2005eko lehenengo hiruhilekoan, Euskal AEn 6.058 lagun hil ziren, iazko aldi berean baino %22,6 gehiago, EUSTATen datuen arabera. Lurraldez lurralde, Araban 736 lagun hil ziren, %25 gehiago; Bizkaian 3.367, %22,5 gehiago; eta Gipuzkoan 1.955, %21,7 gehiago.

Normalean, urteko lehenengo hiruhilekoan izaten da heriotza gehien eta arnas aparatuko gaixotasunak izaten dira heriotza-kopuruan gehikuntza handiena izaten dutenak. Aurten, 2004ko hiruhileko beraren aldean ere hazkunde handia izan da, %80koa, hain zuzen ere.

Gainera, 2005eko 1. hiruhilekoan %17 gehitu ziren zirkulazio-apartatuko gaixotasunak, aurreko urteko hiruhileko beraren aldean. Gaixotasun horien eraginez 1.882 lagun hil ziren eta ondorioz, heriotza-kausa nagusia izan ziren eta heriotzen ia herena eragin zuten.

Bigarren heriotza-kausa tumoreak izan ziren eta 1.436 heriotza (%23,7) eragin zituzten. Hirugarren, urrunago kokatu ziren arnas aparatuko gaixotasunak, neguko hilotan 981 heriotza eragin baitzituzten.

Heriotzen kausak ez ziren berdinak izan sexu batean eta bestean: gizonezkoen artean, tumoreak hilgarriago gertatu ziren zirkulazio-aparatuko gaixotasunak baino; emakumezkoen artean, berriz, heriotza-kausa nagusia gaixotasun kardiobaskularrak izan ziren, eta tumoreak bigarren. Arnas aparatuko gaixotasunak hirugarren heriotza-kausa izan ziren, berriro ere, sexu bietan.

2005eko lehenengo hiruhilekoan izandako heriotzen artean, 17 heriotza urtebetetik beherako umeei egokitu zitzaizkien: 11 mutikori eta 6 neskatori.

2005eko lehenengo hiruhilekoan hazkunde begetatiboa negatiboa izan zen eta 1.131 biztanle galdu ziren. Bizkaiak 719 biztanle galdu zituen eta Gipuzkoak 350. Araban ere, heriotzak gehiago izan ziren jaiotzak baino (-62), ohikoa alderantzizkoa gertatzea den arren.