EUSTATen datuen arabera, 2004. urtean Euskal Autonomia Erkidegoan 311.148 pertsonak kontratatu zuten osasun-laguntzarako aseguru pribatua, hau da, aurreko urtean baino %1,9 gehiagok. Aseguru kolektiboek eragin dute gehikuntza hori; izan ere, aseguru hauek nabarmen gehitu dira azken sei urteetan (1999-2004) bai aseguratu kopuruari dagokionez (%41,3) eta bai primen kopuruari dagokionez ere (%123,2).

Lurralde historikoka, Bizkaiak jarraitzen du aseguratutako biztanle kopuru handienarekin (%19,6), gero Araba (%12,4) eta azkenik Gipuzkoa (%7,8).

Banako edo familiako modalitateak izan zuen aseguratu gehien (%49,9), gero aseguru kolektiboek (enpresak edo beste talde zehatz batzuk) %32,5arekin eta azkenik mutualitate publikoak (%17,6). Alabaina, aurreko urtearen aldean, aseguru kolektiboetan aseguratutako pertsona kopurua nabarmen gehitu da berriz (%11,4); banako edo familiako modalitatea eta mutualitate publikoetan aseguratutakoen kopurua, ordea, gutxitu egin da (%-2,1 bakoitzean).

Aseguratu gehienek (%98) oraindik nahiago dituzte asistentzia orokorra (lehen mailako arreta, arreta anbulatorioak eta ospitalizatzeak) estaltzen duten mediku-aseguru pribatuak, arreta zehatzeko beste aseguruak baino (esaterako, hortz-asegurua).

Osasun-laguntzako aseguruen sektorean, 2004. urtean, guztira 158,5 milioi euroko primak bildu ziren, hau da, Estatuko guztirakoaren %4,5 inguru eta Euskal Autonomia Erkidegoko BPGaren %0,3. 2003. urtearen aldean prima kopurua %7,1 gehitu zen; hala ere, hazkunde hori Estatukoa (%9,9) baino txikiagoa izan zen.

Euskal Autonomia Erkidegoko aseguratu bakoitzak batez beste 510 euro ordaindu zituen; Estatuko aseguratuek (515 euro) baino gutxiago ordaindu zuten. Bestalde, polizaren modalitate batetik bestera ez zen aldaketa handirik eman. Aurreko urtearen aldean, batez besteko prima hori %5,2 gehitu zen; Estatuan, aldiz, %4,6 bakarrik gehitu zen.

Osasun-laguntzako mediku-asegurua duten pertsonek 1.182.157 mediku-kontsulta (2003an baino %4,5 gehiago) egin zituzten euren aseguru-entitateen kontura; beraz, aseguratu bakoitzak batez beste 3,8 bisita egin zizkion medikuari. Traumatologia, tokoginekologia, pediatria eta oftalmologia espezialitateak izan ziren gehien eskatu zirenak; baina aurreko urtearen aldean ehunekoetan gehikuntzarik handienak izan zutenak medikuntza orokorra (%27,2) eta errehabilitazioa (%21,8) izan ziren.

Ospitaleetan emandako arretari dagokionez, mediku-aseguratzaileetatik etorritako gaixoen artean 46.922 ospitaleratu egin ziren, 2003. urtean baino %8,6 gehiago. Horien %68,6ari ebakuntza kirurgikoa egin zitzaion; hain zuzen, 32.185 ebakuntza egin ziren (aurreko urtean baino %6,4 gehiago). Kirurgia orokorra, traumatologia eta ginekologia espezialitateetan eman ziren ospitaleratze gehienak.