Euskal AEn, 2004ko laugarren hiruhilekoan, 21.000 internauta gehitu dira, 2004ko bigarren hiruhilekoan baino % 3,4 gehiago, Eustatek landutako datuen arabera. Sarera sartu berri diren horiekin, azken hiru hilean Internetera konektatu diren 15 urteko eta gehiagoko biztanleak % 35,5era iritsi dira. Lehen aldiz, Interneterako konexioen batez besteko iraupenak ordubetea gainditu du; 60,3 minutukoa izan da, hain zuzen.

Internauten gehikuntzak, batetik, ezkutatzen du, urtaroko galera bat dela kausa, 10.900 erabiltzaile gazte (15 eta 24 urte bitarte) galdu direla. Beste alde batetik, langabeek eta ezaktiboek ekartzen dituzte kopururik handienak internauten multzora: 23.600 pertsona. Horien artean, bostetik lau 25 eta 44 urte bitartekoak dira, % 70 emakumezkoak dira, eta ia bi heren Bizkaian bizi dira.

Internauten gehitze-erritmoa bikoiztu egin da 2004ko azken seihilekoan, 2003ko aldi beraren aldean.

Azken bi urtean, erabiltzaile-kopuruak izan dituen igoera handienak urtearen lehen erdian gertatu izan dira. Hala ere, 2004ko bigarren eta laugarren hiruhilekoen artean %3,4ko hazkundea izan zen, eta 2003ko aldi berean, berriz, hazkundea % 1,7koa izan zen.

Arabak, berriro ere, erabiltzaile-tasarik handiena du, % 37,3, hain zuzen, eta hazkundea % 4koa izan da; hurrengoa Bizkaia da, % 35,4ko tasa eta % 6,7ko igoera izan dituela. Gipuzkoan, internautak % 2 jaitsi dira, eta tasarik txikiena du orain, % 34,8.

Internetera etxetik sartzen diren internauten ehunekoa (% 71,1) handienetakoa da Estatuko erabiltzaileen artean. Hala ere, 2004ko laugarren hiruhilekoan egonkortzeko joera atzeman da, eta tasa % 1,1 baino ez da gehitu.

Internetera bestelako tokietatik (ziberkafeak, liburutegiak, eta abar) sartzen direnen artean ere moteldu egin da gehitze-erritmoa, haien tasa % 3,2 igo da eta; lantokitik sartzen diren erabiltzaileak % 2,3 gehitu dira, baina ikastetxetik sartzen direnek % 6,1 egin dute behera azken aldian, urtaroko arrazoiengatik.

Interneteko bost erabiltzailetik bik erabili dituzte CHAT zerbitzuak, 2004ko bigarren hiruhilekoan baino % 15 gehiagok

Internetera sartzea bera alde batera utzita, Euskal AEko internautek gehien erabiltzen duten zerbitzua posta elektronikoa da: % 81,2k erabiltzen dute, hain zuzen, eta % 4,9 gehitu dira 2004ko bigarren hiruhilekoan eginiko inkestaren aldean. CHAT zerbitzua hazi da gehien, % 39,4 tasa baitu orain, lehen zuen % 35,4 tasaren aldean.

2004ko azken hiruhilekoan izan den % 0,7ko hazkundearekin, biztanleen % 86,5ek dute orain telefono mugikorra etxean.

Telefono mugikorra erabiltzeko aukera urteko lehen seihilekoan hazi ohi da gehien, baina 2004ko bigarren seihilekoan % 0,7 hazi zen, eta 10.600 pertsona gehitu ziren telefono mugikorra erabiltzeko aukera zutenetara; 2003ko aldi berean, ostera, % 0,4 hazi zen, eta 5.800 pertsona gehitu ziren.

Emakumeei dagozkie telefono mugikorra erabiltzeko aukera berri gehienak, 2004ko bigarren hiruhilekoan % 83,9 baitzen haien tasa, eta 2004ko laugarren hiruhilekoan, aldiz, % 85,1. Gizonezkoen tasak, bestalde, % 88aren inguruan dirau.

Arabarrek hornikuntza hori eskurago dute, Euskal AEko batez bestekoaren aldean, % 88 baitira; gipuzkoarrak eta bizkaitarrak ondotik datoz, % 86 baino apur bat gehiago kasu bietan.

Nahiz eta Internet bidezko erosketak gehienbat urteko lehen seihilekoan egiten diren, 2004ko laugarren hiruhilekoan % 6,5 gehitu ziren erosleak.

Azken hiru hilean Internet bidez erosi duten erabiltzaileak % 6,5 hazi dira 2004ko bigarren hiruhilekotik laugarrenera. Merkataritza elektronikoa erabiltzen dutenen ehunekoa, 2004. urtearen bukaeran, % 14,3 da.