EUSTATen datuen arabera, Euskal Autonomia Erkidegoan 305.356 pertsona zeuden Aseguru Libreko Entitateetan aseguratuta, hau da, aurreko urtean baino %1,8 gutxiago zeuden aseguratuta.

Lurralde historikoka, Bizkaiak jarraitzen zuen aseguratutako biztanle kopuru handienarekin (%19,6), gero Araba (%13,2) eta azkenik Gipuzkoa (%7,7).

Grafikoa: Aseguratuen kopurua poliza motaren arabera, 2002-2003

Iturria: EUSTAT

Banako edo familiako polizaren modalitatea, aseguratu gehien zituena izan bazen ere (%51,9), aseguratu gehien galdu zituena ere izan zen (%-7,1); horien atzetik mutualitate publikoetako polizek ere aseguratu asko galdu zuten (%-6,5). Aitzitik, aseguru kolektiboek (enpresa edo beste talde zehatz batzuei zuzendutakoek), aseguratutako biztanleen %29,7arekin, %13,1eko hazkundea izan zuten; horrela, 1999. urtean hasitako gehitzeko bilakaerarekin jarraitu zuten.

Aseguratu gehienek (%98,2) osasun-asistentzia orokorra estaltzen duen poliza bat aukeratu zuten eta soilik %1,8ak kontratatu zuen laguntza zehatza ematen duen besteren bat (hortzetako asegurua, esaterako).

Osasun-asistentziako aseguruen sektorean, 2003. urtean, guztira 148 milioi euroko sariak bildu ziren, hau da, Euskal Autonomia Erkidegoko BPGaren %0,3a. 2002. urtearen aldean sari kopurua %7,9 gehitu zen; hala ere, hazkunde hori Estatukoa (%10,20) baino txikiagoa izan zen.

Euskal Autonomia Erkidegoan, aseguratu bakoitzeko batez besteko saria 485 eurokoa izan zen, Estatukoa (469 euro) baino handiagoa; eta horrek 2002aren aldean %10eko gehikuntza ekarri zuen. Poliza modalitate guztietan eman zen gehikuntza hori, baina batez ere poliza kolektiboetan (%14,8).

Aseguru libreko entitateetan, guztira, espezialitate guztietako 7.055 mediku eta 451 erizaintzako teknikari izan ziren. Horiek, 1.145.101 kontsultatan lagundu zuten (2002an baino %1,8 gutxiago) eta, beraz, aseguratu bakoitzak batez beste 3,7 bisita egin zituen. Bestalde, traumatologia, pediatria, tokoginekologia eta oftalmologia izan ziren (hurrenkera horretan) gehien bisitatu ziren espezialitateak.

Ospitaletan emandako laguntza %7,5 gehitu zen. Mediku-aseguratzaileetatik etorritako gaixoen artean 43.188 ospitaleratu egin ziren. Horien %70ari, gainera, ebakuntza kirurgikoa egin zitzaion; hain zuzen, 30.244 ebakuntza egin ziren (aurreko urtean baino %4,1 gehiago).

Taula: Asistentzia mediko-farmazeutikoko aseguru libreko entitateen bilakaera

Iturria: EUSTAT