Eustatek landutako datuen arabera, 2005eko bigarren hiruhilekoan izandako 4.370 heriotzek %0,7ko hazkunde arina eragin zuten, iazko aldi beraren aldean. Lurraldez lurralde, Araban 587 lagun hil ziren, Bizkaian 2.425, eta Gipuzkoan 1.358.

Heriotzen kausa nagusia zirkulazio-aparatuko gaixotasunak izan ziren: 1.297 lagun hil ziren gaixotasun horien ondorioz (%29,7); ia-ia parean, tumoreak izan ziren bigarren heriotza-kausa eta 1.288 heriotza eragin zituzten (%29,5). Hirugarren, arnas eritasunak izan genituen eta hauek 443 heriotza eragin zituzten hiru hileotan (%10,1).

Heriotzen kausak ez ziren berdinak izan sexu batean eta bestean: gizonezkoen artean, tumoreak (%35,5) hilgarriago gertatu ziren zirkulazio-aparatuko gaixotasunak (%26,2) baino; emakumezkoen artean, berriz, heriotza-kausa nagusia gaixotasun kardiobaskularrak (%33,6) izan ziren, eta tumoreak (%22,6) bigarren.

2005eko bigarren hiruhilekoan izandako heriotzen artean, 16 heriotza urtebetetik beheragoko umeei egokitu zitzaizkien: 12 mutikori eta 4 neskatori.

2005eko bigarren hiruhilekoaren hazkunde begetatiboa positiboa izan zen, 569 biztanle irabazi baitziren. Saldoak positiboak izan ziren hiru lurraldeetan: Araban 139koa, Bizkaian 82koa eta Gipuzkoan 348koa.