Euskal AEko industria-sektorearen 2003ko bilakaerak, aurreko bi ekitaldietakoak bezala, urteko aldakuntza-tasa apalak izan zituen, balio erantsiaren %2,8ko hazkunde nominala, hain zuzen ere. Hala ere, azken ekitaldi horretan zortzi hamarreneko azelerazio txikia nabaritu zen, aurreko urteko hazkundearen aldean (%2,0), Eustaten datuen arabera.

Industriako enplegua ere %1,2 hazi zen 2003an, eta 3.000 enplegu garbi sortu ziren. 1994an industriak 192.274 lagun enplegatu zituen eta 2003an, bederatzi urte geroago, zifra hori 248.922 langilera iritsi zen; beraz, 10 urtean 56.000 enplegu pasa gehiago.

Honakoak dira 2003ko industria-bilakaeraren alderdirik esanguratsuenak:

- Balio erantsiaren urteko hazkunderik handieneko azpisektoreak honakoak izan ziren: petrolioa fintzea (%36,1), energia elektrikoa, gasa eta ura (%9,0), garraio-materiala (%8,8), ez-metalezko industria (%8,0), elikagai-industria (%5,9), kimika-industria (%5,6), material elektrikoa (%3,3) eta kautxua eta plastikoa (%3,2).

- Bost azpisektorek bilakaera negatiboa izan zuten eta aurreko urtean baino balio erantsi txikiagoa sortu zuten: ehungintza eta jantzigintza (%-16,7), larruaren eta oinetakoen industria (%-15,6), metalezko eta ez-metalezko meak (%-12,7), zurgintza (%-6,3) eta papera, edizioa eta arte grafikoak (%-1,6) azpisektoreek.

- Urteko enplegu-sorkuntzako tasarik dinamikoenak honako azpisektoreek lortu zituzten: garraio-materiala (%4,7) eta papera, edizioa eta grafikoak (%4,4) azpisektoreek.

- Aurreko urtearen aldean enplegu-maila murriztu zutenak, aldiz, energia elektrikoa, gasa eta ura (%-5,7) eta ehungintza eta jantzigintza (%-3,5) azpisektoreak izan ziren.

- 2003an nabarmen murriztu ziren inbertsioak, %15,4ra iritsi arte.

- Erabilitako ibilgetuaren birjarpenera bideratutako amortizazioek urteko %8,2ko hazkundea izan zuten.

- Ustiapeneko soberakin gordina murriztu egin zen hirugarren urtez jarraian: %-0,6 2001ean, %-1,2 2002an eta %-0,8 2003an.

- Langileria-kostuak, aldiz, %5,5 hazi ziren, aurreko urtean baino ia puntu bat gehiago.

- Zergen aurreko emaitzek %9,6ko beherakada agertu zuten.

- Cash-flow-a %2,8 murriztu zen aurreko urtearen aldean, cash-flow-aren %42,7 suposatu zuten amortizazioen (%8,2) hazkunde nabarmena izan zen arren.

2002an ez bezala, ekitaldi horretako industriako hazkunde-tasarik handiena Bizkaiak (%3,5) lortu zuen. Arabak (%2,6) eta Gipuzkoak (%2,1) hazkunde-tasa neurritsuagoak izan zituzten, Euskal AEko batez bestekoaren azpitik (%2,8).

Eraikuntzaren sektoreak %16,7ko hazkunde nominala lortu zuen 2003an

Eraikuntzaren sektoreak %16,7ko hazkunde nominala izan zuen eta bere balio erantsiaren gehikuntza-tasa altuak markatzen jarraitu zuen. 2001ean %16,6ko igoera izan zuen, 2002an %10,3koa eta 2003an %16,7koa.

Sektorean enplegatutako pertsonalak %7,0ko bilakaera positiboa izan zuen 2002an eta urtebete beranduago %6,5 hazi eta 81.118 landunen zifrara iritsi zen, 2003ko ekitaldian 5.000 enplegu garbitik gora sortuz.

2003an eraikuntzaren sektoreak izan zuen ibilbidearen beste elementu azpimarragarri batzuk honakoak izan ziren:

- Ustiapeneko soberakin gordina %22 hazi zen 2003an, urtebete lehenagoko urteko %5,3ko tasaren aldean.

- Zergen aurreko emaitzek %39,1eko hazkunde nabarmena izan zuten. Aipatzekoa da 2002an %0,3 murriztu zirela.

- Beraz, Cahs-flow-ak %36,5eko gehikuntza izan zuen, emaitzen bilakaera positiboari esker.