2004an, Euskal AEko industri jarduerak %2,5eko hazkunde erreala izan zuen aurreko ekitaldiaren aldean. Aurreko urteko zifrak hobetu egin ziren bigarren urtez jarraian: 2002an, industria %0,9 hazi zen; 2003an, tasa %1,2ra iritsi zen, eta 2004an, bikoiztu eta %2,5era iritsi zen. Estatu osoarekin alderatuta, eta erkatu ahal izateko industria energia gabe hartuta, Euskal AEko hazkundea (%1,9) puntu eta erdi pasa handiagoa izan zen estatukoa baino (%0,3).

Industriaren urteko bilakaerak joera desberdinak izan zituen Euskal AEko hiru lurraldeetan. Hazkunderik handiena Araban izan zen eta %5,5eko tasara iritsi zen; Gipuzkoa bien bitartean kokatu zen %1,9ko hazkundearekin, eta Bizkaia, aldiz, hirugarren kokatu zen %1,5eko tasarekin.

2004. urteko ekitaldian industriako ia 800 enplegu sortu ziren, aurreko urtean baino %0,3 gehiago, baina urtez urte aldakuntza-tasak jaitsi egin ziren. Industri produkzioaren hazkundea enpleguarena baino hobea izateak hobetu egin zituen 2000. urtetik murrizten ari ziren produktibitate-mailak.

Sektorekako azterketa zehatzagoan, industrian pisurik handiena duten sektoreen artean honakoak nabarmendu ziren balio erantsiaren hazkunde-tasengatik: garraio-materiala (%7,6), makineria (%8,6), kautxua eta plastikoa (%10,0), material elektrikoa (%9,4) eta papera, argitalpenak eta grafikoak (%6,7).

Alderantziz, pisurik handieneko sektoreen artean, tasa negatiboengatik nabarmendu ziren metalurgia eta metalezko artikuluak (%-6,4) eta elikagai-industria (%-1,7) adarrak. Sektore horiek biak industriaren %37 hartu zuten 2004an.