikus daiteke: 1990ean 56 izan ziren, eta 2003an, ordea, 134 (23 gizonezko eta 111 emakumezko).

2003ko behin-behineko datuak kontuan izanik, heriotzak baino 631 gehiago izan ziren jaiotzak, eta Euskal AEko hazkunde begetatiboa zeinu positibora aldatu da. Lurraldeka, saldo positiboak gertatu ziren Araban eta Gipuzkoan, 432 eta 736 pertsona irabazi baitzituzten, hurrenez hurren. Bizkaian, aitzitik, heriotzak gehiago izan ziren jaiotzak baino (-537).